موڭعوليا رەسپۋبليكاسى باي-ولكە ايماعىنىڭ ورتالىعى ولگەي قالاسىندا ورنالاسقان اقىن-دراماتۋرگ, ولكەنىڭ جاڭا نيزام ادەبيەتىنىڭ نەگىزىن قالاۋشىلاردىڭ ءبىرى اقتان بابي ۇلى اتىنداعى ورتالىق كىتاپحانانىڭ 70 جىلدىق مەرەيتويى قارساڭىندا, اتالعان ولكەدە قازاقستان ادەبيەتى مەن مادەنيەتى ورتالىعى اشىلدى.
بۇل شارا ەكى مەملەكەت كىتاپحانالارى اراسىندا كەلىسىلگەن مەموراندۋم ناتيجەسىندە ىسكە اسىپ وتىر. يدەيا اۆتورلارىنىڭ ءبىرى – ەلوردا تورىندە ورىن تەپكەن ۇلتتىق اكادەميالىق كىتاپحانا ديرەكتورى ءۇمىتحان داۋرەنبەكقىزى. «اتالعان جوبا ەلىمىزدىڭ مادەنيەت جانە سپورت مينيسترلىگى جانە سىرتقى ىستەر مينيسترلىگىنىڭ اتسالىسۋىمەن ورىندالىپ وتىر», دەيدى ۇيىمداستىرۋشىلار.
جاڭادان اشىلعان ورتالىققا «اتاجۇرتتان رۋحاني تارتۋ» اكتسياسى بويىنشا جيناستىرىلعان ساياسات, ەكونوميكا, تاريح, سالت-ءداستۇر جانە ەلىمىزدىڭ تابيعي كوركەم لاندشافتى ايماعى قامتىلعان ءارتۇرلى تاقىرىپتاعى 200 دانا كىتاپپەن قوسا, «وتانداستار قورى» كەاق مەن «فوليانت» باسپاسى اتىنان 500 دانا كىتاپ جەتكىزىلدى.
مۇنداعى ماقسات – قازاقستاندىق اۆتورلاردى جاھاندىق ادەبي ۇردىسكە ينتەگراتسيالاۋ, قازاق حالقىنىڭ تاريحى مەن مادەنيەتىن, سالت-ءداستۇرىن, ساياساتىن, زاماناۋي پروزا مەن پوەزياسىن شەت ەلدەردە ناسيحاتتاۋ.
بۇگىنگى تاڭدا مۇنداي ورتالىق – كورەيا, قىرعىز رەسپۋبليكاسى, فينليانديا, ۆەنگريا, رەسەي فەدەراتسياسى, ارمەنيا, مالايزيا, تۇركيا, قىتاي, گرۋزيا, فرانتسيا, جاپونيا, شۆەتسيا, ماكەدونيا, بولگاريا, چەحيا, يتاليا, اقش (نيۋ - يورك كوپشىلىك كىتاپحاناسى جانە كونگرەسس كىتاپحاناسى), ياكۋتيا, چۋۆاشيا, رۋمىنيا, يران, ارگەنتينا, برازيليا, ۋدمۋرتيا, گەرمانيا, يسپانيا, وزبەكستان قاتارلى 31 شەت ەلدە اشىلۋ ۇستىندە كورىنەدى.