قازاقستان رەسپۋبليكاسىنىڭ ۇلتتىق ارحيۆىندە «جادىمىزدان وشە باستاعان جانە جاڭا ەسىمدەردى عىلىمنىڭ سان تاراۋلى سالاسىنان ىزدەستىرۋ. قازاقستان: 1960-2000 جج.» تاقىرىبىندا حالىقارالىق عىلىمي-تاجىريبەلىك كونفەرەنتسيا ءوتتى. شارانى قازاقستان رەسپۋبليكاسى مادەنيەت جانە سپورت مينيسترلىگىنىڭ «ورتالىق مەملەكەتتىك عىلىمي-تەحنيكالىق قۇجاتتاما ءارحيۆى» مەن قازاقستان رەسپۋبليكاسىنىڭ ۇلتتىق ءارحيۆى بىرلەسە ۇيىمداستىردى.
كونفەرەنتسيا ارحيۆ سالاسىنداعى ىنتىماقتاستىق جونىندەگى قازاقستان - رەسەي كوميسسياسىنىڭ 2018 جىلدىڭ 5 ساۋىرىندە وتكەن ءبىرىنشى وتىرىسىندا بەكىتىلگەن رەسەيلىك جانە قازاقستاندىق ارحيۆيستەردىڭ بىرلەسكەن ءىس-شارالار جوسپارىنا سايكەس وتكىزىلىپ وتىر.
جاسىراتىنى جوق, سوڭعى جىلدارى قازاقستاننىڭ عىلىم مەن ينجەنەريا, سونداي-اق تەحنيكا سالاسىنىڭ تاريحى, تاريح ساحناسىنداعى زيالى قاۋىم وكىلدەرىنىڭ ءرولى – عىلىمي مەكەمەلەر مەن زەرتتەۋشىلەردىڭ نازارىنان تىس قالىپ ءجۇر.
وسى باعىتتاعى ءىس-شارالاردىڭ تولىمدى بولۋى ءۇشىن ارحيۆ تاريحي تاقىرىپتاعى كونفەرەنتسيانى ەكىنشى رەت وتكىزىپ وتىر. ءبىرىنشى رەت «تاريحتاعى ادام: قازاقستاننىڭ عىلىمي, ينجەنەرلىك جانە تەحنيكالىق ينتەلليگەنتسياسىنىڭ دەرەككوزدەرى, 1920-1950 جىلدار» اتتى حالىقارالىق عىلىمي-تاجىريبەلىك كونفەرەنتسياسى 2017 جىلدىڭ ساۋىرىندە الماتى قالاسىندا وتكەن بولاتىن.
«وتكەنىمىزدى ۇمىتساق, بولاشاق ءبىزدى كەشىرمەيدى», – دەيدى دانا حالقىمىز. البەتتە, ەلباسىمىز نۇرسۇلتان نازارباەۆتىڭ «قازاق تاريحىندا قازاق ۇيالاتىن ەشتەڭە جوق» دەگەن ءبىر اۋىز ءسوزىنىڭ ءوزى ءبىزدىڭ كەۋدەمىزگە ماقتانىش سەزىمىن ۇيالاتادى. ءبىز دە ەل تاريحىنا قاتىستى قۇندى قۇجاتتاردى جيناقتاپ, قازاقتىڭ ەندىگى تاريحىندا دا سونداي ىزگى ءىز قالدىرۋ ءۇشىن قىزمەت ەتە بەرۋىمىز كەرەك. بۇل جۇمىس اسىرەسە «قازىرگى قازاقستاننىڭ 100 جاڭا تۇلعاسى» جوباسىن جانە «ارحيۆ – 2025» مەملەكەتتىك باعدارلاماسىن جۇزەگە اسىرۋ تۇرعىسىنان وزەكتى بولىپ وتىر. ءبىزدىڭ زامانداستارىمىزدىڭ ەلدىڭ كەلەلى ماسەلەلەرىن شەشۋگە قوسقان ناقتى ۇلەسىن راستايتىن قۇجاتتامالىق بازانى قالىپتاستىرۋ جانە ونى ۇنەمى جۇمىس بارىسىندا تولىقتىرىپ وتىرۋ قاجەتتىگىن ايتا كەتكىم كەلەدى, دەدى ورتالىق مەملەكەتتىك عىلىمي-تەحنيكالىق قۇجاتتاما ءارحيۆى رمم ديرەكتورى بايان جۇماتاەۆا ءوز سوزىندە.
كونفەرەنتسيادا وتكەن كەزەڭدەردى زەردەلەۋدەگى ارحيۆتىك دەرەككوزدەردىڭ ءرولى, قۇجاتتىق مۇرالاردى پايدالانۋ ماسەلەلەرى, حح عاسىردىڭ سوڭىندا وتاندىق عىلىم مەن تەحنيكانىڭ دامۋىنا ەلەۋلى ۇلەس قوسقان, بۇل كۇندە جادىمىزدان وشە باستاعان تۇلعالارعا قاتىستى تاريحي ادىلەتتىلىكتى ورناتۋ سىندى ماسەلەلەر تالقىلاندى. كونفەرەنتسيا قاتىسۋشىلارىنىڭ ارحيۆ قورلارىنىڭ نەگىزىندە دايىندالعان تاريحي-قۇجاتتىق كورمە ۇسىنىلدى.