ورالدا پوليتسيا قىزمەتكەرى سۋيتسيد جاساماق بولعان قىزدى قۇتقاردى

-كەزەكشىلىكتەن شىققان سوڭ قىزىمدى تەاترعا, بي سايىسىنا الىپ باردىم. ءتۇس كەزىندە ۇيگە قاراي شىققانبىز. كولىگىمدە انام مەن قىزىم بولدى. شاعان كوپىرىنەن ءوتىپ بارا جاتقاندا بويجەتكەن قىزدىڭ جانىنان ءوتىپ كەتتىم. بىرنەشە سەكۋندتان كەيىن اينادان قاراسام, بويجەتكەن ءبىر اياعىن كوپىردىڭ قورشاۋ كەرمەسىنە سالىپ تۇر ەكەن. وقىس وقيعا بولاتىنىن بىردەن سەزدىم. كوپىردەن شىعا بەرە توقتاپ, كەيىن جۇگىرگەنىمدە, كوپىر ۇستىندە ەشكىم جوق ەدى. قىز سەكىرىپ كەتكەن ەكەن, - دەيدى ەركەبۇلان.

ۇزىن بويلى, قايىڭقاپتال, ات جاقتى, قاباقتى كەلگەن وتىز جاسار جىگىتتىڭ تۇلا بويىندا ءبىر ءتۇيىر ارتىق ەت جوق. باتىس قازاقستان وبلىستىق پوليتسيا دەپارتامەنتىنىڭ ارنايى ءبولىم قىزمەتكەرى بولعاندىقتان باتىر ازاماتتى فوتوعا تۇسىرۋگە دە, اتى-ءجونىن تولىق جازۋعا دا بولمايدى ەكەن. بىراق ەركەبۇلان بولعان وقيعانى ەگجەي-تەگجەيلى ايتىپ, سۇراقتارىمىزعا تولىق جاۋاپ بەردى.

...جۇگىرىپ كەلە جاتىپ شەشىنگەن ەركەبۇلان سۋ جاعاسىنا جەتكەندە جاعادا ءۇرپيىسىپ تۇرعان بىرنەشە بالىقشىنى كورەدى. ويلانباستان سۋعا سەكىرىپ, وزەننىڭ ورتاسىنا, قىز قۇلاعان جەرگە ءجۇزىپ جەتكەندە, بويجەتكەننىڭ دەنەسى سۋ بەتىندە قالقىپ تۇر ەكەن. شاشى جايىلىپ, ەكى قولى ەكى جاعىنا كەتكەن. تىرشىلىك بەلگىسى بىلىنبەيدى. قىزدى شاشىنان ۇستاپ جاقىن جەردەگى كوپىردىڭ تىرەك ۇستىنىنا قاراي ءجۇزدى. سۋ تەرەڭ ەكەن, اياعى تيمەدى. بەتون تاقتاعا جاقىنداپ كەلىپ, ءبىر قولىمەن تىرمىسىپ, ءوزى شىقتى. سوسىن قىزدى دا تارتىپ, سول تسەمەنت الاڭشاعا شىعارىپ الدى. بىردەن جاساندى دەمالدىرۋعا, العاشقى مەديتسينالىق كومەك كورسەتۋگە كىرىستى.

-جاعاداعى بالىقشىلارعا دارىگەر مەن پوليتسيا شاقىرىڭدار دەپ ايقايلادىم. ولار وعان دەيىن دە حابارلاپ قويعان ەكەن. قىز ەداۋىر سۋ جۇتىپتى, كەۋدەسىن باسىپ, تىنىس جولدارىن تازالادىم. ەسىن جيناپ, الاقتاعان بويجەتكەن «مەن قايدامىن؟ مەن ءولدىم بە؟!» دەپ ساندىراقتاي بەردى, - دەيدى ەركەبۇلان.

كەشىكپەي قۇتقارۋشىلار جاساعى دا, جەدەل جاردەم دە جەتكەن. بويجەتكەندى ارنايى كەۋدەشە كيگىزىپ, قايىقپەن سۋدان شىعارىپ الدى. ەندى ونىڭ ومىرىنە تونگەن قاۋىپ جوق ەدى.

-ەركەبۇلان بۇل وقيعا كەزىندە كاسىبي تۇرعىدان وتە دۇرىس ارەكەت ەتتى. ءبىز ارناۋلى بولىمشە جاۋىنگەرلەرىن ءتۇرلى جاعدايعا دايىندايمىز, سونىڭ ىشىندە سۋدان قۇتقارۋ, سۋ ىشىندە ارەكەت ەتۋ ادىستەرى بار. ەركەبۇلان وقۋ-جاتتىعۋ ساباعىن دۇرىس مەڭگەرگەنىن كورسەتتى. ەڭ الدىمەن قۇتقارۋعا جۇگىرگەندە كيىمىن شەشىپ ۇلگەرگەن. ايتپەسە, سۋعا كەتىپ بارا جاتقان ادام ءوزىن قۇتقارۋشىنىڭ كيىمىنە جارماسىپ, ءتۇرلى قايعىلى وقيعالار ءجيى بولادى. ەكىنشىدەن, قىزعا جەتكەن سوڭ بىردەن جاعاعا سۇيرەمەي, ەڭ جاقىن جەردەگى قۇرىلىققا جەتكىزۋى دە وتە دۇرىس بولعان. ويتكەنى, قىز جاعاعا جەتكەنشە ءولىپ كەتۋى دە مۇمكىن ەدى. وعان قوسا, سۋ وتە سالقىن, 8-9 گرادۋس, ەركەبۇلاننىڭ ءوزى دە ءسىڭىرى تارتىلىپ, جاعاعا جەتە الماي قالۋ قاۋپى بولدى. سوندىقتان بولعان وقيعادا وتە جەدەل ءارى كاسىبي تۇرعىدا ەڭ دۇرىس شەشىم قابىلداپ, ادام ءومىرىن قۇتقارعان جاۋىنگەرىم ءۇشىن ماقتانىپ تۇرمىن, - دەيدى ارانۋلى جاساق ءبولىمىنىڭ كومانديرى, پودپولكوۆنيك ج.قازماعامبەتوۆ.

ء«وز ارەكەتىمدى ەرەكشە ەرلىك دەپ ويلامايمىن. مەنىڭ ورنىمدا بولعان كەز كەلگەن پوليتسيا قىزمەتكەرى وسىلاي جاسار ەدى» دەيدى ەركەبۇلان.

بقو پوليتسيا دەپارتامەنتى ءباسپاسوز قىزمەتىنىڭ جەتەكشىسى پولكوۆنيك بولاتبەك بەلگىبەكوۆتىڭ ايتۋىنشا, 2019 جىلدىڭ باسىنان بەرى باتىس قازاقستان وبلىسىندا 130 سۋيتسيد وقيعاسى تىركەلسە, 47 ادام وزىنە ءوزى قول سالىپ قازا تاپقان.