پارلامەنت سەناتىنىڭ توراعاسى داريعا نازارباەۆا مەن رەسەي فەدەراتسياسى مەملەكەتتىك دۋماسىنىڭ توراعاسى ۆلاديمير ۆولودينمەن, فەدەرالدىق جينالىستىڭ فەدەراتسيا كەڭەسى توراعاسىنىڭ ورىنباسارى يلياس ۋماحانوۆپەن كەزدەسۋى بارىسىندا قازاقستان مەن رەسەي ىنتىماقتاستىعىن تەرەڭدەتە ءتۇسۋدىڭ كەلەشەگى تالقىلاندى. بۇل تۋرالى ۆەدومستۆونىڭ ءباسپاسوز قىزمەتى حابارلادى.
جۇزدەسۋشىلەر ەكىجاقتى قاتىناستاردىڭ وڭ قارقىنىن ايتا كەلىپ, قازاقستاننىڭ ەلورداسىندا ءوتىپ جاتقان ەۋرازيا ەلدەرى پارلامەنتتەرى سپيكەرلەرى كەڭەسىنىڭ ماڭىزىن اتاپ ءوتتى.
داريعا نازارباەۆا ەكى ەلدىڭ جوعارعى پالاتالارىنىڭ اراسىنداعى ىنتىماقتاستىق كوميسسياسىنىڭ تيىمدىلىگىن اتاپ ءوتتى. كوميسسيا مۇشەلەرى ۇلتتىق زاڭنامالاردى جاقىنداستىرا تۇسۋدەگى ناقتى ۇسىنىمدار ازىرلەۋدە اۋقىمدى جۇمىس اتقاردى.
جوعارعى پالاتا باسشىسى ەكولوگيا جانە وزەندەردى قورعاۋ ماسەلەلەرى جونىندەگى ەكىجاقتى ىنتىماقتاستىقتى تەرەڭدەتە ءتۇسۋ قاجەتتىگىنە رەسەيلىك ارىپتەستەرىنىڭ نازارىن اۋداردى. قولدانىستاعى نورماتيۆتىك-قۇقىقتىق بازا قازىرگى زامانداعى قاتەرلەرگە جانە جايىق وزەنىندە قالىپتاسقان جاعدايعا سايكەس كەلمەيدى. «قازاقستان مەن رەسەيدىڭ ەكولوگيا مەن تابيعاتتى پايدالانۋ زاڭنامالارىن ۇيلەستىرەتىن ۋاقىت كەلدى. ۇلگى زاڭداردى ازىرلەپ, قابىلداۋ قاجەت», - دەدى سەنات توراعاسى.
د.نازارباەۆانىڭ پىكىرىنشە, كيبەرقاۋىپسىزدىك سالاسىنداعى ۇلگى زاڭناماسىن ازىرلەۋ جانە ەاەو اياسىنداعى اقپاراتتىق ساياساتتى بەلسەندەندىرۋ قاجەت. «ەاەو شەڭبەرىندە كوپتەگەن ينتەگراتسيالىق ماسەلەلەر بار, بىراق اقپارات كەڭىستىگىندە ولار تالقىلانباي كەلەدى. ەاەو-دا بولىپ جاتقان جاعدايلاردان, قانداي شەشىمدەر قابىلدانىپ جاتقانىنان حابارسىزدىق بار», - دەدى سەنات توراعاسى.
ۆلاديمير ۆولودين ەكولوگيالىق جانە سۋ رەسۋرستارىن پايدالانۋ زاڭناماسىن جاقىنداستىرا ءتۇسۋ ماسەلەلەرىن ايماقارالىق ءىس-قيمىل اياسىندا تالقىلاۋ قاجەتتىگىن اتاپ ءوتتى. ول سونداي-اق اقپاراتتىق قاۋىپسىزدىك تۋرالى زاڭ جوباسى ازىرلەنگەنىن حاباردار ەتتى.
تاراپتار پارلامەنتارالىق ىنتىماقتاستىقتى جاڭا قالىپقا ءتۇسىرۋ تۋرالى ايتا وتىرىپ, «ناقتىلىققا كوشۋ جانە سوڭعى ناتيجەگە قول جەتكىزۋ قاجەت» دەگەن ورتاق پىكىرگە كەلدى.
كەزدەسۋ اياسىندا پارلامەنتارالىق ۇيىمدار, اتاپ ايتقاندا ەكپا اياسىنداعى ءوزارا ء ىس-قيمىل, سيريالىق داعدارىستى رەتتەۋ جانە ەكونوميكالىق ىنتىماقتاستىقتى تەرەڭدەتە ءتۇسۋدىڭ كەلەشەگى تالقىلاندى.