اۋىل جاستارىنىڭ دا جاڭا زامان يگىلىكتەرىنەن قالىس قالماي, جاڭالىقتاردان حاباردار بولىپ وتىرۋى ماڭىزدى. ەلباسى جاريالاعان جاستار جىلى وسى باعىتتاعى ءبىراز يگى ىستەرگە جول اشتى. ءتۇرلى مەملەكەتتىك باعدارلامالار ارقىلى باسپانالى بولىپ, جۇمىسقا ورنالاسىپ, كاسىپ اشىپ جاتقان جاستاردىڭ قاتارى كوپ. قۇر سەندەلىپ جۇرمەي, بوس ۋاقىتتارىن ءتيىمدى وتكىزۋ دە جاستاردىڭ جامان ادەتتەرگە بوي الدىرماۋلارىنا سەپتىگىن تيگىزەدى. جاستارعا ارنالعان جوبالار مەن ورتالىقتار اتىراۋ وبلىسىنىڭ بارلىق اۋداندارىندا بار. ال يندەر كەنتىندە ەلىمىزدەگى اۋدان ورتالىقتارىنىڭ اراسىنان العاش رەت جاڭا فورماتتاعى كينوتەاتر اشىلدى. بۇل دا «جاستار جىلىنىڭ» تارتۋى.
«3D Lazer» سوڭعى ۇلگىدەگى كينوتەاترى - اۋدان اكىمدىگى مەن «مەلومان» كومپانياسىنىڭ بىرىككەن جوباسى. يندەردەگى «جاستار ورتالىعىندا» ورنالاسقان 200 ورىندىق كينوتەاتردىڭ اشىلۋ سالتاناتىندا اۋدان اكىمى مەيىرىم قالاۋي: «ەلباسى مەن پرەزيدەنتتىڭ مەملەكەتتىك ساياساتىنا سايكەس ازاماتتاردىڭ قولايلى ءومىر سۇرۋلەرىنە تولىق جاعداي جاسالۋى قاجەت. اۋدان تۇرعىندارىنا ارنالعان العاشقى كينوتەاتردىڭ اشىلۋى دا وسى ساياساتتىڭ ناتيجەسى. وسى يگى ىستەرگە باستاماشىل بولىپ, قولداۋ كورسەتكەنى ءۇشىن ايماق باسشىسى نۇرلان اسقار ۇلىنا العىسىمىزدى بىلدىرەمىز», - دەدى.
اۋدان تۇرعىندارى جاڭا كينوتەاتردان رەجيسسەر اقان ساتاەۆتىڭ «توميريس» ءفيلمىن تاماشالادى. ەندى الىستاعى اۋىل حالقى دا جاڭا فيلمدەردى ەلىمىزدەگى ءىرى كينوتەاترلارمەن قاتار كورە الادى.
اتىراۋ