تاراز قالاسىندا ەل كوپتەن كۇتكەن «Aspara Fashion week TARAZ – 2019» ءسان اپتالىعى ءوتىپ, وعان ەۋروپا مەن ازيادان 15-تەن استام سالا ساراپشىلارى مەن الەمنىڭ 10 مەملەكەتىنەن تانىمال ديزاينەرلەر قاتىستى.
تاراز توپىراعىنا كەلگەن ديزاينەرلەردىڭ ىشىندە «Milano fashion week» پرەزيدەنتى مارياننا ميچەلي, ميلاندىق فەشن-فوتوسۋرەتشى داگلاس باسسەت, امستەردامدىق ەتنيكالىق ءسان اپتالىقتارىنىڭ ۇيىمداستىرۋشىسى, «Asia fashion week» جانە «Africa fashion week» ءسان اپتالىقتارىنىڭ پرەزيدەنتى ايدىن اچيك, بىشكەك قالاسىنان كەلگەن ءسان ساراپشىسى ناتاليا سۋلتانوۆا, قىرعىزستاننىڭ «Podium» جۋرنالىنىڭ باسشىسى نازيرا بەگىم, ەتنوديزاينەرلەردىڭ ەۋرازيالىق قاۋىمداستىعىنىڭ ءتورايىمى روزا حالتۋەۆا, «Libos» ديزاين ورتالىعىنىڭ باسشىسى, وزبەكستان ءسان اپتالىعىنىڭ سەرىكتەسى كامولا گۋلياموۆا, ۋكراينالىق ديزاينەر وكسانا حەندا, «ميسس بولگاريا – 2017» بايقاۋىنىڭ جەڭىمپازى مودەلەر, بلوگەر ۆەرونيكا ستەفانوۆا سياقتى بەلگىلى ازاماتتار بولدى.
بۇگىندە قازاقستانداعى ءسان الەمىندە «Aspara» برەندىنىڭ الاتىن ورنى ەرەكشە. وسى ۋاقىتقا دەيىن ءوتىپ كەلگەن «Aspara fashion week» ءسان اپتالىعىنىڭ ءتورتىنشى كەزەڭى تاعى دا تاراز شاھارىندا جالعاسىن تاپتى. اتالعان ءسان اپتالىعى وسى ۋاقىتقا دەيىن شىمكەنت, تاراز جانە وزبەكستاننىڭ تاشكەنت قالالارىندا ۇيىمداستىرىلعان بولاتىن. مۇنداي اۋقىمدى ءسان مەرەكەسىن ەلىمىزگە عانا ەمەس, ەۋروپاعا تانىمال ديزاينەر, «اسىل-ديزاين» ءسان ءۇيى مەن «اسپارا» مودەلدىك ونەر جانە بيزنەس كوللەدجىنىڭ نەگىزىن قالاۋشى ايدارحان قاليەۆ ۇيىمداستىردى.
تاراز قالاسىنداعى «بالاساعۇن» ورتالىق كونتسەرت زالىندا وتكەن شارادا اۋەلى وبلىستىق قولونەر بۇيىمدارىنىڭ بايقاۋىندا وزا شاپقان تالانتتار ماراپاتتالدى. بايقاۋ بارىسىندا ءتۇرلى تابيعي جانە جاساندى زاتتاردان جاسالعان حالقىمىزدىڭ ەجەلگى سالت-داستۇرلەرىن دارىپتەيتىن بۇيىمدار قازىلار القاسىنىڭ قىزىعۋشىلىعىن تۋدىردى. ء«بىز جاستاردى مادەني جانە ۇلتتىق قۇندىلىقتاردى دارىپتەۋگە شاقىرۋ جولىندا قىزمەت ەتىپ كەلەمىز. كوللەدجدى قۇرعان 20 جىل ىشىندە ءبىز 1500-گە جۋىق تالانتتى ديزاينەر, شاشتاراز, ۆيزاجيس, ستيليس مەن مودەلەردى تاربيەلەدىك. ولاردىڭ بارلىعى بۇگىندە تارازدى رەسپۋبليكالىق جانە حالىقارالىق دەڭگەيدە تانىتىپ كەلەدى», دەيدى ايدارحان قاليەۆ. ال, «Arai Plaza» بيزنەس ورتالىعىنىڭ سالتانات سارايىندا وتكەن ءسان اپتالىعىنىڭ العاشقى كۇنىندە ديزاينەرلەر نەوفولكلور ستيلىندە ازىرلەگەن توپتامالارىن ءسان ساراپشىلارىنىڭ نازارىنا ۇسىندى. اتالمىش سىننان سۇرىنبەي وتكەن تالانتتار ۇلتتىق ناقىشتاعى كيىمدەردى الەمگە اشىق ەكسپورتتاۋعا مۇمكىندىك الادى.
ءسان اپتالىعى كەزىندە كەلۋشىلەر ايدارحان قاليەۆتىڭ «تاراز پەرىلەرى» توپتاماسىنىڭ تانىستىرىلىمىن تاماشالادى. توپتامانىڭ باستى نىشانى رەتىندە قازاق حالقى قاسيەت تۇتقان انا كيمەشەگى تاڭدالدى. نەوفولكلور باعىتىن تەك ورتالىق ازياعا عانا ەمەس, كۇللى الەمگە تانىتقان ديزاينەردىڭ تۋىندىلارىنا مارتەبەلى مەيماندار ەرەكشە نازار اۋداردى. ال «اسىل-ديزاين» ءسان ءۇيىنىڭ باسشىسى ايدارحان قاليەۆ بۇل توپتامانى ازىرلەۋدە قازاق ايەلدەرىنىڭ, ونىڭ ىشىندە ءوز اناسىنىڭ كيىم ۇلگىلەرىنەن شابىت العانىن ايتادى. «اسىل-ديزاين» ءسان ءۇيىنىڭ بۇلاي اتالۋى تەگىن ەمەس. اسىل – مەنىڭ انامنىڭ ەسىمى. ال كيمەشەك – قازاق انالارىنىڭ باس كيىمى. كيمەشەك كيۋدىڭ ءوز جورالعىسى, وزىنە ءتان ەرەكشەلىگى, كيەسى بار. بۇل ءبىزدىڭ ۇلتىمىزدىڭ دۇنيەتانىمى وتە تەرەڭ ەكەنىن اڭعارتادى. كەلەشەكتە الداعى 5-6 جىلدىڭ ىشىندە زاماناۋي ستيلدەگى كيمەشەكتەر ەۋروپادا ترەندكە اينالسا, مەن ءاۋ باستاعى ماقساتىما جەتتىم دەپ بىلەمىن», دەيدى ايدارحان قاليەۆ. سونىمەن قاتار كورشىلەس قىرعىز ەلىنەن كەلگەن ديزاينەر تاتيانا ۆوروتنيكوۆا كوپشىلىكتى ەرەكشە باس كيىمدەرىمەن تاڭعالدىرسا, نۇرسۇلتاندىق مودەلەر ءاليا ساعديدىڭ توپتاماسىندا قانىق تۇستەر مەن فلوريستيكالىق ەلەمەنتتەر كورىنىس تاۋىپ, كوپشىلىكتىڭ كوزايىمىنا اينالدى. ۋكراينانىڭ لۆوۆ قالاسىنان كەلگەن ناتاليا يارۋش ءوز توپتاماسىندا سلاۆيان حالقىنىڭ قاراپايىم ءارى ۇيلەسىمدى ورنەكتەرىن قولدانعان بولسا, ۆارشاۆالىق باربارا ءساليدىڭ توپتاماسىندا تەرىدەن تىگىلگەن كيىمدەر مەن شىلتەر باسىم ءتۇستى. الەمنىڭ ءار قيىرىنان كەلگەن وزگە دە سانگەرلەر وزدەرىنە ءتان ەرەكشەلىكتەرىمەن كەلۋشىلەردى تاڭداندىردى.
ء سان الەمى ساڭلاقتارىنىڭ نازارىن تاراز شاھارىنا اۋدارعان حالىقارالىق شارانىڭ قورىتىندى بولىمىندە «Neo folklore» بايقاۋىندا ۇزدىك دەپ تانىلعان ديزاينەرلەرگە قازىلار القاسىنىڭ مۇشەلەرى الەمنىڭ ەڭ ۇزدىك سانالاتىن ءسان اپتالىقتارىنا ارنايى جولداما تابىستادى. اتاپ ايتقاندا, الماتىلىق راۋشان انۋاربەكوۆا ميلانداعى, قىزىلوردالىق ايدا كەرىمقۇلوۆا سەربياداعى, تارازدىق قارلىعاش ەسبولعانوۆا مەن اسەم مۋسراليەۆا امستەردامداعى, كورشىلەس قىرعىزستاننان كەلگەن ماقسات سمانوۆ پەن بولوتبەك اليشەروۆ كاپپادوكياداعى, نۇرسۇلتاندىق دانا اشيموۆا دەليدەگى ءسان اپتالىقتارىنا جانە بولگاريادان كەلگەن جاس سانگەر تانيا يان كەلەسى جىلعى «Aspara fashion week» ءسان اپتالىعىنا تەگىن قاتىسۋعا مۇمكىندىك الدى. ءوز كەزەگىندە قورىتىندى ءسوز العان ايدارحان قاليەۆ مۇنداي ءسان اپتالىعىن ەلىمىزدە ءارى قاراي دا ءداستۇرلى تۇردە ۇيىمداستىرىلا بەرەتىنىن جەتكىزدى. «مەن ەكى مىڭ جىلدىق تاريحى تەرەڭگە تامىر تارتقان تارازدى ەرەكشە سۇيەمىن. ءوز حالقىمنىڭ ۇلتتىق نەگىزىن ساقتاۋ جولىندا وسى كاسىپتى قولعا الىپ, ءسان سالاسىندا بەلگىلى دارەجەدە ابىرويعا يە بولدىم. بۇل – تەك مەنىڭ عانا ەمەس, «اسىل-ديزاين» ءسان ءۇيىنىڭ, «اسپارا» كوللەدجى قىزمەتكەرلەرىنىڭ ەڭبەگى», دەدى ول ءوز سوزىندە. سونىمەن قاتار يتاليادان كەلگەن مارياننا ميچەلي قازاقتىڭ ۇلتتىق كيىمدەرىنە قىزىعاتىنىن, سوندىقتان دا قازاقستانعا ءجيى كەلەتىنىن ايتسا, ميلاندىق فەشن-فوتوسۋرەتشى داگلاس باسسەت تارازعا ءار كەلگەن سايىن كونە شاھاردىڭ تابيعاتى تامساندىراتىنىن جەتكىزدى. وزگە دە سانگەرلەر قازاق حالقىنا, تاراز قالاسىنا دەگەن يگى تىلەكتەرىن جولدادى.
تاراز