الماتى قالاسىنىڭ اكىمى باقىتجان ساعىنتاەۆ «تول-قۇرىلىس» كومپانياسىنىڭ قىزمەتكەرلەرىنە ايلار بويى بەرىلمەگەن جالاقىلارىن تولەۋدى تاپسىردى. بۇل جونىندە اكىمنىڭ ءوزى Instagram-داعى جەكە پاراقشاسىندا جازدى.
شاھار باسشىسى ازاماتتاردىڭ جەكە قابىلداۋىن وتكىزىپ, وندا ەڭبەكاقىنىڭ ۋاقىتىلى تولەنبەۋى مەن كەزەگى كەلگەندەرگە باسپانا بەرۋ ماسەلەسىن قاراستىرعانىن باياندادى.
«تول-قۇرىلىس» كومپانياسىنىڭ وكىلىنە قىزمەتكەرلەردىڭ ءتىزىمىن جاساپ, ەڭبەكاقى بويىنشا قارىزدى جابۋدى تاپسىردىم. جالپى, اكىمدىك اتالعان كومپانيانىڭ قىزمەتكەرلەر الدىنداعى بەرەشەك ماسەلەسىن شەشۋ بويىنشا كەشەندى جۇمىس جۇرگىزۋدە. ءتيىستى تاپسىرمالار بەرىلدى. قابىلداۋىما كەلگەندەردىڭ اراسىندا تۇرعىن ءۇي كەزەگىندە تۇرعاندار كوپ. ولار ءۇي الۋ كەزەگىن تەزدەتۋدى وتىنۋدە. بۇل ماسەلەنى ءبىز حالىقتىڭ مۇقتاج ساناتتارى ءۇشىن سالىناتىن ءۇي سالۋ كولەمىن ۇلعايتۋ ەسەبىنەن شەشەتىن بولامىز», – دەدى باقىتجان ساعىنتاەۆ.
قابىلداۋدا تۇرعىندار تاراپىنان قالانىڭ تىنىس-تىرشىلىگىن جاقسارتۋ بويىنشا ۇسىنىستار دا ايتىلعان. اتاپ ايتقاندا, اۋانى تازارتاتىن جۇيە ويلاپ تابۋ, كەڭىستىكتى اباتتاندىرۋ, شىعارماشىلىق ويدى ىسكە اسىرۋ, انا مەن بالا بويىنشا اقپاراتتى تسيفرلاۋ, قوعامدىق قاۋىپسىزدىكتى قامتاماسىز ەتۋ.
«كەلىپ تۇسكەن ۇسىنىستاردى قاراستىرامىز. مۇمكىن كەيبىرەۋىن «بيۋدجەتكە قاتىسۋ» جوباسى ارقىلى جۇزەگە اسىرامىز. كەيبىر ماسەلەلەر تەرەڭ زەرتتەۋدى قاجەت ەتەدى. سونداي-اق قوعامدىق كەڭەستىڭ تالقىسىنا تۇسەتىن ماسەلەلەر دە بار», – دەپ تۇيىندەدى الماتى اكىمى ءوز جازباسىن.
الماتى