قورجىندا – تاعى ءبىر قولا

ياعني, رەسەي, گەرمانيا, وزبەك­ستان, يران قۇراما­لا­رىنىڭ ءاربىرى ءۇش-ۇشتەن لي­تسەن­زياعا يە بولسا, قازاقستان, كۋبا, سەربيا, ۆەنگريا, ار­مەنيا, ۋكراينا, تۇركيا, گرۋ­زيا ەلدەرىنىڭ ارقايسىسىنا 2 جولداما, جاپونيا, مىسىر, دانيا, شۆەتسيا, قىرعىزستان, بەلارۋس, پولشا, ەستونيا رەسپۋبليكالارىنا ءبىر-بىردەن ۇلەس بۇيىردى.

كەشە كەشكىسىن جوعارىداعى ەلىمىزگە بۇيىرعان قوس جولداما يەسى – مەيرامبەك ايناقۇلوۆ پەن اسحات دىلمۇحانبەتوۆ چەمپيوناتتىڭ قولا جۇلدەسى ءۇشىن كىلەمگە شىقتى.

بۇعان دەيىن ەكىنىڭ ءبىرى قولى جەتە بەرمەيتىن بيىك مەجە – 2017 جىلى پاريج قا­لاسىندا وتكەن الەم چەمپيوناتى مەن نيۋ-دەليدەگى ازيا بىرىنشىلىگىنەن قوس كۇمىس مەدالعا قول جەتكىزگەن مەي­رامبەك العاشقى اينالىم­دا قازاقستان تۋماسى, قازىرگى تاڭدا برازيليا اتىنان ونەر كورسەتىپ جۇرگەن ساقا بالۋان مارات گاريپوۆتى قينالماي جەڭدى. ەكىنشى اينالىمدا ليتۆالىق يۋ. پەترايكيۋستى 4:2 ەسەبىمەن ۇتىپ, شيرەك فينالدىق بەلدەسۋ باسەكەسىندە حورۆاتيالىق ليزا­توۆيكتى 10:0 ۇپايىمەن ەركىن ەڭسەردى. بىراق فينالدىق باسەكە ءۇشىن رەسەيلىك سپورتشى, 2018 جىلعى الەم جانە ەۋروپا چەمپيونى سەرگەي ەمەليننەن جەڭىلىپ قالدى. ال قولا مەدال ءۇشىن مەيرامبەك ۋكراينالىق بالۋان, 2018 جىل­عى الەم بىرىنشىلىگىندە قولا مەدال يەگەرى اتانعان لەنۋر تەميروۆپەن بەلدەسۋدىڭ ءساتى ءتۇستى. ءسويتىپ 60 كيلو سال­ماق دارەجەسىندە الەمدىك دو­داعا تۇسكەن م.ايناقۇلوۆ قار­سىلاسىن 10:0 ەسەبىمەن ەڭسەرىپ قورجىنىمىزعا قولا مەدال سالدى.

ال قولا جۇلدەگە تالاسا­تىن ەكىنشى بالۋانى­مىز 77 كيلو سالماقتا كۇرەس­كەن وت­كەن جىلعى ازيا بىرىنشىلى­گىنىڭ جەڭىمپازى اسحات دىل­مۇحانبەتوۆ. ول العاشقى اي­نالىمدا چەح بالۋانى ولدريچ ۆارگانى بار-جوعى ەكى مي­نۋتتىڭ ىشىندە 9:0 ەسەبىمەن ۇتىپ, ەكىنشى كەزەكتە رەسەيلىك اتاقتى بالۋان ەكى دۇركىن وليم­پيادا جانە الەم چەمپيونى, ءتورت دۇركىن ەۋروپا جەڭىمپازى رومان ۆلاسوۆپەن جولى ءتۇيىستى. اتاقتى بالۋانمەن قايمىقپاي كۇرەسكەن قازاق بالاسى كۇرەس تاكتيكاسىن دۇرىس ۇيلەستىرە ءبىلۋىنىڭ ارقاسىندا جەڭىسكە جەتتى. ەسەپ 3:0.

اسحات جارتىلاي فينالدىق باسەكەدە سەربيا ماقتانىشى 2017 جىلى پاريجدە وتكەن الەم چەمپيوناتىنىڭ جەڭىم­پازى ۆيكتور نەمەشپەن بەل­د­ەستى. ناتيجەسىندە كۇرەس تاع­دىرى 4:3 ەسەبىمەن ءبىزدىڭ جى­گىتتىڭ پايداسىنا شەشىلدى. وسىلاي الەمنىڭ ەكى مىقتىسىن جارىس جولىنان شىعارعان دىلمۇحانبەتوۆ فينالدىق باسەكەدە تانىمال ماجار بالۋانى, وليمپيادانىڭ كۇمىس جۇلدەگەرى, الەم بىرىنشىلىگىنىڭ ەكى دۇركىن قولا مەدال يەگەرى, ەۋروپانىڭ ءۇش دۇركىن چەمپيو­نى تاماش لورينتستەن جەڭىلىس تاپتى. ال جۇلدەلى ورىن ءۇشىن وزبەك­ستاندىق جالعاسباي بەردى­مۇراتوۆپەن كۇرەسىپ, ناتيجە­سىندە قارسىلاسىنا 3:1 ۇپايى­مەن ەسە جىبەرىپ 5-ورىندى قا­ناعات تۇتتى.

وسىلاي گرەك-ريم كۇرەس ءستيلى اياقتالعاننان كەيىن ايەل­دەر كۇرەسى جالاۋىن كوتەرىپ, 6 لي­تسەنزيالىق سالماق (50, 53, 57, 62, 68, 76 كيلو) جانە جول­داما بەرىلمەيتىن 4 سالماق (55, 59, 65, 72 كيلو) ساناتتارى بويىنشا بەلدەسۋ باستالدى. جا­رىستىڭ ءبىرىنشى كۇنى جەرلەستەرىمىز ۆ.يسلاموۆا (50 كيلو), ت.احمەتوۆا (53 كيلو), م.سەد­نەۆا (55 كيلو), ج.باق­بەر­گەنوۆا (72 كيلو) ونەر كور­سەتتى.

جارىستىڭ الدىندا ايەل­دەر كۇرەسىنەن ەلىمىزدىڭ باس باپكەرى, وليمپيادانىڭ ءۇش دۇركىن جۇلدەگەرى, ازيا ويىن­دارىنىڭ جانە ازيا چەمپيونى گۇزەل مانيۋروۆا, توكيوعا جولداما الۋ وڭاي بولمايتىنىن ايتقان بولاتىن. «ارينە مەدالدان ءۇمىتتىمىز. ول ءۇشىن بالۋاندارعا بارلىق جاع­داي جاسالدى. ەڭ باستىسى, ايەلدەر كۇرەسى بويىنشا ەرەجە وزگەردى. مۇنىڭ دا اسەرى بار. سونىمەن قاتار جاڭادان باسەكەلەس مەملەكەتتەر پايدا بولىپ جاتىر. كوپ دۇنيە جەرەبەگە بايلانىستى. جەرەبە ءساتتى تۇسسە, مەدال دا بولادى. دەسە دە «ۇيدە» كۇرەسۋدىڭ ءوز ارتىقشىلىقتارى بار» دەگەن بولاتىن گۇزال تاھيرقىزى.

سونىمەن جوعارىدا ايت­قا­نىمىزداي, ءتورت سالماق­تا بەلدەسكەن بالۋان قىز­دا­رىمىزدىڭ اراسىنان 50 كي­لوداعى مارينا سەدنەۆا مەن 72 كيلوداعى ءجاميلا باقبەرگەنوۆا قارىنداسىمىز جارتىلاي فينالعا وتسە دە, سالماقتارى وليمپيادالىق ەمەس بولعاندىقتان جولداما بۇيىرمادى. ال 50 كيلو سالماقتا ەلىمىز اتىنان بەلدەسكەن رەسەيلىك لەگيونەر قىز ۆالەنتينا يسلاموۆا ءبىرىنشى بولىپ ليتسەنزياعا قول جەتكىزدى. بىراق بۇل قا­رىنداسىمىز فينالدىق بەلدەسۋ ءۇشىن بولعان كۇرەستە رۋمىنيالىق ە.بۋچتەن 6:6 ەسەبىمەن ۇتىلدى. بىراق ءالى دە بولسا قولا جۇلدە ءۇشىن كۇرەسەتىن مۇمكىندىگى بار. سو­نىمەن بىرگە 55 كيلودا بەلدەسكەن مارينا سەدنەۆا دا جوعارىداعى ارىپتەسىنىڭ جولىن قۇشىپ, فينالعا ءوتۋ جولىندا جاپون قىزى ن.يريەگە 10:0 ەسەبىمەن جول بەردى. ال 72 كيلودا كۇرەسكەن ءجاميلا باقبەرگەنوۆا رەسەيلىك اتاق­تى بالۋان, لوندون وليم­پياداسىنىڭ چەمپيونى نا­تاليا ۆوروبەۆادان جەڭىلىپ, فينالعا شىعۋ جولى كەسىلدى.

قازىرگى جاعدايدا, قىتاي ازەربايجان, رۋمىنيا, قازاق­­ستان, سولتۇستىك كورەيا, جا­پونيا جانە گرەكيا قىز­دارىنا 8 وليمپيادالىق جولداما بۇ­يىرىپ تۇر. قالعان جولدامالار بۇگىن جانە ەرتەڭ ساراپ­قا سالىنادى.

سۋرەتتە: الەم چەمپيو­ناتى­نىڭ قولا جۇلدەگەرى مەيرامبەك ايناق­ۇلوۆ