سوڭعى جىلدارى ءداستۇرلى تۇردە وتكىزىلىپ كەلە جاتقان «التىن تۇلپار» الامان بايگەسى بيىل بەسىنشى رەت اتىراۋ تورىندە ۇيىمداستىرىلىپ, 51 شاقىرىمدىق قاشىقتىققا جىبەرىلگەن 37 جۇيرىكتەن قىزىلوردالىق بەردىبەك مىحانوۆتىڭ «قويانقاسقاسى» ماڭدايى جارقىراپ دارا كەلدى.
«بۇعان دەيىن ءتورت دۇركىن ەلوردا ىرگەسىندە دالا شاڭىن كوتەرىپ, باسىرەسى مول بايگەنىڭ ولجاسىن ساراپقا سالعان الاماننىڭ بيىل باتىس وڭىرىندە جالاۋىن تىگۋى, ورتالىقتان شالعاي ايماقتا ءومىر ءسۇرىپ جاتقان اتبەگىلەردىڭ دە مارتەبەسىن كوتەرىپ, سەيىستىك شەبەرلىگىن شىڭداۋ ەدى» دەيدى ۇيىمداستىرۋشىلار.
Nur Otan پارتياسى, مادەنيەت جانە سپورت مينيسترلىگى, ۇلتتىق سپورت قاۋىمداستىعى جانە اتىراۋ وبلىسى اكىمدىگىنىڭ قولداۋىمەن ءوتىپ, اعايىننىڭ كوز قۋانىشىنا اينالعان بايگەنىڭ باس جۇلدەسىنىڭ يەگەرى «قويانقاسقاعا» 10 ملن تەڭگە بۇيىرسا, كومبەگە ەكىنشى بولىپ جەتكەن جامبىل وبلىسىنىڭ جۇيرىگى «شىمشىققا» 5 ملن, ءۇشىنشى بولىپ كەلگەن «دوس» اتتى ارابى تورىعا 2,5 ملن, ءتورتىنشى بولىپ شىلبىر ۇستاتقان ماڭعىستاۋلىق بەستى جۇيرىك «ايتوبەلگە»1,5 ملن, بەسىنشى بولىپ مارەدەن وتكەن اتىراۋ وبلىسى ماحامبەت اۋدانىنان كەلگەن «جەزكيىك» اتتى قۇلا بيەنىڭ يەسىنە 1 ملن تەڭگە بۇيىردى.
الامان بايگە جەڭىمپازدارىن Nur Otan پارتياسىنىڭ حاتشىسى عابيدوللا وسپانقۇلوۆ, اتىراۋ وبلىسى اكىمىنىڭ ءبىرىنشى ورىنباسارى سەرىك جامبىل ۇلى, ۇلتتىق سپورت قاۋىمداستىعىنىڭ باس حاتشىسى نۇرسۇلتان يبراگيموۆ قاتارلى ازاماتتار ماراپاتتادى.