جاس ۇرپاقتىڭ سىبايلاس جەمقورلىققا قارسى مادەنيەتىن قالىپتاستىرۋ ماقساتىندا زەرەندى اۋدانىنىڭ «پارۋس» دەمالىس ورتالىعىندا «ادال ۇرپاق» ەرىكتى مەكتەپ كلۋبتارىنىڭ ءۇشىنشى وبلىستىق سلەتى ءوتتى.
ءىس-شارانى اقمولا وبلىسى بويىنشا سىبايلاس جەمقورلىققا قارسى ءىس-قيمىل دەپارتامەنتى مەن وبلىستىق ىشكى ساياسات جانە ءبىلىم باسقارمالارى ۇيىمداستىردى. ەكى كۇنگە سوزىلعان سلەتكە وبلىستىڭ 19 وڭىرىنەن جينالعان 100-دەن استام وقۋشى قاتىستى. ولاردىڭ ىشىندە «ادال ۇرپاق» ەرىكتى مەكتەپ كلۋبتارىنىڭ مۇشەلەرى مەن وقۋشىلار اراسىنداعى جەمقورلىققا قارسى مادەنيەتتى قالىپتاستىرۋ بويىنشا قالالىق جانە اۋداندىق كونكۋرستاردىڭ جەڭىمپازدارى بار. سونىمەن قاتار «ادال ۇرپاق» مەكتەپ كلۋبتارىنىڭ اۋداندىق جانە قالالىق قوعامداستىقتارىنىڭ باسشىلارى, قوعامدىق بىرلەستىكتەر مەن قورلاردىڭ وكىلدەرى قاتىستى.
سلەتتىڭ باعدارلاماسى وتە قىزىقتى بولدى. شارانىڭ العاشقى كۇنىندە وبلىستىڭ بارلىق مەكتەپتەرىندە اشىلعان پاراساتتىلىق جانە ادالدىق مەكتەپتەرىن قولداۋعا باعىتتالعان «جارقىن بولاشاق» اتتى بي مارافونى ءوتتى. بۇدان كەيىن وقۋشىلار توپتارعا ءبولىنىپ «ادال جول» كۆەست-ويىنىنا قاتىستى. «ادال ۇرپاق» كلۋبتارىنىڭ «PechaKucha» فورماتىنداعى پرەزەنتاتسيالىق جوبالاردى تانىستىرۋ ءراسىمى, سپورت جارىستارى, كوۋچ-باپكەرلەردىڭ جانە مەنتورلاردىڭ قاتىسۋىمەن شەبەرلىك ساعاتتار وتكىزىلدى. قاتىسۋشىلارعا «ادال ۇرپاق» ەرىكتى مەكتەپ كلۋبتارىنىڭ ءۇشىنشى وبلىستىق سلەتىنە قاتىسقانى ءۇشىن ارنايى سەرتيفيكاتتار تابىستالدى.
اقمولا وبلىسى