بۇگىن ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا قر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ كەپىلدەندىرىلگەن الەۋمەتتىك توپتاما نەلىكتەن 1 جاسقا تولماعان بالاعا بەرىلمەيتىندىگىن ءتۇسىندىردى, دەپ حابارلايدى قازاقپارات ءتىلشىسى.
«قازىرگى ۋاقىتتا ەلىمىزدە زاڭعا سايكەس بالانىڭ 1 جاسقا دەيىنگى كۇتىنىمىنە قاتىستى ارنايى جاردەماقى بار. ول جاردەماقىنىڭ مولشەرى جۇمىس ىستەمەيتىن ايەلدەرگە ءبىرىنشى بالادان 14 500 تەڭگەدەن باستاپ ءتورتىنشى بالاعا دەيىن 22 500 تەڭگە دەيىن اي سايىن تولەنەدى. سوندىقتان وسى جاعداي ەسكەرىلىپ وتىر»,- دەدى مينيستر.
ونىڭ اتاپ وتۋىنشە, جۇمىس ىستەيتىن انالار مەملەكەتتىك ساقتاندىرۋ قورىنان جالاقىسىنىڭ 40 پايىزى مولشەرىندە, ورتاشا ەسەپپەن 33 مىڭ تەڭگە كولەمىندە بالاسى 1 جاسقا تولعانعا دەيىن جاردەماقى الىپ وتىرادى.