ەلىمىزدىڭ ءۇشىنشى ءىرى قالاسىنا ينۆەستيتسيا سالۋعا قىزىققان كاسىپكەرلەردىڭ قاتارى ارتىپ كەلەدى. جۋىردا شىمكەنت قالاسىنىڭ اكىمى ەرلان ايتاحانوۆ وڭىردە ءوندىرىسىن وركەندەتۋدى كوزدەگەن GG Group ترانسۇلتتىق كورپوراتسياسى ديرەكتورلار كەڭەسىنىڭ توراعاسى, نەپالدىق ميللياردەر بينود چاۋدحاريمەن كەزدەستى.
GG Group الەمدىك نارىقتا ءوزىن دالەلدەگەن كورپوراتسيا. اتالعان كورپوراتسيا اۋىلشارۋاشىلىق ونىمدەرىن وڭدەۋ, قوناقۇي جانە مەيرامحانا بيزنەسى, سونداي-اق ويىن-ساۋىق ورتالىقتارىن سالۋ, قىزمەت كورسەتۋ سالاسىندا بەلدى ورىنعا يە.
كەزدەسۋ بارىسىندا قوس تاراپ اۋىلشارۋاشىلىق ونىمدەرىن وڭدەۋ ماسەلەسىنە توقتالدى. «شىمكەنت قالاسى گەوگرافيالىق جانە ەكونوميكالىق تۇرعىدان اۋىلشارۋاشىلىق ونىمدەرىن وڭدەۋدە وتە قولايلى جەردە ورنالاسقان. كليماتى دا ىڭعايلى. قالامىزدا الەمدىك ستاندارتقا ساي زاماناۋي ۇلگىدەگى ساۋدا-لوگيستيكا ورتالىعى سالىنىپ جاتقانىن ەسكەرسەك, كەلەشەكتە GG Group كورپوراتسياسىمەن تىعىز جۇمىس ىستەۋ بارشامىزعا ءتيىمدى. سەبەبى اۋىلشارۋاشىلىق ونىمدەرىن وڭدەپ ەكسپورتتاۋ قوس تاراپقا دا پايدالى ەكەنى ءسوزسىز», دەدى ەرلان قۋانىش ۇلى.
سونىمەن قاتار قالا اكىمى شەتەلدىك ينۆەستورلارمەن قوناقۇي بيزنەسى جايىندا دا ءسوز قوزعادى. قوناقۇي بيزنەسى الەمدىك ەكونوميكادا باستى ءرولدىڭ ءبىرىن اتقاراتىنىن العا تارتقان شاھار باسشىسى كورپوراتسيا باسشىلىعىنا بۇل سالادا دا قويان-قولتىق جۇمىس ىستەۋگە شاقىردى. شىمكەنتتەن الەمدىك ستاندارتتارعا ساي قوناقۇي سالۋعا شاقىرعان قالا اكىمى بۇل ءۇشىن Shymkent City اۋماعىنان جەر بەرۋگە دايىن ەكەنىن ايتتى.
نەپالدىق ميللياردەرمەن بولعان كەزدەسۋدە تاراپتار بۇعان دەيىن وتكىزىلگەن كەلىسسوزدەر نەگىزىندە قالادا جوسپارلاپ وتىرعان Happy land وتباسىلىق ويىن-ساۋىق كەشەنىنىڭ ىسكە اسىرىلۋ بارىسىن تالقىلادى. ەرلان قۋانىش ۇلى جەرگىلىكتى بيلىك تاراپىنان بارلىق ءتيىستى جۇمىستاردىڭ جۇرگىزىلگەنىن ايتىپ, ينۆەستورلاردان جوبانى باستاۋعا شاقىردى.
بۇل جوبا شىمكەنتتەگى ءتۋريزمنىڭ دامۋىنا ۇلكەن ۇلەس قوساتىنىن ايتقان قالا اكىمى جوبانى جۇزەگە اسىرۋ بويىنشا مەملەكەت تاراپىنان دا قولداۋ كورسەتىلەتىنىن اتاپ ءوتتى.
شىمكەنت