ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ الماتى قالاسىنىڭ الەۋمەتتىك ۇيىمدارى مەن جۇمىسپەن قامتۋ ورتالىقتارىندا پرەزيدەنت قاسىم-جومارت توقاەۆتىڭ قازاقستان حالقىنا جولداۋىنىڭ نەگىزگى باعىتتارىن ءتۇسىندىردى. كەزدەسۋ ۆيتسە-پرەمەر بەردىبەك ساپارباەۆتىڭ الماتىعا جۇمىس ساپارى اياسىندا ۇيىمداستىرىلدى.
ب.نۇرىمبەتوۆ ەڭ الدىمەن قالاداعى «№1 ارناۋلى الەۋمەتتىك قىزمەتتەردى كورسەتۋ ورتالىعى» كمم بولىمشەسى – ء«وز الدىنا دەربەس تۇرۋ ءۇيىنىڭ» جۇمىسىمەن تانىستى. بۇل ۇيىم 18 جاستان اسقان پسيحونەۆرولوگيالىق اۋرۋلارى بار ادامدارعا ارنايى الەۋمەتتىك قىزمەتتەر كورسەتەدى. ۇيىم قىزمەتىمەن جان-جاقتى تانىسقان مينيستر سودان سوڭ 3-تەن 18 جاسقا دەيىنگى I-II توپتاعى مۇگەدەك بالالارعا ارنالعان «№2 ارناۋلى الەۋمەتتىك قىزمەتتەردى ۇسىنۋ ورتالىعى» مەكەمەسىندە بولدى.
اتالعان ۇيىمداردىڭ جەتەكشىلەرىمەن كەزدەسۋ بارىسىندا ب.نۇرىمبەتوۆ پرەزيدەنت قاسىم-جومارت توقاەۆتىڭ سايلاۋالدى باعدارلاماسىندا بەلگىلەنگەن نەگىزگى مىندەتتەردىڭ ءبىرى مۇگەدەكتەرگە كورسەتىلەتىن الەۋمەتتىك قىزمەتتەردىڭ ساپاسىن جاقسارتۋ جانە ولاردىڭ قولجەتىمدىلىگىن قامتاماسىز ەتۋ ەكەنىن اتاپ ءوتتى. مەملەكەت باسشىسى «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىندا ەرەكشە قاجەتتىلىكتەرى بار ادامدار ءۇشىن تەڭ مۇمكىندىكتەر جاساۋعا ەرەكشە نازار اۋداردى.
«وسى جىلعى مامىر ايىندا مۇگەدەكتىگى بار ادامداردىڭ قۇقىقتارىن قامتاماسىز ەتۋ جانە ءومىر ءسۇرۋ ساپاسىن جاقسارتۋ جونىندەگى 2025 جىلعا دەيىنگى جاڭا ۇلتتىق جوسپار قابىلداندى. وعان الەۋمەتتىك قورعاۋ, ءبىلىم بەرۋ, دەنساۋلىق ساقتاۋ جانە الەۋمەتتىك قىزمەتكەرلەردىڭ بىلىكتىلىگىن ارتتىرۋدىڭ كەشەندى شارالارى كىرەدى. بۇگىنگى باستى مىندەتىمىز – ۇلتتىق جوسپاردا كورسەتىلگەن ءىس-شارالاردى بارلىق دەڭگەيدە ساپالى ىسكە اسىرۋ, مۇگەدەكتىگى بار ادامداردى تەحنيكالىق قۇرالدارمەن جانە وڭالتۋ قىزمەتتەرىمەن قامتاماسىز ەتۋ. ولاردىڭ ءومىر ءسۇرۋ ساپاسىن ارتتىرۋ, تاۋەلسىزدىككە قول جەتكىزۋ, الەۋمەتتىك جانە كاسىبي قابىلەتتەرىن ساقتاۋ جانە ولاردى ءومىردىڭ بارلىق سالالارىنا ەنگىزۋ», دەدى مينيستر.
سونداي-اق ب.نۇرىمبەتوۆ الماتى قالاسىنىڭ حالىقتى جۇمىسپەن قامتۋ ورتالىعىندا بولىپ, ۆوكزال ماڭى الاڭىندا ورنالاسقان موبيلدى جۇمىسپەن قامتۋ ورتالىعىنىڭ جۇمىسىمەن تانىستى. جۇمىسپەن قامتۋ ورتالىعى قىزمەتكەرلەرىنىڭ الدىندا سويلەگەن سوزىندە مينيستر حالىقتى جۇمىسپەن قامتۋدى قامتاماسىز ەتۋ مينيسترلىك ءۇشىن عانا ەمەس, جەرگىلىكتى اتقارۋشى ورگاندار ءۇشىن دە ماڭىزدى مىندەتتەردىڭ ءبىرى بولىپ سانالاتىنىن اتاپ ءوتتى.
«قابىلدانعان شارالاردىڭ ناتيجەسىندە ەلدەگى جۇمىسسىزدىق دەڭگەيى 4,8%-دان اسپايدى. الايدا قول جەتكىزىلگەن ناتيجەلەرمەن توقتالىپ قالماۋىمىز قاجەت. مەملەكەت باسشىسى ءوز جولداۋىندا بيزنەستى قولداۋدىڭ جاڭا نىساندارىن بەلسەندى تۇردە ەنگىزۋ قاجەتتىگىن, ەڭ الدىمەن, كوپ بالالى جانە تابىسى از وتباسىلار ءۇشىن وتباسىلىق بيزنەس قۇرۋعا الەۋمەتتىك اسپەكتىلەرگە باسا نازار اۋدارۋ قاجەت ەكەنىن اتاپ ءوتتى. 2017 جىلدان باستاپ قازاقستاندا ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ «ەڭبەك» مەملەكەتتىك باعدارلاماسى جۇزەگە اسىرىلۋدا. ونىڭ نەگىزگى باعىتتارىنىڭ ءبىرى – ميكروكرەديتتەر, سونداي-اق قايتارىمسىز نەگىزدە مەملەكەتتىك گرانتتار بەرۋ ەسەبىنەن ازاماتتاردىڭ كاسىپكەرلىك باستاماشىلىعىن دامىتۋ بولىپ تابىلادى. بۇل جۇمىستى جانداندىرۋ قاجەت, سونىمەن قاتار ازاماتتاردى باسقا باعىتتاعى ىسكە اسىرۋ شارالارىمەن قامتۋ, ياعني جۇمىسسىزداردى مۇمكىندىگىنشە قوعامدىق جۇمىسقا تارتۋ, ولاردى قىسقا مەرزىمدى وقۋ كۋرستارىنا جىبەرۋ, الەۋمەتتىك جۇمىس ورىندارىن قۇرۋ, وقۋ ورىندارىنىڭ تۇلەكتەرىنە العاشقى كاسىبي تاجىريبەلەرىن الۋ ءۇشىن جاستار پراكتيكاسىن ۇسىنۋ كەرەك», دەدى ب.نۇرىمبەتوۆ.
كەزدەسۋ سوڭىندا مينيستر جۇمىسپەن قامتۋ ورتالىعى تابىسى از وتباسىلاردىڭ ەڭبەككە قابىلەتتى مۇشەلەرىن بەلسەندى جۇمىسپەن قامتۋعا بارلىق كۇش-جىگەرىن جۇمساۋ كەرەكتىگىن ايتتى.