بۇگىن نۇر-سۇلتان قالاسىندا قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگى KPMG Kazakhstan كومپانياسىمەن بىرلەسىپ ەلىمىزدە تۇڭعىش رەت كومپلاەنس-وفيتسەرلەر فورۋمىن وتكىزدى. بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ ءباسپاسوز قىزمەتى حابارلادى.
ءىس-شاراعا رەسپۋبليكانىڭ بارلىق وڭىرىنەن كومپلاەنس-وفيتسەرلەر جينالدى. اگەنتتىك توراعاسى اليك شپەكباەۆ, پارلامەنت ءماجىلىسىنىڭ دەپۋتاتى گۇلنار بيجانوۆا, حالىقارالىق جانە كوممەرتسيالىق ەمەس ۇيىمداردىڭ باسشىلارى ءسوز سويلەدى.
كومپلاەنس باقىلاۋ تۇسىنىگى ەۋروپا ەلدەرىندە كەڭ دامىعان. شەتەلدىك كومپانيالار ءۇشىن كومپلاەنس - بۇل كومپانيانىڭ سىبايلاس جەمقورلىققا قارسى حالىقارالىق تالاپتارعا قانشالىقتى سايكەس كەلەتىنىن باعالايتىن ولشەمدەر جيىنتىعى. ەلدەگى وسى ينستيتۋتتىڭ دامۋى بويىنشا ەلدىك تاۋەكەلدەر باعالانادى. كومپلاەنس قىزمەتى كورپوراتيۆتىك سەكتور اراسىندا پاراساتتى ورتانى قالىپتاستىرۋداعى ماڭىزدى قۇرال بولىپ تابىلادى. ورتاق بيزنەستى جۇرگىزۋ ءۇشىن سەرىكتەستىكتى تاڭداۋ كەزىندە حالىقارالىق بيزنەس ورتادا جالپى قابىلدانعان قۇندىلىقتاردى ۇستاناتىندارمەن ىنتىماقتاستىققا باسىمدىق بەرىلەدى.
وتاندىق كاسىپورىنداردىڭ الەمدىك نارىققا شىعۋى جانە شەتەلدىك كومپانيالاردىڭ كەلىسىم-شارت جاساسۋعا مۇددەلىلىگى ولاردىڭ كومپانياعا, اتاپ ايتقاندا, ەلگە دەگەن سەنىمىنە تىكەلەي بايلانىستى. ياعني, كومپانيادا دۇرىس قۇرىلعان كومپلاەنس باقىلاۋ بيزنەس قۇرۋداعى سانالى شەشىمدى كورسەتەدى. ونىڭ ماقساتى سىبايلاس جەمقورلىقتىڭ ىشكى جانە سىرتقى تاۋەكەلدەرىنە قارسى تۇرۋ.
كومپلاەنستىڭ مىندەتتەرى - كوممەرتسيالىق ۇيىمداردىڭ سىبايلاس جەمقورلىقتىڭ الدىن الۋعا باعىتتالعان قولدانىستاعى زاڭداردى, ەرەجەلەر مەن ستاندارتتاردى ساقتاۋى ارقىلى كومپانيالاردىڭ, ينۆەستورلاردىڭ, كليەنتتەردىڭ, قىزمەتكەرلەردىڭ مۇددەلەرىن قورعاۋ.
اگەنتتىك توراعاسى اليك شپەكباەۆ ءوز سوزىندە كومپلاەنستىڭ ەڭ باستى مىندەتى – وڭىرلەردەگى سىبايلاس جەمقورلىقتىڭ الدىن الۋ ەكەنىن اتاپ ءوتتى.
جۇمىسقا قابىلداۋ, كورپوراتيۆتىك سەكتوردا ساتىپ الۋدى جۇرگىزۋ بارىسىندا ادىلدىكتى, اشىقتىقتى قامتاماسىز ەتۋدى باقىلاۋ ەلدەگى تۇرمىستىق سىبايلاس جەمقورلىقتى جويۋدىڭ اجىراماس بولىگى.
مەملەكەتتىك ورگاندارمەن ءوزارا ءىس-قيمىل جاساۋ كەزىندە ولاردىڭ قىزمەتكەرلەرىنىڭ سىبايلاس جەمقورلىق قۇقىق بۇزۋشىلىقتارىن جاساۋ مۇمكىندىگىمەن بايلانىستى بارلىق تاۋەكەلدەرىن الىپ تاستاۋ – كومپلاەنس-وفيتسەرلەردىڭ جاۋاپكەرشىلىك ايماعىنا مىندەتتى تۇردە كىرۋى كەرەك.
جىل سايىن كۆازيمەملەكەتتىك كومپانيالاردىڭ قىزمەتكەرلەرىنە قاتىستى جۇزدەگەن سىبايلاس جەمقورلىق قىلمىستار تىركەلەدى. تەك سوڭعى بەس جىلدا مۇنداي قۇقىق بۇزۋشىلىقتان كەلگەن شىعىن 16 ملرد تەڭگەنى قۇرادى, 660 قىلمىس تىركەلدى, 337 تۇلعا قىلمىستىق ىسكە تارتىلدى, 175 سوتتالدى.
اگەنتتىك وسىنى ەسكەرە وتىرىپ, كۆازيگوسسەكتورداعى سىبايلاس جەمقورلىقتى انىقتاۋ بويىنشا جۇمىستى كۇشەيتتى.
قازىرگى ۋاقىتتا سىبايلاس جەمقورلىق دەڭگەيىن تۇبەگەيلى ازايتۋعا باعىتتالعان سىبايلاس جەمقورلىققا قارسى رەفورمالاردىڭ جاڭا پاكەتىن دايىنداۋ بويىنشا جۇيەلى جۇمىس جۇرگىزىلۋدە.
سىبايلاس جەمقورلىق تاۋەكەلدەرىن انىقتاۋ جانە جويۋ ماسەلەلەرىن رەتتەيتىن كومپانيالاردا پاراساتتىلىقتىڭ كورپوراتيۆتىك ستاندارتتارىن ساقتاۋعا جاۋاپتى كومپلاەنس-وفيتسەرلەر ينستيتۋتىن ەنگىزۋ جاڭاشىل باستامانىڭ ءبىرى.
اگەنتتىكتىڭ باستاماسى بويىنشا زاڭناماعا قازاقستاندا سىبايلاس جەمقورلىققا قارسى كومپلاەنس جۇيەسىنىڭ تولىققاندى جۇمىس ىستەۋىنە قاجەتتى تۇزەتۋلەردى ەنگىزۋگە مەملەكەت باسشىسى مەن بارلىق مەملەكەتتىك ورگاندار قولداۋ كورسەتتى.
ەلىمىزدىڭ قازىرگى سىبايلاس جەمقورلىققا قارسى ساياساتى الدىن الۋعا باسىمدىق بەرەدى جانە باستى سەرىكتەس – ازاماتتىق قوعام يستيتۋتىنىڭ, سونىمەن قوسا جاۋاپتى بيزنەستىڭ ايقىن بەينەسىن قالىپتاستىرادى.
فورۋمدى وتكىزۋ پاراساتتى بيزنەستى قالىپتاستىرۋداعى كەزەكتى قادام بولىپ تابىلادى. فورۋمدا كومپلاەنس-وفيتسەرلەردى بىرىكتىرۋ ماقساتىندا اقپارات الماسۋ ءۇشىن «whatsapp چات» قۇرۋ, سىبايلاس جەمقورلىققا قارسى قىزمەتكە مودەراتور بولۋ ۇسىنىلدى. فورۋم دەلەگاتتارى كورپوراتيۆتىك سەكتوردا سىبايلاس جەمقورلىققا قارسى ورتانى قالىپتاستىرۋ بويىنشا «انتيكوردىڭ» كۇش-جىگەرىن جوعارى باعالادى.
ەندى, قازاقستاندا كومپلاەنس-وفيتسەرلەر سىبايلاس جەمقورلىققا قارسى قىزمەتپەن بىرلەسىپ بيزنەس جۇرگىزۋدىڭ ەتيكالىق ستاندارتتارىن, الەۋمەتتىك جاۋاپكەرشىلىكتى ارتتىرۋ جانە بيزنەس ورتادا سىبايلاس جەمقورلىق تاۋەكەلدەرىن تومەندەتۋ بويىنشا جۇمىس ىستەيتىن بولادى.
بيزنەستىڭ سىبايلاس جەمقورلىققا قارسى ءىس-قيمىلعا ادال قاتىسۋى قابىلداناتىن شارالاردىڭ تابىستىلىعىن ايقىندايدى.
ءىس-شارا سوڭىندا 2015-2025 ج. ارنالعان سىبايلاس جەمقورلىققا قارسى ستراتەگيانى جۇزەگە اسىرۋ اياسىندا سىبايلاس جەمقورلىقتىڭ الدىن الۋدا جانە وعان قارسى ءىس-قيمىلدا كومپلاەنس-وفيتسەردىڭ ءرولىن كۇشەيتۋ بويىنشا ۇسىنىستار ازىرلەندى.