«استانانىڭ» جەڭىلىسىنە كىم جاۋاپتى؟

وسىدان ەكى اپتا بۇرىن نيدەرلاندتا وتكەن كەزدەسۋدە جەرلەستەرىمىز 6:0 ەسەبىمەن ماسقارا بولىپ جەڭىلگەن ەدى. بىراق سول جەڭىلىستى اقتاپ الۋعا بولاتىن ءبىرشاما سىلتاۋ دا بار ەدى. العاشقى ويىندا «استانا» نەگىزگى قۇرامداعى فۋتبولشىلاردىڭ جاراقات الىپ قالۋىنا بايلانىستى ەكىنشى قۇرامىن شىعاردى. ويىن بارىسىندا ەكى فۋتبولشىمىز جاراقات الىپ, كەزدەسۋدى مەرزىمىنەن بۇرىن اياقتاۋعا ءماجبۇر بولدى. سونداي-اق تورەشى ەكى مارتە ءبىزدىڭ قاقپاعا پەنالتي بەلگىلەدى. وسىنداي سىلتاۋلاردان كەيىن البەتتە, 6-0 ەسەبىن اقتاپ الۋعا بولاتىن ەدى. بىراق ءوز الاڭىمىزداعى جەڭىلىستى اقتاپ الا المايمىز. ويتكەنى الاڭدا العاشقى ويىنداعىداي ەمەس, نەگىزگى قۇرام فۋتبولشىلارى وينادى. ونىڭ ۇستىنە «استانانىڭ» ءوز الاڭ­ىندا, ءوز جانكۇيەرلەرىنىڭ الدىندا ەۋرو­پالىق كوماندالارعا جەڭىلمەيتىن جاق­سى ءداستۇرى بار-تىن. ءتىپتى بۇل كۇن­دەرى ەلوردالىقتارعا جاسىل الاڭنىڭ جاسان­دىلىعى دا كومەكتەسپەيتىن كۇيگە جەتتى.

وتكەن ماتچتا «استانا» ويىنشى­لارىنىڭ تىم شارشاڭقى كۇيدە ەكەنى كوزگە بىردەن بايقالدى. ونىڭ ەكى سەبەبى بار. ءبىرىنشىسى, جازدان بەرى ءبىر قۇرام ىشكى چەمپيوناتتا دا, ەۋرودودا ويىندارىندا دا دوپ تەۋىپ ءجۇر. ياعني, فۋتبولشىلار ءار ءۇش كۇن سايىن ءبىر ماتچ وتكىزۋدە. ونىڭ ۇستىنە «استانانىڭ» بىرنەشە ويىنشىسى ۇلتتىق قۇراما ساپىندا دا وينايدى. بۇل دا تىعىز كەستەدە ماتچ وتكىزىپ جۇرگەن فۋتبولشىلارعا كەرى اسەرىن تيگىزبەي قويمايدى. ەكىنشى سەبەبى, ەلوردالىق ويىنشىلاردىڭ تەڭ جارتىسى 30 جاس­تان اسىپ كەتكەن. قانشا جەردەن مىقتى بولىپ تۇرسا دا, ولاردىڭ فيزيكالىق مۇمكىندىگى مۇنداي ويىندارعا جەتپەي قا­لىپ جاتىر. مىسالى, كەشەگى ماتچ­تا 33 جاستاعى قورعاۋشى ەۆگەني پوست­نيكوۆ قايتا-قايتا قاتەلەسىپ, ءۇش گولدىڭ سوعىلۋىنا سەبەپشى بولدى. كەي ساتتە 2 گولدىڭ اۆتورى, 18 جاستاعى شابۋىلشى مايرون بوادۋدىڭ جىلدامدىعىنا ىلە­سە الماي قالىپ جاتتى. سونداي-اق 35 جاس­تاعى سەربيالىق قورعاۋشى انتونيو رۋكا­ۆينا دا بولمايتىن جەردە ءجيى قاتە­لىك جىبەردى. بۇل فۋتبولشىلاردىڭ تاجىري­بەسىنە كۇمان كەلتىرمەيمىز, بىراق شاما-شارىقتارىنىڭ بۇگىنگى فۋتبولعا ساي كەلمەيتىنىن وتكەن ماتچتا وزدەرى دە تۇسىن­گەن شىعار.

ەل چەمپيوندارى كەلەسى جىلى «شال-شاۋقانداردى» «زەينەتكە» جىبەرىپ, وزدەرى­نىڭ قۇرامىن بويىندا جالىنى, كو­زىندە وتى بار تالانتى ءارى جاس فۋت­بولشىلارمەن تولىقتىرۋى كەرەك سياقتى. ايتپەسە ءدال قازىرگى فۋتبولشىلارىمەن كەلەسى جىلى ەۋروپانى ەڭسەرە المايدى.

جالپى الاڭدا فۋتبولشىلار وينا­عانىمەن, جەڭىلىسكە باس باپكەر جاۋاپ بەرۋى كەرەك. بىراق كەزدەسۋدەن كەيىن رو­مان گريگورچۋك ءباسپاسوز ءماسليحاتىندا جانكۇيەرلەردەن كەشىرىم سۇراۋدىڭ ورنىنا: ء«وز الاڭىمىزدا, تاماشا اتموسفەرادا 0:5 ەسەبىمەن ۇتىلعانىمىز وكىنىشتى. ءىرى جەڭىلىستى دە باستان وتكەرۋ كەرەك», دەپ قىسقا عانا قايىردى. سونداي-اق جۋرناليستەردىڭ «ماسقارا جەڭىلىستەن كەيىن وتستاۆكاعا كەتەسىز بە؟» دەگەن سۇراعىنا پىكىر بىلدىرۋدەن باس تارتىپ, جاۋاپسىز قالدىردى. ادەتتە ەۋروپا ەلدەرىندە مۇنداي ءىرى جەڭىلىستەن سوڭ باس باپكەرلەردىڭ ءوز ەركىمەن قىزمەتىنەن كەتىپ جاتاتىنى بەلگىلى.

«استانانى» ەۋروپالىق كومانداعا اينالدىرعان بولگار مامانى ستانيمير ستويلوۆ قىزمەتىنەن كەتكەننەن سوڭ كلۋب باسشىلىعى رومان گريگورچۋك كوماندانى ورگە سۇيرەيدى دەپ ۇمىتتەنگەن بولاتىن. وكىنىشكە قاراي باسشىلىقتىڭ ءۇمىتى اقتالمادى. كەرىسىنشە, گريگورچۋكتىڭ «ارقاسىندا» «استانا» رەيتينگتە تومەن قاراي قۇلديلاپ, بەس جىل بويى قاسىقتاپ جيناعان ابىرويىن شەلەكتەپ توگىپ جاتىر. «استانا» 2015/16 جىلدارى ستويلوۆ باسشىلىعىمەن چەمپيوندار ليگاسىنىڭ توپتىق كەزەڭىندە ويناپ, ءوز الاڭىمىزدا وتكەن ءۇش ويىندا دا جەڭىلگەن جوق ەدى. ءتىپتى يسپانيانىڭ «اتلەتيكو مادريد» كلۋبى «استانا ارەنادا» گول سوعا الماي سان سوعىپ كەتكەن بولاتىن. ال بىلتىر عانا «قاي­راتتان» 2:1 ەسەبىمەن جەڭىلىپ جۇرگەن از بيىل «استانا» قاقپاسىنا ەكى ويىندا 11 گول سوقتى. ەرىنبەگەن فۋتبولشى گول سوقتى ءبىزدىڭ قاقپاعا. سونداي-اق ەلور­دالىقتار بيىلعى توپتىق كەزەڭنىڭ ءتورت كەزدەسۋىندە دە جەڭىلىپ, انتيرەكورد ورناتتى. ءتورت ويىندا ءبىر عانا گول سوعىپ, ءوز قاقپالارىنان 14 گول وتكىزىپ الدى. الدا «مانچەستەر يۋنايتەد» پەن «پار­تيزانعا» قارسى ويىندا ءالى قانشا گول جىبەرەرىن كىم ءبىلسىن؟!

قىسقاسىن ايتقاندا, «استانا» كەلە­­سى جىلى ەۋرودودا ويىندارىندا تاعى دا جان­­كۇ­يەرلەر الدىندا ماسقارا بولعى­سى كەل­مەسە ۋكراين مامانىن ەلىنە قاي­تا­­رىپ, قولىنان ءىس كەلەتىن, تاجىري­بەسى بار جات­تىقتىرۋشىنى الدىرت­قانى دۇرىس. سونىمەن قاتار جوعارى­دا ايتقانى­مىزداي قۇرامىن «شال-شاۋقانداردان» تازارتقاندارى ءجون. ايتپەسە «استانا» كەشەگىدەي ويىنى­­مەن كەلەسى ماۋسىمدا توپتىق كەزەڭگە دە شىعا الماي قالۋى مۇمكىن.

«استانا» بيىلعى ماۋسىمدى اياقتاۋ ءۇشىن ەۋروپا ليگاسىندا ءالى ەكى ماتچ وتكىزۋ كەرەك. كەشە ەلوردا كومانداسى ەل چەمپيوناتىنداعى سوڭعى تۋر ويىنىن «ەرتىسكە» قارسى وتكىزىپ, التىنشى رەت چەمپيوندىقتى تويلادى. ەندى 27 قاراشادا «مانچەستەر يۋنايتەد» كومانداسىن ءوز الاڭىندا قابىلداسا, 12 جەلتوقساندا سىرت الاڭدا «پارتيزانعا» قارسى وينايدى.