تەننيس تارلاندارىنىڭ تەكەتىرەسى

اتى اڭىزعا اينالعان تەننيسشىلەر تمد ەلدەرى اراسىندا تۇڭعىش رەت قازاق­ستاندا ماتچ وتكىزدى. رافاەل نادال قازاق جەرىنە وسىمەن ەكىنشى رەت كەلسە, دجوكوۆيچ ەلىمىزگە العاش رەت تابان تىرەدى. يسپان تەننيسشىسى قازاق توپىراعىن ەڭ العاش 2014 جىلى باسقان بولاتىن. سول جىلى ول ەلوردادا وتكەن قايىرىمدىلىق تۋرنيرىنە قاتىسىپ, فرانتسيالىق جو-ۆيلفريد تسونگامەن شەبەرلىك بايقاسقان ەدى. ەرلەر اراسىنداعى الەمدىك رەيتينگتىڭ كوشىن باس­تاپ تۇرعان ەكى جۇلدىز قازاقستانعا كەلگەن ساپارى بارىسىندا بىرقاتار ماڭىزدى ءىس-شاراعا قاتىستى.

ەڭ الدىمەن ەكى تەننيسشى قازاقستاندىق باق وكىلدەرىنە ارنالعان ارنايى ءباسپاسوز ءماسليحاتىنا قاتىستى. جيىنعا قاتىسقان قازاقستان تەننيس فەدەراتسياسىنىڭ پرە­زيدەنتى بولات وتەمۇراتوۆ ەكى تەننيسشى اراسىنداعى كەزدەسۋدى وسىدان ءبىراز جىل بۇرىن جوسپارلاعانىن ايتتى.

–بۇل ماتچتى ۇيىمداستىرۋدى ەكى جىل بۇرىن ويلاستىرعان ەدىك. بىراق تەننيسشىلەردىڭ ۋاقىتىنىڭ تىعىزدىعىنا ءارى جاراقاتتارىنا بايلانىستى كەيىنگە قالدىرۋعا تۋرا كەلدى. ءبىزدى قىزىق ءارى تارتىستى ماتچ كۇتىپ تۇر. بۇل كۇن تەننيس اۋەسقويلارى ءۇشىن عانا ەمەس, بۇكىل قازاقستاندىقتار ءۇشىن ناعىز مەرەكە بولماق, – دەدى قازاقستان تەننيس فەدەراتسياسىنىڭ پرەزيدەنتى.

قازاقستانعا كەلگەنگە دەيىن دە ۇنەمى قايىرىمدىلىق شارالارىنا قاتىسىپ, ءوزى دە مۇقتاج جاندارعا كومەكتەسىپ جۇرەتىن رافاەل نادال مۇنداي ۇسىنىسقا بىردەن كەلىسكەنىن جەتكىزدى.

–ماعان سىزدەردىڭ ەلدەرىڭىزدەن قايىرىمدىلىق ماتچىن وتكىزۋگە ۇسىنىس تۇسكەندە ويلانباستان بىردەن كەلىسىمىمدى بەردىم. ءبىراز جىلدان بەرى قازاقستاندىق تەننيسشىلەردىڭ اياق الىسىن باقىلاپ كەلەمىن. سىزدەردىڭ ەلدەرىڭىزدە تەننيس سپورتى وتە قارقىندى دامىپ كەلەدى. وعان ميحايل كۋكۋشكيننىڭ, اندرەي گولۋبەۆتىڭ حالىقارالىق ارەناداعى جەتىستىگى دالەل بولا الادى. قازاقستان تەننيسىن ورگە سۇيرەپ جۇرگەن بولات وتەمۇراتوۆ مىرزاعا سۇلۋلىعىنا كوز تويمايتىن نۇر-سۇلتان قالاسىنا شاقىرعانىنا ەرەكشە العىس ايتامىن. ماتچ تۋرالى ايتار بولساق, قايىرىمدىلىق تۋرنيرىنە قاتىسۋ مەن ءۇشىن ۇلكەن باقىت. قازىرگى تاڭدا جاستاردى قولداۋ, ولارعا باعىت-باعدار بەرۋ وتە قاجەت دۇنيە, – دەيدى ر.نادال.

ءوز كەزەگىندە سەرب حالقىنىڭ وكىلى نوۆاك دجوكوۆيچ جيىلعان جۇرتپەن قازاق تىلىندە «سالەم» جانە ورىسشا «زدراۆستۆۋيتە» دەپ امانداسىپ, كەزدەسۋ جايلى ءوز ويىمەن ءبولىستى.

–قازاقستانعا, مىناداي سۇلۋ قالاعا العاش رەت كەلىپ وتىرمىن. ءبىزدىڭ سپورت ءۇشىن بولات وتەمۇراتوۆ سەكىلدى كىسىلەردىڭ قول­داۋ كورسەتكەنى ماڭىزدى. ال رافاەلگە مە­­نىمەن تاعى دا كورتقا شىعاتىنىنا ال­عىس ايتامىن, – دەپ ءسوزىن قىسقا قايىر­دى.

ءباسپاسوز جيىنىنان كەيىن رافاەل نادال مەن نوۆاك دجوكوۆيچ ەلوردا­مىز­داعى «ازىرەت سۇلتان» مەشىتىن, تاۋەلسىزدىك سارايىن, Haileybury Astana بريتانيالىق مەكتەبىن, نازارباەۆ ۋنيۆەرسيتەتتى, ۇلتتىق تەننيس ورتالىعىن, «استانا وپەرا» مەملەكەتتىك وپەرا جانە بالەت تەاترى مەن «بايتەرەك» مونۋمەنتىن تاماشالاپ, نۇر-سۇلتان قالاسىنداعى تەننيس ورتالىعىنىڭ سالتاناتتى اشىلۋىنا قاتىستى. ورتالىق ىشىندە 36 ادامعا ارنالعان قوناقۇي, 2 جاتتىعۋ زالى, 6 كيىم اۋىستىراتىن ورىن جانە ەڭ باستىسى 14 كورت (8-ءى جابىق, 5-ەۋى اشىق, 1-ەۋى جاعاجايلىق) بار.

نەگىزگى رەسمي ءىس-شارادان كەيىن قوس تەننيسشى 11 626 كورەرمەنگە ارنالعان «بارىس ارەنا» مۇزايدىنىندا جاس سپورت­شىلارعا ارنايى شەبەرلىك ساباعىن وتكىزدى. كەيىننەن دەنە قىزدىرۋ جاتتىعۋىن جاساپ, ەكەۋى وزدەرىنىڭ مەرەيلى 55-ءشى ماتچىنا كىرىسىپ كەتتى.

ەلوردا تورىندەگى وتكەن الەمنىڭ ەڭ مىق­تى دەگەن تەننيسشىلەرىنىڭ اراسىن­داعى عالامات كەزدەسۋ ءا دەگەننەن-اق تارتىستى باستالدى. ءبىر قاراعاندا ەكەۋى قايىرىمدىلىق تۋرنيرىندە ەمەس, «ۇلكەن دۋلىعا» نەمەسە «ماستەرس» ءتۋرنيرىنىڭ فينالىندا باس جۇلدەنى ساراپقا سالىپ جاتقانداي اسەر قالدىردى. العاشقى سەتتە سپورتشىلار 9 گەيم وينادى. ءبىرىنشى گەيمدە رافاەل جەڭىسكە جەتسە, ەكىنشى گەيمدە نوۆاك ەسەپتى تەڭەستىرىپ كەتتى. دەگەنمەن ماتچ بارىسىندا ەپتىلىگىمەن كوزگە تۇسكەن نادال ءبىرىنشى سەتتى ءوز پايداسىنا جازدى. ەسەپ – 6:3.

ەكىنشى سەتتە دە قوس تەننيسشى 9 گەيم وينادى. بىراق بۇل جولى دجوكوۆيچتىڭ مەرەيى ۇستەم بولدى. قايىرىمدىلىق ءتۋرنيرى اياسىنداعى ماتچ بولسا دا ەكى تەننيسشى جەڭىلگىسى كەلمەيتىنىن بىردەن اڭعارتتى. ەكىنشى سەتتىڭ بەسىنشى گەيمنەن كەيىن سەرب تەننيسشىسى 3:2 ەسەبىمەن الدا تۇردى. العاشقى سەتكە قاراعاندا نوۆاك بۇل جولى قاتەلىككە بوي الدىرماي جيناقى ويناپ, قالعان ءۇش گەيمدە دە باسىمدىق تانىتتى. ەكى سەتتە جەڭىمپاز انىقتالماعان سوڭ, تەننيسشىلەر چەمپيوندىق تاي-برەيك وينادى. قوسىمشا سەتتە نادال قارسىلاسىنان 11:9 ەسەبىمەن باسىم ءتۇسىپ, قايىرىمدىلىق ءتۋرنيرىنىڭ جەڭىمپازى اتاندى.

وسىلايشا ەكى تەننيسشىنىڭ اراسىنداعى 55-ءشى كەزدەسۋدە رافاەل نادالدىڭ مەرەيى ۇستەم بولدى. بۇعان دەيىنگى 54 ماتچتىڭ 28-ىندە نوۆاك دجوكوۆيچ جەڭىسكە جەتسە, 26 كەزدەسۋ رافاەل نادالدىڭ باسىمدىعىمەن اياقتالعان بولاتىن.

ءبىر ايتا كەتەرلىگى, رافاەل مەن نوۆاك كورتتا تەك تەننيس ويناپ قانا قويماي, ماتچتى تاماشالاۋعا كەلگەن جانكۇيەرلەردىڭ كوڭىل كۇيىن كوتەرۋ ءۇشىن, ولارعا ناعىز سپورتتىق مەرەكەنى سەزىندىرۋ ءۇشىن شوۋ ۇيىمداستىردى. اسىرەسە سەرب تەننيسشىسى سەت اراسىنداعى ۇزىلىستە بىرنەشە جانكۇيەردى كورتقا شىعارىپ, الەمدە ترەندكە اينالعان بيلەردى بيلەدى. سونداي-اق «بولبويعا» (تەننيسشىگە دوپ بەرىپ تۇرۋشى – رەد) دوپتى تاڭداۋ مۇمكىندىگىن بەرىپ, جەڭىسكە جەتكەن سوڭ «بولبويدى» قۇشاقتاپ, جەڭىسىن بىرگە تويلادى.

«بارىس ارەناعا» جينالعان كورەر­مەندەر قوس جۇلدىزدىڭ ونەرىنە ءسۇيسىنىپ, سپورت مەرەكەسىنەن تاماشا اسەر العانى راس. مۇنداي كەزدەسۋلەر بالالاردىڭ تەننيس سپورتىنا دەگەن سۇيىسپەنشىلىگىن ارتتىرىپ, جاستاردى سالاماتتى ءومىر سالتىن ۇستانۋعا ۇندەيدى. 

قايىرىمدىلىق تۋرنيرىنەن تۇسكەن قارجى بالالارعا ارنالعان ينكليۋزيۆتى الاڭدار سالۋعا جانە وبلىستارداعى اۋدان ورتالىقتارىندا تەننيس سپورتىن دامىتۋعا جۇمسالادى.