ساياسي كەڭەستىڭ ايماقتىق بيۋروسىنىڭ ۇسىنىسمەن Nur Otan پارتياسى قوستاناي وبلىستىق فيليالى توراعاسىنىڭ ءبىرىنشى ورىنباسارى بولىپ ەلدار كۇزەنباەۆ تاعايىندالدى.
ە.ق.كۇزەنباەۆ 1982 جىلى تۋعان. قۇقىقتانۋ ماماندىعى بويىنشا قوستاناي مەملەكەتتىك ۋنيۆەرسيتەتىن جانە قوستاناي ينجەنەرلىك-ەكونوميكالىق ۋنيۆەرسيتەتىن قارجىگەر ماماندىعى بويىنشا بىتىرگەن. ءار جىلدارى قوستاناي وبلىسى قارابالىق جانە قوستاناي اۋداندارىندا ادىلەت باسقارماسىنىڭ باسشىسى, ۇزىنكول اۋدانى اكىمىنىڭ ورىنباسارى, سارىكول اۋدانىنىڭ اكىمى بولدى. 2018 جىلدىڭ شىلدە ايىنان باستاپ ە.كۇزەنباەۆ ارقالىق قالاسىنىڭ اكىمى, Nur Otan پارتياسى قالالىق فيليالىنىڭ توراعاسى قىزمەتتەرىن اتقاردى.
ايتا كەتەيىك, Nur Otan پارتياسىنىڭ ليدەرى نۇرسۇلتان نازارباەۆتىڭ پارتيانىڭ جۇمىسىن جانداندىرۋ جانە كادرلاردى جاڭارتۋ جونىندەگى تاپسىرماسىنا سايكەس, بۇعان دەيىن ەرلان كاناليموۆ نۇر-سۇلتان قالاسىنداعى پارتيا فيليالى توراعاسىنىڭ ءبىرىنشى ورىنباسارى بولىپ تاعايىندالعان بولاتىن. سونداي-اق تۇركىستان جانە باتىس قازاقستان, پاۆلودار مەن سولتۇستىك قازاقستان وبلىستارىنداعى فيليال توراعاسىنىڭ ءبىرىنشى ورىنباسارلارى دا اۋىستى.