قۇرلىقتىق حوككەي ليگاسىندا (قحل) سىنعا ءتۇسىپ جاتقان ەلوردانىڭ «بارىس» كلۋبى كەزەكتى تۋر ويىنىن «بارىس ارەنادا» وتكىزىپ, ماسكەۋدىڭ تسسكا كومانداسىنا ءىرى ەسەپپەن ەسە جىبەردى.
ەكى كوماندا اراسىنداعى كەزدەسۋدىڭ ءبىرىنشى كەزەڭى تەڭ اياقتالدى. شابۋىلشىلار تابلوداعى ناتيجەنى وزگەرتۋگە قانشا تىرىسقانىمەن, قورعاۋشىلار مەن قاقپاشىلار ءساتتى ونەر كورسەتتى. دەي تۇرعانمەن «بارىس ارەناعا» جينالعان 11 مىڭعا جۋىق جانكۇيەر ويىننىڭ ەكىنشى جانە ءۇشىنشى كەزەڭىندە ءۇش گولدىڭ كۋاسى بولدى. ەكىنشى كەزەڭنىڭ سوڭعى مينۋتىندا بوگدان كيسەلەۆيچ «بارىس» قاقپاشىسى ەدۆارد پاسكۋالەنى سان سوقتىرىپ, كومانداسىن العا شىعاردى.
كەزدەسۋدىڭ ءۇشىنشى كەزەڭى وتە تارتىستى باستالدى. ماتچتىڭ 52-مينۋتىندا ميحايل گريگورەنكو مەرگەندىگىمەن كوزگە ءتۇسىپ, ەسەپتى ەسەلەسە, 58-مينۋتتا كيريلل كاپريزوۆ ويىنداعى سوڭعى ءارى كومانداسىنىڭ جەڭىس شايباسىن سوقتى. قورىتىندى ەسەپ – 0:3. 24-تۋردان كەيىن «بارىس» تۋرنير كەستەسىندە 30 ۇپايمەن ءتورتىنشى ورىندا كەلەدى. جەرلەستەرىمىز كەلەسى كەزدەسۋىن 12 قاراشادا «سەۆەرستال» كلۋبىمەن وتكىزەدى.