30 قازان كۇنى ساعات 16.00-دە ءا. قاستەەۆ اتىنداعى مەملەكەتتىك ونەر مۋزەيىندە تەاتر جىلى مەن ا.س. پۋشكيننىڭ تۋعانىنا 220-جىل تولۋىنا ارنالعان جىل سايىنعى «ارقاشان بىرگەمىز» حالىقارالىق اۆتورلىق ينتەرەرلىك قۋىرشاقتار كورمەسىنىڭ سالتاناتتى اشىلۋى وتەدى. كورمەنى ۇيىمداستىرۋشىلار – الماتىداعى رەسەيدىڭ باس ەلشىلىگى, قازاقستان رەسپۋبليكاسىنداعى رەسەي ىنتىماقتاستىعىنىڭ وكىلدىگى, ءا. قاستەەۆ اتىنداعى مەملەكەتتىك ونەر مۋزەيى, قازاقستاننىڭ «تسەنتر ۆسەلەننوي كۋكول» قۋىرشاقشىلار قوعامداستىعى.
«ارقاشان بىرگەمىز» اتتى ءۇشىنشى حالىقارالىق اۆتورلىق ينتەرەرلىك قۋىرشاقتار كورمەسى ءبىر ەكسپوزيتسيالىق كەڭىستىكتە رەسەي, تۇركيا, فرانتسيا, بەلگيا, قىرعىزستان جانە قازاقستاننىڭ ەڭ ۇزدىك قۋىرشاقشى شەبەرلەرىنىڭ باسىن قوسادى. بيىلعى جىلى كورمە اياسىندا قۋىرشاق شەبەرلەرى وزدەرىنىڭ جۇمىستارىمەن جانە ءادىس-تاسىلدەرىمەن بولىسە وتىرىپ, باسقا ەلدەردەن كەلگەن شەبەرلەردىڭ شىعارماشىلىعىمەن تانىسادى. شارا اياسىندا قۋىرشاق شەبەرلەرىنىڭ قۋىرشاق فورۋمى ءوتىپ, ارنايى شەبەرلىك ساعاتتارى ۇيىمداستىرىلادى.
كورمەگە كەلۋشىلەرگە ءۇش ەكسپوزيتسيا ۇسىنىلادى:
- «پۋشكينيانا» – ا.س. پۋشكيننىڭ تۋعانىنا 220 جىل تولۋىنا ارنالعان
- «تەاتر» – تەاتر جىلىنا ارنالعان
- «كۋكلى ميرا» – سۋرەتشى گۇلميرا سادىقوۆانىڭ جەكە كوللەكتسياسىنداعى ءار ەلدىڭ قۋىرشاقتارى كورسەتىلەدى.
قۋىرشاق شەبەرلەرىنىڭ شەبەرلىگى مەن پراكتيكالىق يكەمى جىل وتكەن سايىن جەتىلۋدە. جىل سايىنعى «ارقاشان بىرگەمىز» اتتى ءۇشىنشى حالىقارالىق اۆتورلىق ينتەرەرلىك قۋىرشاقتار كورمەسى كورەرمەندەرگە وسى شەبەرلەردىڭ جاڭا جۇمىستارىن ۇسىنادى. شەبەرلەردىڭ جۇمىستارىنىڭ اراسىندا تاريحي تۇلعالار مەن ەرتەگى كەيىپكەرلەرى, بەلگىلى ادامداردىڭ پورترەتتەرى, تەاتر ءومىرى مەن پۋشكيننىڭ شىعارماشىلىعىنان تۇرمىستىق كورىنىستەر كەزدەسەدى. كورمەگە كەلۋشىلەر ۇسىنىلاتىن وبرازداردىڭ سان الۋاندىعىنا, جوعارى ورىنداۋشىلىق ساپاسىنا جانە كونتسەپتسيانى جۇزەگە اسىرۋداعى ولاردىڭ شىعارماشىلىق تاسىلدەرىنە تامساناتىن بولادى.
بارلىق جۇمىس ءتۇرلى تەحنيكادا ورىندالعان – قىزدىرىلعان پلاستيك, ءوزى قاتاتىن پلاستيك, قۇرعاقتاي باسۋ تەحنيكاسى, توقىما تەحنيكاسى, ش ۇلىقتىق ءمۇسىن تەحنيكاسى, توقىلعان قۋىرشاق جانە باسقا دا ارالاس تەحنيكالار.
ايتۋلى كورمە قاراشا ايىنىڭ ورتاسىنا دەيىن جالعاسادى. كورمەنىڭ بارلىق كۇنى الماتىداعى رەسەيدىڭ باس كونسۋلدىعى مەن قازاقستان رەسپۋبليكاسىنداعى رەسەي ىنتىماقتاستىعىنىڭ وكىلەتتىگى ۇيىمداستىرعان بىرقاتار شارالار وتكىزۋ دە جوسپارلانعان. ولاردىڭ اراسىندا الەم حالىقتارىنىڭ تىلىندە سپەكتاكلدەر, كونتسەرتتەر, جاڭا كىتاپتار مەن ەلەكتروندىق باسىلىمدار دا بار. قازاقستان, رەسەي, فرانتسيا, قىرعىزستان, تۇركيا قۋىرشاقشىلارىنىڭ بالالار مەن ەرەسەكتەرگە ارنالعان شىعارماشىلىق شەبەرلىك ساعاتتارى مەن شەبەرلىك شوۋلارىنىڭ كەڭەيتىلگەن باعدارلامالارى قاراستىرىلعان.