تسيفرلاندىرۋ سالاسىنداعى الەمدىك ساراپشىلار باس قوسىپ, Big Data- اۋقىمدى دەرەكتەردى وڭدەۋ سالاسىن دامىتۋدىڭ وزەكتى ماسەلەلەرىن تالقىلادى. بۇل تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆ توراعالىق ەتكەن حالىقارالىق ساراپشىلار كەڭەسىنىڭ الاڭىندا ءوتتى. بۇل تۋرالى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ ءباسپاسوز قىزمەتى حابارلادى.
اۋقىمدى دەرەكتەردى وڭدەۋ ماسەلەسىندە عىلىمي-تەحنيكالىق, ساياسي كوزقاراستى زەرتتەۋمەن اينالىساتىن الەمدەگى جەتەكشى ۇيىمداردىڭ وكىلدەرى بۇل سالاداعى بارلىق پروبلەمالاردى اشىق كورسەتىپ, ولاردىڭ شەشۋ جولدارىن ۇسىندى.
مىسالى, ۇلىبريتانيانىڭ جاساندى ينتەللەكت بويىنشا پارلامەنتتىك توبىنىڭ توراعاسى لورد تيم كلەمەنت دجونس مالىمەتتەردى ساقتاۋدىڭ ماڭىزدىلىعىن اتاپ ءوتتى. «دەربەس دەرەكتەردى قورعاۋ – بۇگىنگى كۇننىڭ وزەكتى ماسەلەسى. ازاماتتاردىڭ ينتەرنەتتەگى دەربەس دەرەكتەرى رەتتەلمەيدى. سول سەبەپتى, جەكە دەرەكتەردىڭ ساقتالۋىنا باقىلاۋدى كۇشەيتۋ وتە ماڭىزدى», - دەدى ساراپشى.
دۇنيەجۇزىلىك بانكتىڭ تسيفرلىق دامۋ تاجىريبەسىنىڭ جەتەكشىسى دجەين ترەدۆەل تابىستى شەشىمدەر قابىلداۋ ءۇشىن ادامي كاپيتالدى دامىتۋدىڭ ماڭىزدىلىعىن ايتتى. «دەرەكتەردى ساقتاۋ ماسەلەلەرىن رەتتەيتىن زاڭنامالىق اكتىلەر كۇردەلى. سوندىقتان اۋقىمدى دەرەكتەرمەن جۇمىس ىستەۋ كەزىندە تاۋەكەلدەردى ناقتى ەسەپتەۋ ءۇشىن ەڭ الدىمەن تسيفرلىق تەحنولوگيالار نارىعىن ناتيجەلى زەردەلەيتىن ساۋاتتى كادرلار قاجەت», - دەيدى دجەين ترەدۆەل.
بۇۇ-نىڭ تسيفرلىق ۇكىمەت جونىندەگى كونسالتينگتىك فيرمانىڭ پرەزيدەنتى جانە ەلەكتروندى ۇكىمەت جانە اقپاراتتى باسقارۋ ماسەلەلەرى جونىندەگى باس كەڭەسشىسى ريچارد كەربيدىڭ پىكىرىنشە, «دەرەكتەردى دەربەس ساناتقا جاتقىزۋ ماسەلەسىندە ناقتى تۇسىنىكتىڭ بولماۋى دا – تالقىلاناتىن ماڭىزدى پروبلەمالاردىڭ ءبىرى».
ساراپشىلار «اۋقىمدى دەرەكتەردى» ساقتاۋ مەن وڭدەۋدىڭ دامۋ جولدارىنا قاتىستى ۇسىنىستارىن ءبىلدىرىپ, كۇش-جىگەر مەن مۇمكىندىكتەردى بىرىكتىرۋ قاجەت دەگەن ورتاق پىكىرگە كەلگەنىن ايتىپ وتكەن ءجون. كوللابوراتسيا الەمدىك قاۋىمداستىق كوزدەگەن ناتيجەگە, اتاپ ايتقاندا – دەربەس دەرەكتەردى جان-جاقتى قورعاۋ مەن قاۋىپسىزدىكتى قامتاماسىز ەتۋگە قول جەتكىزۋگە مۇمكىندىك بەرەدى.
اسقار جۇماعاليەۆ, ءوز كەزەگىندە, كەڭەس مۇشەلەرىنە ولاردىڭ ۇسىنعان يدەيالارى مەن باستامالارى ءۇشىن العىس ءبىلدىرىپ, ساراپشىلاردىڭ ۇسىنىستارى Big Data-مەن ودان ءارى جۇمىس ىستەۋ كەزىندە ەسكەرىلەتىنىنە سەندىردى.
«قازاقستان اۋقىمدى مالىمەتتەر سالاسىندا بەلسەندى جۇمىس ىستەۋگە نيەتتى. ءتيىستى زاڭنامالىق بازانى ازىرلەپ, جاساندى ينتەللەكتپەن جۇمىس ىستەۋ بويىنشا بىرقاتار يننوۆاتسيالىق جوبالاردى ەنگىزەتىن بولامىز. سوندىقتان ءسىزدىڭ ۇسىنىستارىڭىز ءبىزدىڭ جۇمىسىمىزدى وڭتايلاندىرۋعا سەپتىگىن تيگىزبەك. ءبىز سىندارلى يدەيالار مەن تاجىريبە الماسۋ ءۇشىن اشىقپىز», - دەپ تۇيىندەدى اسقار جۇماعاليەۆ.
سونىمەن قاتار فورۋم اياسىندا اسقار جۇماعاليەۆ بۇۇ-نىڭ ەلەكتروندىق ۇكىمەت جانە اقپاراتتى باسقارۋ ماسەلەلەرى جونىندەگى بۇرىنعى باس كەڭەسشىسىمەن, سونداي-اق AngelsLabs, ACME جانە bValue Angels VC شەتەلدىك ۆەنچۋرلىك كومپانيالاردىڭ باسشىلارىمەن كەلىسسوزدەر جۇرگىزدى. كەزدەسۋ بارىسىندا قازاقستان ەكونوميكاسىنىڭ ينۆەستيتسيالىق تارتىمدىلىعى, ىنتىماقتاستىقتىڭ ءوزارا ءتيىمدى جولدارى جانە قازاقستانداعى يننوۆاتسيالىق ەكوجۇيەنى ودان ءارى دامىتۋ ماسەلەلەرى تالقىلاندى.