ەلوردادا «Kazakh Tourism» ۇلتتىق كومپانياسى مەن «QazaqGeography» رەسپۋبليكالىق قوعامدىق بىرلەستىگى ۇيىمداستىرعان «جىبەك جولى – ديالوگ جولى» حالىقارالىق ەكسپەديتسياسى قورىتىندىلاپ, باق وكىلدەرىنىڭ قاتىسۋىمەن ءباسپاسوز جيىنى ءوتتى.
«جىبەك جولى – ديالوگ جولى» حالىقارالىق ەكسپەديتسياسى 20 تامىزدا الماتى قالاسىنان باستاۋ الىپ, 1 قىركۇيەكتە الماتىدا مارەسىنە جەتكەن. وسى ارالىقتا ەكسپەديتسياعا قاتىسۋشىلار قازاقستان, قىرعىز رەسپۋبليكاسى, وزبەكستاندا كەلەسى باعىتتار بويىنشا جول ءجۇرىپ وتكەن. قاتىسۋشىلاردىڭ ەرەكشە ساياحاتى الماتى وبلىسىنىڭ كورىكتى جەرلەرى ۇلكەن الماتى كولى, مەدەۋ, شىمبۇلاق, شارىن شاتقالدارىنان باستالعان. ودان ءارى «تيان-شاننىڭ كوك مارجاندارى» اتالىپ كەتكەن كولساي كولدەرىنە قاراي جول تارتتى. ءۇشىنشى كۇنى قىرعىز رەسپۋبليكاسىنا اسىپ, ءۇش كۇن بويى قاتىسۋشىلار ىستىقكولدىڭ اكىمشىلىك ورتالىعى جانە قاراقول قالاسىن, جەتى وعىز شاتقالىن, تەرىسكەي الاتوو جوتاسىنىڭ سولتۇستىك باۋرايىندا ورنالاسقان بارسكوون شاتقالىن ارالادى.
ءارى قاراي قاتىسۋشىلار ۇلى جىبەك جولىنىڭ ورتالىعىندا ورنالاسقان ازيا مەن ەۋروپا اراسىنداعى ساۋدا جولدارىن بىرىكتىرگەن ەجەلگى تارازعا تابان تىرەدى. مۇندا ولار كوپتەگەن تاريحي ەسكەرتكىشتەر مەن قاراحان, باباجي-حاتۋن جانە ايشا ءبيبى كەسەنەلەرىن, اقىرتاس جانە ەجەلگى تاراز ارحەولوگيالىق كەشەنىمەن تانىستى. ودان ءارى ەكسپەديتسيا مۇشەلەرى وزبەكستاننىڭ تاشكەنت جانە سامارقان سەكىلدى تاريحي قالالارىن ارالادى.
جۋرناليستەر, فوتوتىلشىلەر, تۋريستىك بلوگەرلەر مەن تۋروپەراتورلاردان قۇرالعان ەكسپەديتسيا قۇرامى قازاقستان,قىرعىز رەسپۋبليكاسى جانە وزبەكستان باعىتىن 13 كۇندە ءجۇرىپ وتكەن. ساپاردىڭ قورىتىندىسىندا ەلىمىزدىڭ تابيعي نىساندارى بويىنشا جاڭا تۋريستىك باعىتتار ءتۇزىلدى. بۇل اقپاراتتار كورشىلەس قىرعىز رەسپۋبليكاسى, وزبەكستان جانە وتاندىق تۋروپەراتورلارعا بەرىلەتىن بولادى.