اقتوبەدە «جاسىل ەل» ەڭبەك جاساقتارىنىڭ حV ەڭبەك ماۋسىمىنىڭ جابىلۋى سالتاناتتى تۇردە اتالىپ ءوتتى. مەرەكەلى جيىنعا ارنايى قاتىسقان وبلىس اكىمى وڭداسىن ورازالين شارانى رەسمي تۇردە عانا وتكىزىپ قويماي, جاستاردى وتكەنگە وي سالۋعا, ارتىق-كەمىمىزدى سارالاپ, وسى باعىتتاعى جۇمىستى دامىتۋعا اقىل قوسۋعا شاقىردى.
«2005 جىلى ەلباسى ن.ءا.نازارباەۆ ستۋدەنتتىك قۇرىلىس وتريادتارىن قايتا جانداندىرۋ, جاستاردى ەڭبەكپەن قامتۋ جونىندە باستاما كوتەرگەن ەدى. سول باستامانى العاشقى بولىپ اقتوبەلىك بەلسەندى جاستار قولداعانى ەسىمىزدە. وسى 15 جىل ىشىندە 60 مىڭ جاس ستۋدەنتتىك وتريادتاردا جۇمىس جاساپ, ەڭبەك مەكتەبىنەن ءوتىپتى. ياعني وسىنشا جاستارىمىز اششى تەرمەن كەلەتىن تابىستىڭ ءتاتتى ءدامىن تاتتى. اقتوبە وبلىسىنىڭ شتابى ءوز جۇمىسىن ۇيىمداستىرۋدى دۇرىس جولعا قويا الدى. جاۋىنگەرلەر سانىمەن دە, ولارعا جالاقى تولەۋ بويىنشا دا رەسپۋبليكادا الدىڭعى قاتاردا. بيىلعى ەڭبەك ماۋسىمىندا 5 مىڭعا جۋىق اقتوبەلىك جاس جۇمىسپەن قامتىلىپتى. ول ارينە, ماقتانىشپەن اتاپ وتۋگە تۇرارلىق»,- دەدى ايماق باسشىسى.
وڭداسىن ورازالين 80 بەلسەندى جاسقا العىس حات جانە نۇر-سۇلتان قالاسىنا جولداما تابىس ەتتى. سونىمەن قاتار, جەتى ازامات «ۇزدىك جوعارعى وقۋ ورنى», «ۇزدىك ورتا وقۋ ورنى», «ۇزدىك اۋدان», «ۇزدىك جۇمىس بەرۋشى», «ۇزدىك جاۋىنگەر», «ۇزدىك كوماندير», «ۇزدىك وترياد» نوميناتسيالارى بويىنشا وبلىس باسشىسىنىڭ العىس حاتىمەن ماراپاتتالدى.
سونداي-اق وبلىس اكىمى «جاسىل ەل» ەڭبەك جاساقتارىنىڭ ەڭبەك ماۋسىمىن ۇيىمداستىرۋدا جىبەرىلگەن بىرقاتار كەمشىلىكتەردى سىنعا الدى. العا, ىرعىز,مۇعالجار, حرومتاۋ اۋداندارىنىڭ اكىمدەرىنە الداعى ۋاقىتتا ستۋدەنتتىك قۇرىلىس وتريادتارىن قاجەتتى جۇمىسپەن قامتۋدى دۇرىس ۇيىمداستىرۋدى تاپسىردى.