كەشە الماتى قالاسىنداعى ءا. قاستەەۆ اتىنداعى مەملەكەتتىك ونەر مۋزەيىندە وسپان باتىر ءسىلام ۇلىنىڭ تۋعانىنا 120 جىل تولۋىنا ارنالعان «تۇران ءرومانتيزمى» اتتى سۋرەت كورمەسى اشىلدى. ءىس-شارانى «ەر جانىبەك» حالىقارالىق قوعامدىق قورى مەن «TURAN-QAZAQ سۋرەتشىلەر كونسوليداتسياسى» بىرلەسىپ ۇيىمداستىرعان.
كورمەگە قاتىسۋعا نيەت بىلدىرگەن سۋرەتشىلەردىڭ تۋىندىلارىن قابىلداۋ 4 قازاننان 25 قازانعا دەيىن جالعاسادى. شىعارمالاردى ارنايى قازىلار القاسى ساراپتاپ, جۇلدەگەلەر انىقتالادى. وسى ارالىقتا ءباسپاسوز جانە ونەرتانۋشىلار ورتاسىندا دا تالقىلاۋلار وتكىزىلىپ, ولاردىڭ پىكىرلەرى دە ەسكەرىلەدى. كورمە قورىتىندىسى 25 قازاندا شىعارىلىپ, جۇلدەگەرلەر ماراپاتتالادى. وسپان باتىر اتىنداعى باس جۇلدە 1000 000 تەڭگە (1 ادام). ءبىرىنشى ورىن (1 ادام) 750 000 تەڭگە. ەكىنشى ورىن (2 ادام) 500 000 تەڭگە. ءۇشىنشى ورىن (2 ادام) 250 000 تەڭگە سىياقى الادى.
«رومانتيزم يدەياسى بىزدە ماعجان جۇماباەۆتان باستالادى. رومانتيزم بولماسا باسقا ونەرلەردىڭ دامۋى قيىن. مادەنيەت تاريحىن قاراساڭ, ءبارى بەينەلەۋ ونەرىنەن باستالادى. كەيىن بارىپ ادەبيەت, مۋزىكا دامىعان. سوندىقتان ءبىز تۇران وركەنيەتىنىڭ مۇراگەرى رەتىندە وسىنداي باستامانى قولعا الدىق. ەل رۋحىن كوتەرەتىن مىناۋ وسپان باتىردىڭ 120 جىلدىق مەرەيتويى تۋرا كەلدى دە, ونىڭ ەرلىك جولىن تاقىرىپ ەتىپ الدىق. جالپى, ۇلتتىق رۋحتى كوتەرۋ كەرەك. وسى رومانتيزم كورمەسى ارقىلى ءبىراز ادام ىرىكتەلىپ, ءوز ونەرىن كورسەتەدى دەگەن ۇمىتتەمىن»,- دەيدى مادەنيەت قايراتكەرى جاناربەك بەرىستەنوۆ.
«ەر جانىبەك» حالىقارالىق قورىنىڭ توراعاسى جەڭىس تۇركيانىن تۇسىندىرۋىنشە, شارانىڭ ەرەكشەلىگى وتكەن عاسىردىڭ 30-40 جىلدارداعى قازاق تاريحىنداعى ادىلەتتىك, ەركىندىك جولىندا كۇرەسكەن وسپان باتىردىڭ بەينەسى. بۇل جەردە تەك وسپان باتىر ەمەس, الاشورداعا قاتىستى, كوشپەندىلەر ءومىرى, قازاق دالاسىنداعى كوپتەگەن تۇلعانىڭ بەينەسى مەن جۇرگەن جولى قامتىلادى.
«سوندىقتان دا سۋرەت كورمەسىنىڭ تاقىرىبىن «تۇران ءرومانتيزمى» دەپ الىپ وتىرمىز. كوميسسيا دا تاريح, ونەر, كوركەمونەر سياقتى ءتۇرلى سالانىڭ ادامدارىنان قۇرالعان. ەندى ءوز دەڭگەيىندە سارالانىپ, ەڭ مىقتى دەگەن ونەر يەلەرى ماراپاتتالادى دەگەن سەنىمدەمىن»,- دەيدى «ەر جانىبەك» حالىقارالىق قورىنىڭ توراعاسى جەڭىس تۇركيا.
بيىل وسپان باتىردىڭ 120 جىلدىعىنا وراي بىرنەشە اتاۋلى ءىس-شارا ۇيىمداستىرىلدى. كوكتەمدە قازاق كۇرەسىنەن رەسپۋبليكالىق تۋرنير, «سۇلۋبايدىڭ ءانى» اتتى تەاترلاندىرىلعان قويىلىم مەن حالىقارالىق جىر ءمۇشايراسى جانە بۇقارالىق اقپارات قۇرالدارىنا ارنالىپ بايگە جاريالانعان.
بارلىق ءىس-شارالاردىڭ قورىتىندىسى رەتىندە جەلتوقسان ايىندا الماتىدا كەش وتكىزىلەدى.
الماتى