قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىنىڭ الاڭىندا بىرىككەن ۇلتتار ۇيىمى مەن قازاقستان ۇكىمەتىنىڭ تۇراقتى دامۋ سالاسىنداعى ماقساتتارعا قول جەتكىزۋ اياسىنداعى ىنتىماقتاستىعى ناتيجەلەرىنە ارنالعان ءباسپاسوز ءماسليحاتى ءوتتى.
جيىنعا بۇۇ-نىڭ قازاقستانداعى تۇراقتى ۇيلەستىرۋشىسى نوريماسا شيمومۋرا, بۇۇ-نىڭ حالىقتى قونىستاندىرۋ سالاسىنداعى قورىنىڭ قازاقستانداعى وكىلى (يۋنفپا), قىرعىزستان مەن تۇرىكمەنستان ءۇشىن ەلدىك ديرەكتورى دجۋليا ۆالەزە, قازاقستانداعى بۇۇ دامۋ باعدارلاماسىنىڭ تۇراقتى وكىلى ياكۋپ بەريش, «بۇۇ-ايەلدەر» قۇرىلىمىنىڭ وكىلى يلەين كونكيەۆيچ جانە بۇۇ-نىڭ قازاقستانداعى بالالار قورىنىڭ (يۋنيسەف) وكىلى ارتۋر ۆان ديزەن قاتىستى.
الدىمەن ءسوز العان نوريماسا شيمومۋرا ەكولوگيا ماسەلەسىن جاھاندىق دەڭگەيدە كوتەرگەن نيۋ-يوركتەگى بۇۇ باس اسسامبلەياسىنىڭ 74-سەسسياسىنىڭ ءمان-ماڭىزىنا قىسقاشا توقتالىپ, وعان قازاقستان پرەزيدەنتى قاسىم-جومارت توقاەۆتىڭ قاتىسقانىن ەرەكشە اتاپ ءوتتى.
– قازاقستان 2015 جىلدان باستاپ تۇراقتى دامۋ ماقساتتارىن (تدم) ورىنداۋعا ىنتالى ەكەندەرىن كورسەتىپ كەلەدى. بۇگىندە تدم-نىڭ 80% مەجەسى قازاقستاننىڭ دامۋىنىڭ ستراتەگيالىق مەملەكەتتىك قۇجاتتارىمەن ۇندەستىك تاپقان. بۇل ەلدە تدم-دى ۇيلەستىرۋ جونىندە ۇلتتىق مەحانيزم قۇرىلعان. قازاقستانداعى بۇۇ جۇيەسى ەلدىڭ الەمدەگى ەڭ دامىعان 30 ەلدىڭ قاتارىنا قوسىلۋعا ۇمتىلىسىن قولدايدى. ءبىز بۇرىنعىداي تۇراقتى دامۋ سالاسىنداعى جاھاندىق كۇن ءتارتىبى قازاقستانعا وركەندەۋ جولىنداعى رەفورمالارىن, 2050 جىلعا دەيىنگى ستراتەگياسىن جۇزەگە اسىرۋعا سەپتىگىن تيگىزەدى, – دەدى ن.شيمومۋرا.
يۋنفپا وكىلى دجۋليا ۆالەزە قازاقستاندا جاستار جىلى بەلگىلەنىپ, جاستاردىڭ جان-جاقتى دامۋىنا ەرەكشە كوڭىل ءبولىنىپ, جاعداي جاسالىپ جاتقانىن, سونداي-اق كەلەسى جىلدىڭ ۆولونتەرلەر جىلى بولىپ جاريالانۋىن وسى باعىتتاعى ءىس-شارالاردىڭ ماقساتتى جالعاسى ەكەنىن ايتتى.
ال ياكۋپ بەريش بۇۇ دامۋ باعدارلاماسى قازاقستانعا ينستيتۋتسيونالدىق دامىتۋ مەن بيوالۋاندىقتى دامىتۋعا ايتارلىقتاي ۇلەس قوسىپ جاتقانىن جەتكىزدى. بۇعان قوسا ول ءبىزدىڭ ەلدىڭ جاسىل ەكونوميكاعا كوشۋ تۇجىرىمداماسىن ىسكە اسىرىپ جاتقانىن, سىبايلاس جەمقورلىققا قارسى ءىس-قيمىلدى بەلسەندى جۇرگىزەتىنىن, اكىمشىلىك, مەملەكەتتىك قىزمەت, قۇقىقتىق رەفورمالاردى قولعا العانىن جانە پرەزيدەنتتىڭ جاستار كادرلىق رەزەرۆى جاساقتالاتىنىن مالىمدەدى.
سونىمەن قاتار بۇل جيىندا ادام قۇقىقتارىنىڭ قورعالۋى, قانداي دا ءبىر كەمسىتۋشىلىككە جول بەرمەۋ, ينكليۋزيۆتى قوعام قۇرۋ, انا مەن بالا ءولىمى تۋرالى كەڭىنەن ءسوز قوزعالدى. ماسەلەن, يۋنيسەف وكىلى ارتۋر ۆان ديزەن ءوز سوزىندە قازاقستاننىڭ باستى جەتىستىگىنىڭ ءبىرى رەتىندە بالا ءولىمىنىڭ 5 ەسەگە ازايعانىن اتادى.