پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا «اۋىل – ەل بەسىگى» جوباسىن ىسكە اسىرۋ بارىسى قارالدى. بۇل تۋرالى primeminister.kz حابارلادى.
اتالعان باعىتتا اتقارىلىپ جاتقان جۇمىستار تۋرالى پرەمەر-ءمينيستردىڭ ورىنباسارى ر. سكليار, وڭىرلەردەگى جاعداي تۋرالى الماتى وبلىسىنىڭ اكىمى ا. باتالوۆ, شىعىس قازاقستان وبلىسىنىڭ اكىمى د. احمەتوۆ, اقمولا وبلىسىنىڭ اكىمى ە. مارجىقپاەۆ باياندادى.
«اۋىل – ەل بەسىگى» جوباسىن ىسكە اسىرۋ ەلباسىنىڭ 2019 جىلعى 27 اقپاندا Nur Otan پارتياسىنىڭ XVIII سەزىندە بەرگەن تاپسىرمالارىنا سايكەس باستالدى. جوبا ەلباسى ن. نازارباەۆتىڭ جانە پرەزيدەنت ق. توقاەۆتىڭ تاپسىرمالارى بويىنشا ازىرلەنىپ جاتقان اۋداندار, قالالار مەن وبلىستار بويىنشا اۋماقتاردى دامىتۋدىڭ وڭىرلىك باعدارلامالارى ءۇشىن بەرىك نەگىز بولا الادى.
«اۋىل – ەل بەسىگى» جوباسىنىڭ نەگىزگى ماقساتى – اۋىلدىق جەرلەردە ءومىر ءسۇرۋ ساپاسىن جاقسارتۋ, اۋىلدىق اۋماقتاردىڭ ينفراقۇرىلىمىن جاڭعىرتۋ, ولاردى وڭىرلىك ستاندارتتار جۇيەسىنىڭ پارامەترلەرىنە كەلتىرۋ. جاڭا ادىستەمە بويىنشا 3477 پەرسپەكتيۆالى اۋىل ىرىكتەلدى, وندا 6,6 ملن ادام نەمەسە اۋىل حالقىنىڭ 85% تۇرادى. 2027 جىلعا دەيىن جوباعا بولىنەتىن قاراجاتتى 900 ملرد تەڭگەگە دەيىن جوسپارلانعان قوسىمشا ارتتىرۋدى ەسكەرۋمەن, اۋىلدىق جەرلەردى دامىتۋعا باعىتتالعان باسقا مەملەكەتتىك باعدارلامالارمەن بىرگە قارجىلاندىرۋدىڭ جالپى كولەمى 2 ترلن تەڭگەدەن اسادى, ال جوبالار سانى 30 مىڭنان استام.
پرەمەر-مينيستر ا. مامين جوبانى ىسكە اسىرۋ اياسىندا 7 جىل ىشىندە اۋىلداردىڭ بارلىق ينفراقۇرىلىمىن جاڭارتۋ, 7 مىڭ شاقىرىمنان استام جولدى جانە اۋىلىشىلىك كوشەلەردى سالۋ جانە جوندەۋ تىرشىلىكتى قامتاماسىز ەتەتىن ينجەنەرلىك جەلىلەردى سالۋ, ساپالى اۋىز سۋمەن 100% قامتاماسىز ەتۋ, ءبىلىم بەرۋ, دەنساۋلىق ساقتاۋ, مادەنيەت جانە سپورت وبەكتىلەرىن رەكونسترۋكتسيالاۋ جانە سالۋ, سونىمەن قاتار 130 مىڭ جاڭا جۇمىس ورىندارىن قۇرۋ ارقىلى 7 ملن-عا جۋىق اۋىل تۇرعىندارىنىڭ تۇرمىس ساپاسىن جاقسارتۋ كۇتىلىپ وتىرعانىن اتاپ ءوتتى.
ۇكىمەت باسشىسى «اۋىل – ەل بەسىگى» جوباسىن قارجىلاندىرۋدى ۇلعايتۋ تۋرالى ۇسىنىستاردى ەنگىزۋدى, جىلدار بويىنشا توپتاستىرىپ جانە قاجەتتى قارجىلاندىرۋ كولەمىمەن تىرەك جانە سپۋتنيكتىك اۋىلدىق ەلدى مەكەندەردىڭ ءتىزىمىن قايتا قاراۋدى, سونداي-اق اعىمداعى جىلدىڭ سوڭىنا دەيىن 2020-2026 جىلدارعا ارنالعان جاڭارتىلعان «اۋىل – ەل بەسىگى» جوباسىن دايىنداۋدى تاپسىردى.
شىعىنداردىڭ 70%-ى رەسپۋبليكالىق بيۋدجەتتەن قارجىلاندىرىلاتىن بولادى. وڭىرلەردىڭ اكىمدىكتەرىنە شىعىنداردىڭ قالعان 30%-ىن بىرلەسىپ قارجىلاندىرۋ كوزدەرىن انىقتاۋ تاپسىرىلدى. سونىمەن قاتار, جوبالاردى جۇزەگە اسىرۋ ءۇشىن بيۋدجەتتەن تىس قاراجات تارتۋ, قاجەتتى قۇجاتتامانى دايىنداۋ جانە ءاربىر تىرەك جانە سپۋتنيكتىك اۋىلدىق ەلدى مەكەن ءۇشىن ەكونوميكانى دامىتۋ جوسپارلارىن ازىرلەۋ قاجەت.