ستاتيستيكاعا جۇگىنسەك, قازىرگى تاڭدا قازاقستاندا مۇگەدەكتىككە شالدىققان 690 مىڭ ادام بار. ولاردىڭ ىشىندە ەڭبەككە قابىلەتتى جاستاعىلار – 424 مىڭ بولسا, زەينەتكەرلىك جاستا – 177 مىڭ, 18 جاسقا دەيىنگى بالالار سانى – 89 مىڭ ادام. ال ءاربىر ساننىڭ استارىندا ادام تاعدىرى, تالپىنىسى, كۇيزەلىسى مەن ومىرگە قۇشتارلىعى قاتار ايقاسىپ جاتقانى انىق.
تابيعات جاراتىلىسىنان تەپەرىش كورگەن جاندارعا ء«بىز سىزدەرمەن بىرگەمىز!» دەگەن سوزبەن سۇيەپ, شىنايى دەمەۋ بولا الاتىن ۇجىمدار بار. ماسەلەن, «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ الماتى فيليالى قىزمەتكەرلەرىنىڭ ۇجىمداعى مۇگەدەكتىگى بار ارىپتەستەرىنە ايتاتىن قولداۋ ءسوزى دە وسى – ء«بىز سىزدەرمەن بىرگەمىز!».
بۇگىندە فيليالدا ءبىرىنشى توپتاعى – 6, ەكىنشى توپتاعى – 26, ءۇشىنشى توپتاعى – 20, بارلىعى 52 مۇگەدەكتىگى بار مامان جۇمىس ىستەيدى, ولاردىڭ 42-ءى جوعارى ءبىلىمدى. مۇگەدەكتىگى بار ازاماتتاردى جۇمىسپەن قامتۋ ماسەلەسىن كورپوراتسيا باستى نازاردا ۇستاپ, قوعامنىڭ باسقا توپتارىمەن تەڭەستىرۋ ماقساتىندا كوپتەگەن جاعداي جاسالعان. جۇمىسقا قابىلداۋ ءۇشىن ارنايى كۆوتا قاراستىرىلىپ, سىناقسىز جۇمىسقا الىنادى. سونىڭ ناتيجەسىندە بۇگىندە بولىمشەنىڭ فرونت-كەڭسەلەرى مەن بەك-وفيستەرىندە مۇگەدەكتىگى بار جاستار قاتارىنان قالماي, حالىققا ساپالى قىزمەت كورسەتىپ وتىر.
ءۇشىنشى توپتاعى مۇگەدەكتىگى بار باۋىرجاننىڭ مەدەۋ اۋداندىق فرونت-كەڭسەسىندە ەڭبەك ەتكەنىنە ءبىر جىلدان اسسا, ەكىنشى توپتاعى مۇگەدەكتىگى بار تەمىرلاننىڭ كەلگەنىنە ءتورت اي بولعان. ەكەۋى دە ۇجىمعا تەز ۇيرەنىپ, ارىپتەستەرىمەن ەتەنە ارالاسىپ كەتتى. جۇمىسقا جاڭا قابىلدانعان جاستاردى جاتسىنباي, باۋىرعا تارتىپ, بار بىلگەنىن ۇيرەتكەن ارىپتەستەرى ەندى ەكى جىگىتتىڭ العىرلىعىنا, ەڭبەكقورلىعىنا ءتانتى.
فيليال باسشىسى دانيار قىرىقباەۆ تا وتە ەڭبەكقور, ىزدەنىمپاز, جاۋاپكەرشىلىگى مول ماماندارعا ءدان ريزا. «جاستاردىڭ جۇمىسقا دەگەن ىنتاسى, بىلىمگە دەگەن قۇشتارلىعى قۋانتادى. بۇگىندە ولار ءوز ۇيرەنگەندەرىن وزگەلەرگە ۇيرەتەتىن دارەجەگە جەتتى. قالاداعى جوو-لار مەن مەكەمەلەردە وتەتىن تسيفرلى قىزمەتتەردى ۇيرەتۋ جۇمىستارىنىڭ بەل ورتاسىندا باۋىرجان جۇرەدى. ال تەمىرلان بولسا, از ۋاقىتتىڭ ىشىندە جۇمىستىڭ قىر-سىرىن مەڭگەرىپ الدى», دەيدى ول.
تەمىرلان دا وسىنداي ۇجىمعا تاپ كەلگەنىنە ريزا. «بىلمەگەنىمدى ۇيرەتىپ, قولۇشىن بەرۋگە دايىن جاندار كوپ. ەڭبەگىمدى باعالاپ, كوتەرمەلەپ وتىرادى. جۇمىسىم قىزىقتى, ۋاقىتتىڭ قالاي وتكەنىن دە بايقاماي قالامىن. كەلگەندەر كورسەتكەن قىزمەتىمە العىستارىن ايتقاندا, كادەسىنە جاراپ جاتقانىما قۋانامىن», دەيدى تەمىرلان اسۋباەۆ.
وسىلايشا بىرلىگى جاراسقان ۇيىمشىل ۇجىم مۇگەدەكتىگى بار جانداردى ء«بىز سىزدەرمەن بىرگەمىز» دەپ باۋىرعا باسىپ, ەندى ء«بىز ءبارىمىز بىرگەمىز, ىدىراماس ىرگەمىز!» دەپ ۇراندايدى.
الماتى