كوكشەتاۋ قالالىق كوپ بەيىندى اۋرۋحاناسى جانە قالالىق ەمحانا قىزمەتكەرلەرىنە «SENIM» دەنساۋلىق ساقتاۋ جۇيەسى جۇمىسكەرلەرىنىڭ سالالىق كاسىپتىك وداعى» رەسپۋبليكالىق قوعامدىق بىرلەستىگىنىڭ اتىنان تۇرعىن ءۇي سەرتيفيكاتتارى تابىس ەتىلدى.
مۇنداي يگىلىكتى ءىستىڭ شاراپاتىن كورگەن جانداردىڭ ءبىرى كوكشەتاۋ قالالىق كوپ بەيىندى اۋرۋحاناسىنىڭ مەملەكەتتىك ساتىپ الۋلار جونىندەگى مەنەدجەرى اسەم قاپاروۆا. دەنساۋلىق ساقتاۋ سالاسىندا ءتورت جىلعا جۋىق ەڭبەك ەتىپ كەلە جاتقان ول «SENIM» دەنساۋلىق ساقتاۋ جۇيەسى جۇمىسكەرلەرىنىڭ سالالىق كاسىپتىك وداعى اشىلعان كۇننەن باستاپ وسى ۇيىمعا تىركەلىپتى. «7-20-25» باعدارلاماسىنا قاتىسۋ ءۇشىن اتالعان سالالىق كاسىپتىك وداقتىڭ اقمولا وبلىستىق فيليالىنىڭ توراعاسى سەرىك كاكەنوۆ اسەم قاپاروۆاعا 1 312 000 تەڭگەنىڭ سەرتيفيكاتىن سالتاناتتى جاعدايدا تابىس ەتتى. جالپى, بۇگىنگى تاڭدا وبلىسىمىز بويىنشا كاسىپوداقتىڭ ءۇي كەزەگىندە 76 مەديتسينا قىزمەتكەرى تۇر.
– ءبىزدىڭ كاسىپوداق مەديتسينا سالاسى ماماندارىن باسپانامەن قامتىلۋىنا كومەكتەسۋ ماقساتىندا بانككە ءۇيدىڭ العاشقى 20 پروتسەنت جارناسىن سالۋ ءۇشىن سەرتيفيكاتتار بەرۋ ءىسىن قولعا الدىق. بيىل وبلىستىق بالالار اۋرۋحاناسىنىڭ جانە №1 كوكشەتاۋ قالالىق ەمحاناسىنىڭ ەكى قىزمەتكەرىنە وسىنداي سەرتيفيكات تابىس ەتتىك, – دەيدى سەرىك كاكەنوۆ.
تۇرعىن ءۇي سەرتيفيكاتتارىنان بولەك مەديتسينا ماماندارىنا 500 مىڭ تەڭگە كولەمىندە قايىرىمدىلىق سەرتيفيكاتتارى بەرىلدى. تاياۋدا مەديتسينا سالاسىنىڭ قىزمەتكەرلەرىنە تاعى ون قايىرىمدىلىق سەرتيفيكاتتارى تاپسىرىلماق.
سونداي-اق بۇل كۇنى كوكشەتاۋ قالالىق ەمحاناسىنىڭ بولىمشە مەڭگەرۋشىسى, گاستروەنتەرولوگ دارىگەرى مارال عيزاتوۆاعا 2 250 000 تەڭگەنىڭ سەرتيفيكاتى بەرىلدى. يگىلىكتى ءىس ءالى دە جالعاسىن تابادى.