قازاقستاندىق كاسىپقوي بوكسشى باتىر جۇكەمباەۆ كانادانىڭ مونرەال قالاسىندا وتكەن كاسىبي بوكس كەشىنىڭ باستى جەكپە-جەگىندە شارشى الاڭعا كوتەرىلىپ, مەكسيكالىق ميگەل ۆاسكەستەن ۇپاي سانى بويىنشا باسىم ءتۇستى. سونداي-اق وتانداسىمىز ەكى بىردەي بەلدىككە يە بولدى.
ءبىرىنشى جارتىلاي ورتا سالماقتا ونەر كورسەتكەن قانداسىمىز بۇل جەكپە-جەكتە ەكىنشى دەڭگەيلى WBA Continental جانە IBF Inter-Continental بەلدىگى ءۇشىن مەكسيكالىق تاجىريبەلى بوكسشى ميگەل ۆاسكەسپەن (41-8, 15 كو) جۇدىرىقتاستى. قوس بوكشسى دا 10 راۋند بويى ناعىز ايقاس كورسەتتى. دەگەنمەن ءار راۋندتى ءوز پايداسىنا جازعان وتانداسىمىز تورەشىلەردىڭ ءبىراۋىز شەشىمىمەن جەڭىسكە جەتتى. ءبىر تورەشى 100-90 ۇپايمەن جۇكەمباەۆ جەڭىسكە جەتتى دەپ ەسپتەسە, ەكى تورەشى ءبىر راۋندتا مەكسيكالىق بوكسشى باسىم بولدى دەپ, 99-91 كورسەتكىشىمەن جەڭىستى قازاقستاندىق بوكسشىعا بەرگەن.
بۇعان دەيىن 16 كەزدەسۋ وتكىزىپ, ونىڭ 13-ءىن نوكاۋتپەن اياقتاعان باتىر جۇكەمباەۆ بۇل جولى وتە قارىمدى بوكسشىمەن جەكپە-جەك وتكىزدى دەپ ايتا الامىز. ونىڭ ۇستىنە بۇل رەيتينگتىك ەمەس, بەلبەۋ ءۇشىن بولعان كەزدەسۋدە قارسىلاستىڭ دا دەڭگەيى سوعان ساي بولۋى كەرەك. سونداي-اق 32 جاستاعى مەكسيكالىق بوكسشى 2010 جانە 2014 جىلدار ارالىعىندا جەڭىل سالماقتاعى IBF تۇجىرىمى بويىنشا الەم چەمپيونى اتانعانىن دا ايتا كەتكەن ءجون. ۆاسكەس كاسىپقوي بوكستا الەم چەمپيونى دەگەن اتاعى بار بىرقاتار مىقتى بوكسشىلارمەن ايقاسىپ, مول تاجىريبە جيناقتاعان. اتاپ ايتار بولساق, ول العاشقى جەكپە-جەگىندە قازىرگى تاڭدا ورتا سالماقتاعى WBC, WBA جانە IBF تۇجىرىمى بويىنشا الەم چەمپيونى, قازاقستاندىق بوكس جانكۇيەرلەرىنە جاقسى تانىس ساۋل «كانەلو» الۆارەسپەن ەكى رەت جۇدىرىقتاسقان. 2006 جىلى وتكەن العاشقى ايقاسىندا ءوزىنىڭ وتانداسىنان جەڭىلسە, اراعا ەكى جىل سالىپ الۆارەسپەن قايتا رينگتە جولىقتى. دەگەنمەن بۇل جولى دا «كانەلو» ۇپاي سانىمەن باسىم ءتۇستى. سونىمەن قاتار ۆاسكەس امەريكالىق ايگىلى بوكسشى تيموتي برەدليمەن, ءبىرىنشى جارتىلاي ورتا سالماقتاعى الەم چەمپيونى بريتانيالىق دجوش تەيلورمەن قولعاپ ءتۇيىستىرىپ, ەسە جىبەرگەن. كاسىپقوي بوكستا مول تاجىريبە جيناقتاعان بوكسشىمەن جەكپە-جەك وتكىزىپ, وتانداسىمىزدىڭ جەڭىسكە جەتكەنى اۋىز تولتىرىپ ايتارلىقتاي ناتيجە.
وسىلايشا, جۇكەمباەۆ بۇعان دەيىن جەڭىپ العان ەكىنشى دەڭگەيلى IBO International جانە WBC Continental Americas بەلدىگىنە WBA Continental مەن IBF Inter-Continental تۇجىرىمى بويىنشا ەكى بىردەي بەلبەۋ قوسىپ قويدى. كەشەگى جارقىن جەڭىسىنەن كەيىن جۇكەمباەۆ ءبىرنشى جارتىلاي ورتا سالماقتاعى توپ-20 بوكسشىنىڭ قاتارىنا كىردى. ەگەر جىل سوڭىنا دەيىن تاعى ءبىر جەكپە-جەك وتكىزەتىن بولسا, كەلەسى جىلدان باستاپ ءتورت بەلدىكتىڭ ءبىر تۇجىرىمى بويىنشا چەمپيوندىق بەلدىككە تالاسۋعا تولىق مۇمكىندىك تۋادى.
وتانداسىمىزدىڭ جەكپە-جەگىن تاماشالاعان كانادالىق بوكس تۋرالى جازاتىن The Fight City باسىلىمىنىڭ ءجۋرناليسى مەنني مونرەال باتىردىڭ جەڭىسىن جوعارى باعالادى. «جەكپە-جەك تولىق باتىر جۇكەمباەۆتىڭ باقىلاۋىمەن ءوتتى. دەگەنمەن ونىڭ قارسىلاسىن ءالسىز دەپ ايتا المايمىن. بۇعان دەيىن ءبىراز بەلەستەردى باعىندىرىپ, الەم چەمپيونى دەگەن اتاققا قول جەتكىزگەن وتە اككى بوكسشى. وسى قارقىنىنان تايماسا, باتىر كەلەسى جىلدان باستاپ الەم چەمپيونى اتاعى ءۇشىن جەكپە-جەك وتكىزىپ, دۇنيە ءجۇزىن مويىنداتاتىنا كۇمانىم جوق» دەيدى ول.
سونداي-اق اتالعان بوكس كەشى اياسىندا ورتا سالماق دارەجەسىندە ونەر كورسەتەتىن تاعى ءبىر وتانداسىمىز امان قازانعاپوۆ كەزەكتى جەكپە-جەگىن وتكىزىپ, مەكسيكالىق حەسۋس اررياگيدەن ۇپاي سانى بويىنشا باسىم ءتۇستى.