بۇگىن ۇكىمەتتىڭ ءباسپاسوز ورتالىعىندا وتكەن ءباسپاسوز كونفەرەنتسياسى بارىسىندا ەنەرگەتيكا ۆيتسە-ءمينيسترى سۇڭعات ەسىمحانوۆ ەلەكتر جەلىلەرىن جاڭعىرتۋ جانە جىلىتۋ ماۋسىمىنا دايىندىق جۇمىستارى تۋرالى ايتىپ بەردى.
ونىڭ ايتۋىنشا, قازاقستاندا ەلەكتر جەلىلەرىن جاڭعىرتۋ شتاتتىق رەجيمدە جۇرگىزىلىپ جاتىر.
«بارلىق جەتەكشى ۇيىمدار تابيعي مونوپوليالار سۋبەكتىلەرى بولىپ تابىلادى جانە ولاردى تابيعي مونوپوليالار كوميتەتى رەتتەيدى, سوندىقتان بەكىتىلگەن ينۆەستيتسيالىق باعدارلامالارى بار ءتيىستى ورتاشا مەرزىمدى تاريفتەر بار. سوندىقتان تاريف ارقىلى ايتارلىقتاي ماڭىزدى جاڭعىرتۋ جۇمىستارى جۇرگىزىلىپ جاتىر, سونىمەن قاتار جەرگىلىكتى اتقارۋشى ورگانداردىڭ ەسەبىنەن سالىنىپ جاتقان جاڭا قۇرىلىس بار. سونداي-اق, ءىرى قالالاردىڭ ماڭىنداعى مەكەندەردە مەملەكەت جاڭا ەلەكتر جەلىلەرىنىڭ قۇرىلىسىن قارجىلاندىرادى, بۇل تۇرعىدان باقىلاۋ جاسالعان»,- دەدى ەنەرگەتيكا ۆيتسە-ءمينيسترى.
سونىمەن بىرگە, س. ەسىمحانوۆ بۇگىندە 428 قازاندىق جوندەۋدەن وتكەنىن, بۇل جىلدىق جوسپاردىڭ 93 پايىزىن قۇرايتىنىن ايتتى.
ء«بىزدىڭ ەلىمىزدە مەكتەپتەر مەن اۋرۋحانالاردا اۆتونومدى قازاندىقتار وتە كوپ, سوندىقتان جىلۋمەن قامتاماسىز ەتۋدە پروبلەمالار بولمايدى. سونداي-اق, قاۋىپسىزدىك شارالارى بويىنشا قازاندىقتار بولەك تۇرۋى ءۇشىن ولاردى جەرتولەدەن شىعارۋ جۇمىستارى جۇرگىزىلىپ جاتىر»,- دەدى ۆيتسە-مينيستر.
سونىمەن قاتار, س. ەسىمحانوۆ جىلۋ جەلىلەرىنىڭ تەمپەراتۋرالىق كەستەلەرى ەنەرگەتيكا مينيسترلىگى مەن ەنەرگەتيكالىق قاداعالاۋ كوميتەتىنىڭ سايتتارىندا جاريالانعانىن اتاپ ءوتتى. اتالعان كەستەلەر ساقتالماعان جاعدايدا, ەڭ الدىمەن, تەمپەراتۋرالىق جاعدايدى قامتاماسىز ەتەتىن جىلۋ بەرۋشى ۇيىمدارمەن بايلانىس ورناتۋ قاجەت. اكىمدىكپەن بىرگە قاجەتتى ورىندارعا بارىپ, سەبەپتەرىن انىقتايتىن كوميسسيالار قۇرىلادى.
«مۇنداي جۇگىنۋلەر ءبىزدىڭ ەنەرگەتيكالىق قاداعالاۋ كوميتەتىمىزگە دە كەلىپ جاتادى. ونداي كەزدە ءبىزدىڭ اۋماقتىق دەپارتامەنتتەرىمىز دەرەۋ ماسەلەنى انىقتاۋعا بارادى. سوندىقتان دا اۋماقتىق ەنەرگەتيكالىق قاداعالاۋ دەپارتامەنتتەرىنە قوسىمشا حابارلاسۋعا بولادى. بارلىق مالىمەتتەر مەن كوورديناتتار سايتتا جاريالانعان», - دەدى ۆيتسە-مينيستر.