كۇمىس كولدەرى ءمولت-ءمولت ەتىپ جاتقان قورعالجىن تاريحي ەسكەرتكىشتەرگە اسا باي ولكە. وسىنداي قىمبات جادىگەرلەردىڭ ءبىرى – اق ەدىل قوجا مازارى.
بۇل كۇندە دەرەك-دايەك اتاۋلى سۇيىلىپ, جۇقاناسى قالعان. ايتەۋىر, وسى جەر ءجانناتىندا ەدىل قوجانىڭ كۇن كەشكەنى انىق. يماندىلىق يىرىمدەرىن جاماعاتتىڭ بويىنا سىڭىرگەن. ءدىنشىل عانا ەمەس, كوپشىل, ەل قامىن ويلاعان جان بولسا كەرەك-ءتى. ەل ىشىندەگى اۋىق-اۋىق تۋىنداپ تۇراتىن داۋ-شارلاردى باسۋعا, اعايىن اراسىن جاراستىرۋعا, تۋىسقاندى تاتۋلىققا شاقىرۋعا ەرەن ەڭبەگى سىڭگەن دەسەدى. سول اۋىزبىرلىكتى نىعايتىپ, كەڭ كوسىلگەن قورعالجىننىڭ دالاسىن جايلاعان جالپاق جۇرتتىڭ ۇيىتقىسى بولعان. ادالدىقتىڭ شىراقشىسى – ەدىل قوجاعا جازا باسپاي-اق سويلەپ, ادالىن ايتىپ, الاشتى ادامگەرشىلىككە باۋراعان پەيىلىنە وراي ەسىمىنە «اق» انىقتاۋىشىن قوسىپ, اق ەدىل قوجا اتاعان. ءىسىنىڭ دە, نيەتىنىڭ دە اقتىعىنا وراي. زامانداستارىنىڭ, شاراپاتىن كوپ كورگەن ادامداردىڭ كىرشىكسىز تازا كوڭىلىنەن شىققان قوشەمەتى, قۇرمەتى.
ءتامام جۇرت كىسىلىگىنە ءتانتى بولعان سوڭ جامباسى تيگەن جەرگە مازار سالعان. ءحىح عاسىردىڭ ەرەكشە ءدىني ەسكەرتكىشى. سىرتتاي قاراعاندا ءپىشىنى الىپ جۇمىرتقا ىسپەتتەس دومالاق مازار بوز دالادا بوزارىپ كورىنەتىن كيىز ءۇيدى ەسكە سالادى. قابىرعاسى كوتەرىلىپ كەلىپ, انتەك جيىرىلىپ, تۇيىقتالادى. شيكى كىرپىشتەن تۇرعىزىلعان. بىراق بەرىك, مىقتى. سايىن دالادا سان جىلدار بويى سىرى كەتسە دە, سىنىن جوعالتپاي تۇرعانىنا قاراعاندا, بۇرىنعىلار قۇرىلىستى بەرىك ەتىپ سالا بىلگەن عوي.
جۇماي اۋىلىنا جاقىن ماڭدا ورنالاسقان اق ەدىل مازارى بۇگىنگى كۇنى وتكەننىڭ ونەگەسىن ومىرشەڭ ۇرپاعىنا ۇقتىرىپ, ادالدىق پەن ارلىلىققا, جان تازالىعىنا شاقىرىپ تۇرعانداي.
قورعالجىن اۋدانى,
اقمولا وبلىسى