جاستار جىلى اياسىندا ەلورداعا 120-دان اسا جاستى جيناعان «Jastar Alany 2019» رەسپۋبليكالىق پىكىرسايىسى مارەسىنە جەتتى.
Jas Otan جاستار قاناتى وتكىزگەن جاس شەشەندەر ءتۋرنيرىن ۇيىمداستىرۋعا اقپارات جانە قوعامدىق دامۋ مينيسترلىگى مەن ازاماتتىق باستامالاردى قولداۋ ورتالىعى مۇرىندىق بولدى. ەكى كۇنگە جالعاسقان سايىستىڭ جالپى جۇلدە قورى 4 ميلليون تەڭگەنى قۇرادى. بۇعان ەلىمىزدىڭ بارلىق وڭىرىنەن 133 كوماندا قاتىسۋعا نيەت تانىتىپ, ونىڭ 60-سى ىرىكتەلدى.
Jas Otan جاستار قاناتىنىڭ توراعاسى داۋلەت كارىبەك وسىمەن ەكىنشى رەت سالتانات قۇرعان رەسپۋبليكالىق پىكىرسايىستا تۇشىمدى وي, ورىندى سوزىمەن كوش باستاپ جۇرگەن جاستار قوعامداعى وزەكتى ماسەلەلەردى ورتاعا سالىپ, ءتيىمدى شەشىمدەرىن دە ۇسىنعاندارىن ايتتى.
– «اقىن – ۇلتتىڭ جۇرەگى, باتىر – كوپتىڭ بىلەگى, شەشەن – كوپتىڭ تىرەگى» دەگەن اتام قازاق. ءوز ويىن اشىق ءارى ناقتى جەتكىزە الاتىن, ءاربىر ماسەلەنى جان-جاقتى قاراپ, سىني ويلاي الاتىن جاستاردى قالىپتاستىرۋعا پىكىرتالاس ويىندارى كوپ اسەرىن تيگىزەدى دەپ ويلايمىن. جوبانى ۇيىمداستىرعانداعى نەگىزگى ماقساتىمىز ەلدەگى پىكىرتالاس قوزعالىسىن قايتا جانداندىرۋ, ناعىز ورتا قالىپتاستىرۋ. وسى ءۇشىن ءاربىر پىكىرسايىسشىنىڭ رەيتينگى, تورەشەلەردىڭ دەڭگەيى كورسەتىلەتىن, ويىنداردىڭ فورماتتارى ايقىندالاتىن, ەلدەگى بولاتىن وبلىستىق, رەسپۋبليكالىق پىكىرتالاس ويىندارىنىڭ جوسپارلانعان كەستەلەرى جاريالانىپ تۇراتىن سايتتى ىسكە قوسامىز. سونداي-اق پىكىرسايىسشىلار فەدەراتسياسىن قۇرۋعا كۇش سالامىز, – دەدى د.كارىبەك.
«ازاماتتىق باستامالاردى قولداۋ ورتالىعى» كەاق باسقارما توراعاسىنىڭ ورىنباسارى جانار تولەگەنوۆا اتالعان جوبانىڭ قازاقستانداعى پىكىرتالاستى دامىتۋعا قولداۋ كورسەتۋگە باعىتتالعانىن, بۇل جاستاردىڭ ءوز ويلارىن اشىق ءارى ەگجەي-تەگجەيلى جەتكىزۋگە مۇمكىندىك بەرەتىنىن اتاپ ءوتتى.
نۇر-سۇلتان قالاسىندا ۇزدىك جاستاردىڭ باسىن قوسقان ءتۋرنيردىڭ توپتىڭ كەزەڭى, 1/8, ¼ جانە جارتىلاي فينالدارى ءوتىپ, فينال تەلەۆيزيالىق دەكوراتسيالارمەن شوۋ فورماتىندا ۇيىمداستىرىلدى. سونىمەن جۇزدەن جۇيرىك شىعىپ, 1 ملن تەڭگەلىك باس بايگەنى قازاق ليگاسىنان نازارباەۆ ۋنيۆەرسيتەتىنىڭ ستۋدەنتتەرى ەرداۋلەت تاستانبەك پەن اسەل يبادۋللا جەڭىپ الدى. ال ورىس ليگاسىندا ءاليحان قازەنوۆ پەن قانات نوعايباەۆ توپ جاردى.
الداعى ۋاقىتتا بۇل دەبات ويىندارىنىڭ تەلەۆيزيالىق نۇسقاسى كورەرمەنگە جول تارتادى. بۇعان قوسا ءۇoutube جەلىسىندە تولىق جاريالانادى.