اقىننىڭ 140 جىلدىعىنا ارنالعان دوڭگەلەك ۇستەل ءماجىلىسى ونىڭ تۋعان جەرى التىنسارين اۋدانىنداعى سيلانتەۆ اۋىلىنداعى مادەنيەت ورتالىعىندا ءوتتى. وعان بەلگىلى جۋرناليست قاجى قورعان, جۋرناليستيكا ارداگەرى, ۇلى وتان سوعىسىنىڭ ارداگەرى, اقىن قاسىمحان الدابەرگەنوۆ, اقىننىڭ نەمەرەسى مۇحامەتقالي شيپين جانە باسقالار قاتىستى.
قاسىمحان, قاجى اعايلار ومار ءشيپيننىڭ كوزىن كورگەن, ولەڭىن تىڭداعان. ولار تانىمدىق, تاعىلىمدى ەستەلىكتەر ايتتى.
«1959 جىلى مەن العاش رەت وبلىستىق اقىندار ايتىسىنا قاتىستىم. سوندا ومار اقساقال اعا اقىن بولدى. ول كىسى مەنىڭ ونەرىم تۋرالى جاقسى لەبىز ايتقان ەدى. ول مەنى قاناتتاندىردى. ول كىسىنى كورۋ, تىڭداۋ عانيبەت بولاتىن»-دەدى قاسىمحان اعاي جانە ءوز ارحيۆىندە ساقتالعان ەستەلىك سۋرەتتەردى اۋداندىق مۋزەيگە تابىس ەتتى.
ومار شيپين قازاقتىڭ ايتىس ونەرىنىڭ دامۋىنا ۇلەس قوسقان اقىن. ول 1943 جىلى الماتىدا وتكەن ءبىرىنشى جالپىقازاقستاندىق حالىق شىعارماشىلىعى وليمپياداسىنا قاتىسىپ, 2-ءشى ورىنعا يە بولادى. التىنسارين, امانگەلدى تۋرالى داستاندار جازادى. 2-4 سايلانعان قازاق جوعارعى كەڭەسىنىڭ دەپۋتاتى بولىپ سايلاندى.
ومار ءشيپيننىڭ نەمەرەسى مۇحامەتقالي شيپين اۋدان باسشىلارىنا راحمەتىن ايتا وتىرىپ, اتاسى تۋرالى قىزىقتى دەرەكتەر جەتكىزدى. «شيپين دەگەن اتامنىڭ ءوزىنىڭ جازۋى بويىنشا كەتتى. نەگىزى اتامنىڭ اتاسىنىڭ اتى شىمبولات»-دەدى مۇحامەتقالي. قاتىسۋشىلار ومار اتامىزدىڭ بەيىتىنە بارىپ, قۇران باعىشتادى.