ەلوردادا 24-25 قازاندا «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ ۇيىمداستىرۋىمەن «مەكتەپ الەمىن وزگەرتەتىن ۇستازدار» اتتى XI حالىقارالىق عىلىمي-تاجىريبەلىك كونفەرەنتسياسى ءوتىپ جاتىر.
كونفەرەنتسيا قاتىسۋشىلارى قاتارىندا قازاقستاننىڭ ءار وڭىرىنەن كەلگەن مۇعالىمدەر, عالىمدار, ءبىلىم بەرۋ مەكەمەلەرىنىڭ باسشىلارى, سونىمەن قاتار اقش, ۇلىبريتانيا, يزرايل, نورۆەگيا, نيدەرلاندى, فرانتسيا, جاپونيا, سينگاپۋر, گونكونگ, ۆەتنام, اۆستراليا, يسپانيا, رەسەي, تۇركيا, ارمەنيا سەكىلدى 17 مەملەكەتتىڭ وكىلدەرى بار.
شارا بارىسىندا قالا اكىمى التاي كولگىنوۆ پەداگوگ ماماندىعى - قازىر الەمدەگى ەڭ ماڭىزدى ماماندىقتاردىڭ ءبىرى ەكەنىن اتاپ ءوتتى.
«ۇستاز-قوعامداعى باستى تۇلعا. پەداگوگ بالالاردى تاربيەلەپ, ءبىلىم بەرەدى. بالانىڭ تۇلعا بولىپ قالىپتاسۋىنا ۇلكەن سەپتىگىن تيگىزەدى. جاھاندىق الەمنىڭ ەڭبەك نارىعىندا بولىپ جاتقان ترانسفورماتسيالار ءاربىر مۇعالىمدى ء«ومىر بويى ءبىلىم بەرۋ» ءپرينتسيپىن ءتۇسىنۋدى جانە قابىلداۋدى تالاپ ەتەدى. مۇعالىمدەرىمىز ءاردايىم ءبىر-ەكى قادام الدا بولۋى كەرەك», - دەدى ا. كولگىنوۆ.
ال «نازارباەۆ زياكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما ءتورايىمى كۇلاش ءشامشيدينوۆا بايانداماسىندا ۇستازداردىڭ قانداي بولۋ كەرەكتىگىنە توقتالدى.
«مۇعالىمنىڭ دۇنيەتانىمى مەن وزىندىك سەزىنۋى باستى قوزعاۋشى كۇشتەردىڭ ءبىرى بولىپ تابىلادى. مۇعالىم ەڭ الدىمەن وزىنە-ءوزى سەنۋى ءتيىس. بارلىق بالالاردىڭ وقىپ, دامي الاتىنىنا, ارقايسىسىنىڭ وقۋ ناتيجەلەرىنىڭ جاقسارا الاتىنىنا سەنۋى كەرەك, ويتكەنى ونىڭ بارلىعى وزگەرمەلى. «بالانىڭ دەڭگەيى وسىدان ارتپايدى» دەپ ءبىر جاقتى باعالاۋعا بولمايدى. مۇعالىم ءوز ارەكەتتەرى ارقىلى وقۋشىعا ونى ءتۇسىنىپ, قولدايتىنىن كورسەتۋى ءتيىس», دەدى ك. ءشامشيدينوۆا
شارا بارىسىندا كەمبريدج ۋنيۆەرسيتەتىنىڭ بىلىم بەرۋ يننوۆاتسيالارى ورتالىعىنىڭ ديرەكتورى كوللين ماكلافلين, يزرايل بەيت بەرل كوللەدجىنىڭ اعا وقىتۋشىسى يورام حارپاز, KidZania حالىقارالىق ءبىلىم بەرۋ باعدارلامالارىنىڭ ديرەكتورى, بالالار الدىنداعى ەڭبەگى ءۇشىن بريتان يمپەرياسى وردەنىنىڭ قۇرمەتتى وفيتسەرى گەر گراۋس, ۋترەحت ۋنيۆەرسيتەتىنىڭ پروفەسسورى تەو ۆۋببەلس (نيدەرلاندى), ستەنفورد ۋنيۆەرسيتەتى حالىقارالىق دايىندىق باعدارلامالارىنىڭ اتقارۋشى ديرەكتورى (اقش) ريك سوممەر سياقتى بەلگىلى ەكسپەرتتەر مەن عالىمدار جانە ءبىلىم سالاسىنىڭ باسقا دا الەمدىك وكىلدەرى بايانداما جاسادى.
ەكىكۇندىك كونفەرەنتسيا بارىسىندا ءۇش پلەنارلىق وتىرىس, 12 شەبەرلىك ساباعى, 24 سەكتسيالىق وتىرىس وتەدى. سونداي-اق سالا ۇزدىكتەرى 12 باعىت بويىنشا جۇزدەن استام بايانداما, التى سەمينار, اۆتوگراف-سەسسيالار, پوستەر-سەسسيالارعا قاتىسىپ, ءبىلىم بەرۋ رەسۋرستارىنىڭ كورمەسىن تاماشالايدى.
جىل سايىن حالىقارالىق كونفەرەنتسيادا تاجىريبە الماساتىن جانە زەرتتەۋ ناتيجەلەرىن ۇسىناتىن زياتكەرلىك مەكتەپتەر مۇعالىمدەرىنىڭ, پەداگوگيكالىق شەبەرلىك پەن پەداگوگيكالىق ولشەۋلەر جانە ءبىلىم بەرۋ ورتالىقتارى قىزمەتكەرلەرىنىڭ سانى ارتىپ كەلەدى. شارانىڭ ەكىنشى كۇنى حالىقارالىق قازىلار القاسى «ۇزدىك پوستەر» جانە «ۇزدىك پرەزەنتاتسيا» نوميناتسيالارى بويىنشا جەڭىمپازداردى انىقتاپ, ماراپاتتايدى.