ەلىمىزدىڭ باس قالاسى – نۇر-سۇلتان شاھارىنا ساياحاتتاپ بارعان 30 ارداگەردىڭ ساپىندا بولىپ, ەرەكشە اسەر الىپ قايتقانىمىزدى «ەگەمەن» ارقىلى ەل-جۇرتقا جەتكىزۋدى ءجون دەپ تاپتىق.
«نۇر-سۇلتان – نۇرلى بولاشاق مەكەنى» دەپ اتالعان ساياساتقا قاتىسقان ارداگەرلەردىڭ ەڭ جاسى 65-تە بولسا, ەڭ ۇلكەنى – 91 جاستا.
مۇنداعى ماقسات – ەلباسىمىزدىڭ «بولاشاققا باعدار: رۋحاني جاڭعىرۋ» اتتى ماقالاسى اياسىندا ەلىمىزدىڭ, جەرىمىزدىڭ تاريحىمەن تەرەڭ تانىسۋ, كەلەشەك ۇرپاقتى وتانشىلدىققا تاربيەلەۋگە اتسالىسۋ, جاستارعا اعا ۇرپاقتىڭ جاۋىنگەرلىك جانە ەڭبەك داڭقى داستۇرلەرىن ناسيحاتتاۋ, ولاردى قازاقستاندىق پاتريوتيزم رۋحىندا باۋلۋعا قاتىسۋ بولاتىن. ويتكەنى وسى اسەرلى ساياحاتتان سوڭ بىزدەر قالالىق جانە اۋىلدىق وكرۋگتەردە جاستارمەن, جالپى جۇرتشىلىقپەن كەزدەسىپ, جينالعان قاۋىمعا ەلوردانىڭ ارعى-بەرگى تاريحىن تەرەڭىرەك اڭگىمەلەپ بەرگەن ەدىك.
استانامىزعا ساياحات بارىسىندا كەرەمەت اسەرگە بولەندىك. مۇنداعى بيىك تە ءزاۋلىم, كورىكتى دە كوركەم, بىرىنەن-ءبىرى وتەتىن ساۋلەتتى عيماراتتار كىمنىڭ دە بولسىن تاڭدانىسىن تۋدىرماي قويمايتىنى اقيقات. سايىن دالالى سارىارقا ءتوسى قازىرگى تاڭدا جاپ-جاسىل ورماندى القاپقا اينالىپتى. مۇنان بولەك قالانىڭ تازالىعى تاڭداي قاقتىردى.
شاردارا اۋداندىق ارداگەرلەر ۇيىمى رەسپۋبليكالىق ارداگەرلەر ۇيىمىنىڭ جانە اۋداندىق ارداگەرلەر ۇيىمىنىڭ بەكىتىلگەن جارعىسىنا, جىلدىق جوسپارىنا سايكەس جۇمىس اتقارادى. اعا بۋىن ارداگەرلەر باس قۇراعان بۇل قوعامدىق ۇيىم جۇمىس بارىسىندا ەلباسى ن.نازارباەۆتىڭ, پرەزيدەنتىمىز ق.توقاەۆتىڭ قازاقستان حالقىنا ارناعان جولداۋلارى مەن اسا ماڭىزدى رەسمي دەڭگەيدەگى قۇجاتتارىن باسشىلىققا الىپ وتىرادى.
قازىرگى تاڭدا اۋدانىمىزدا 6200 ارداگەر بار. ولاردىڭ ىشىندە 80-ءى تىل ارداگەرى, سوعىس ارداگەرلەرىنىڭ جەسىرلەرىنىڭ سانى – 13. سونداي-اق 101 جالعىزىلىكتى قارت بار. ولارعا 17 الەۋمەتتىك قىزمەتكەر كومەك كورسەتەدى.
ارداگەرلەر ۇيىمىنىڭ نەگىزگى ماقساتى مەن باستى مىندەتتەرى – ارداگەرلەردىڭ قۇقىقتارىن قورعاۋ, مۇمكىندىگىنشە ەل ومىرىندەگى قوعامدىق جۇمىسقا بەلسەنە ارالاسۋىنا ىقپال ەتۋ, ولاردىڭ لايىقتى الەۋمەتتىك تۇرمىستىق جاعدايىن قامتاماسىز ەتۋ.
قوعامنىڭ بىرلىگىن, كەلىسىمى مەن تۇراقتىلىعىن نىعايتۋ جونىندەگى جۇمىستارعا بەلسەنە قاتىسىپ جۇرەتىن ارداگەرلەردىڭ جاي-كۇيىن, ولارعا قىزمەت كورسەتۋدىڭ مادەني-تۇرمىستىق, مەديتسينالىق جانە باسقا دا تۇرلەرىن جاقسارتۋعا جاردەمدەسىپ جۇرگەن, سونىمەن بىرگە ەستەن كەتپەستەي اسەرلى ساياحات ۇيىمداستىرىپ بەرگەن اۋدان باسشىلارىنا العىستان باسقا ايتارىمىز جوق.
توقسانباي بەردىبەكوۆ,
شاردارا اۋداندىق ارداگەرلەر كەڭەسىنىڭ توراعاسى
تۇركىستان وبلىسى