الماتىدا ەلىمىزدىڭ 10 وبلىسىنان كەلگەن 40 وقۋشى بي-شەشەندەردىڭ تولعاۋلارىن جاتقا ايتىپ جارىستى. بيىل ەكىنشى جىل قاتارىنان ءوتىپ جاتقان بايقاۋدىڭ باستى ماقساتى – وقۋشىلاردى كىتاپ وقۋعا, جان-جاقتى ىزدەنۋگە ۇيرەتۋ. بۇل اقپاراتتى الماتى قالاسى اكىمدىگى ءباسپاسوز ءبولىمى تاراتتى.
جارىستا شەشەندىك تولعاۋدى جاتقا ايتۋدان بولەك, كەز كەلگەن جەرىنەن ءىلىپ اكەتۋ قاجەت. ۇيىمداستىرۋشىلار قاتىسۋشىلاردىڭ ەشقايسىسىن سىي-سياپاتسىز قالدىرمايمىز دەپ وتىر.
«احمەت بايتۇرسىنوۆ اتامىز «ونەر الدى – ءسوز ونەرى» دەيدى. سوندىقتان, ءبىز بۇگىن مىنە ۇرپاقتارىمىزدىڭ ءتىلىن, تەگىن بىلمەي جاتقان كەزدە مىنا بي-شەشەندەردىڭ كەرەمەت شەشەندىك سوزدەرىمەن وسىنداي جارىستار وتكىزىپ, ءبىر ءدۇر سىلكىندىرىپ ءسوز مادەنيەتىن قالىپتاستىرىپ, ءتىل تازالىعىن ساقتاۋ ماقساتىندا وسى ء«دىلمار» شەشەندىك ونەر بايقاۋىن وتكىزىپ وتىرمىز», – دەدى الماتى قالاسى اباي اتىنداعى رەسپۋبليكالىق مامانداندىرىلعان دارىندى بالالارعا ارنالعان قازاق ءتىلى مەن ادەبيەتىن تەرەڭدەتە وقىتاتىن ورتا مەكتەپ-ينتەرناتتىڭ ديرەكتورى روزا سەكسەنوۆا.
الماتى