نۇر-سۇلتان قالاسىندا ءداستۇرلى Astana Media Week (AMW) اپتالىعىنىڭ اشىلۋ ءراسىمى بولدى. «قازمەديا ورتالىعىندا» ۇيىمداستىرىلعان شارا ءۇش كۇنگە جوسپارلانعان. وتاندىق بۇقارالىق اقپارات وكىلدەرىنىڭ باسىن قوسقان بۇل القالى جيىنعا اقپارات جانە قوعامدىق دامۋ ءمينيسترى داۋرەن اباەۆ ارنايى قاتىستى.
Astana Media Week-ءتىڭ العا قويعان ماقساتى – وتاندىق مەديا سەكتوردى دامىتۋ جانە سالاداعى ىسكەرلىك قاتىناستاردى ايماقتىق دەڭگەيدە ىلگەرىلەتۋ.
بىلتىر AMW باعدارلاماسىنا قاتىسۋ ءۇشىن ەكى مىڭنان استام قوناق جينالعان ەدى. سول جولى مەديا يندۋستريانىڭ تەتىگىن ۇستاعان وتاندىق جانە شەتەلدىك 60 توپ-مەنەدجەر مەن 50-دەن استام وندىرىستىك كومپانيا وزدەرىن تانىستىرىپ, ءونىمىن كورسەتكەن بولاتىن. ال بيىلعى اپتالىق ءتۇرلى تاقىرىپتاردى قامتۋمەن, ولاردىڭ مازمۇنىنىڭ قىزىقتىلىعىمەن ەرەكشەلەندى. جيىن بارىسىندا جاۋاپتى مينيسترلىك ماڭىزدى جوبالار مەن تىڭ يدەيالاردى قولداۋعا ءازىر ەكەنىن ءبىلدىردى.
– اقپارات جانە قوعامدىق دامۋ مينيسترلىگى ماسس-مەديانىڭ ساپاسىن ارتتىراتىن كەز كەلگەن باستامانى قولداۋعا ارقاشان دايىن. سىزدەردى پانەلدىك سەسسيالارعا بەلسەنە قاتىسۋعا شاقىرا وتىرىپ, بۇگىنگى جانە الداعى جيىندارعا تابىس تىلەيمىن. ۇيالى تەلەفوننىڭ تەلەديدارمەن جانە باسىلىمدارمەن باسەكەگە تۇسكەنى بارشامىزعا بەلگىلى. بۇل ۇدەرىستىڭ تەحنولوگيالىق نەمەسە ماركەتينگتىك قانا ەمەس, ەتيكالىق, دەموگرافيالىق جانە الەۋمەتتىك-ساياسي ەرەكشەلىكتەرى دە بار. مويىنداۋ كەرەك, مەملەكەت ۇلكەن جانە يكەمسىز بيۋروكراتيالىق مەحانيزم رەتىندە بۇل وزگەرىستەرگە ءبىز ويلاعانداي جەدەل جاۋاپ بەرە الماي وتىر, – دەدى اقپارات جانە قوعامدىق دامۋ ءمينيسترى.
د.اباەۆتىڭ اتاپ وتكەنىندەي, مەملەكەتتىك ورگاندار ءۇشىن قازىرگى وزگەرىستەرگە جاۋاپ بەرۋدە كاسىبي مامانداردىڭ پىكىرى مەن كوزقاراسى ماڭىزدى. تاعى ءبىر ماسەلە – مەدياساۋاتتىلىقتى ارتتىرۋ ىسىنە نازار اۋداردى. – مەملەكەتتىك مۇددەنى حالىققا جەتكىزىپ, قوعامداعى وزگەرىستەرگە ساي كوزقاراس قالىپتاستىرۋدا مەديا سالاسىنىڭ اتقارار ماڭىزى زور. وسى ورايدا ەلىمىزدىڭ اقپارات قۇرالدارى الدىندا ۇلكەن ماقسات-مىندەتتەر تۇر. ول ەلباسى باستاعان, مەملەكەت باسشىسى قولداپ وتىرعان ساياسي-ەكونوميكالىق جانە رۋحاني جاڭعىرۋ جونىندەگى كەشەندى رەفورمالارعا جۇرتشىلىقتى جۇمىلدىرۋ. Astana Media Week ديالوگ الاڭىن ۇيىمداستىرۋداعى نەگىزگى ماقساتتاردىڭ ءبىرى – اقپارات قۇرالدارى وكىلدەرىنىڭ ءبىر-بىرىمەن تانىسىپ, پىكىر الماسۋلارىنا جاعداي جاساۋ. وسىلايشا, ەلىمىزدىڭ مەديا سالاسىن ءار تاراپتان ەمەس, ورتاق مۇددە اياسىندا دامىتۋ دەگەن نيەتىمىز بار. بۇل اۋقىمدى شارانىڭ كوزدەگەن تاعى ءبىر ماقساتى – ەل تۇرعىندارىنىڭ مەدياساۋاتىن ارتتىرۋ, مەديامادەنيەتتى قالىپتاستىرۋ.
جيىننىڭ اشىلۋ سالتاناتىنان كەيىن بىرنەشە سەكتسياعا بولىنگەن اۋديتوريالاردا ءتۇرلى تاقىرىپتار قوزعالدى. ناقتىلاي ايتقاندا, جيىننىڭ العاشقى كۇنى وتاندىق سەريالدار مەن كينو يندۋسترياسى سالاسىنا قاتىستى تاقىرىپتارعا باسىمدىق بەرىلدى. ديالوگ الاڭدارىندا مەديا ماماندار سالاداعى سالعىرتتىق, سەريالداعى ساپا, ەكرانداعى ەتيكادان باستاپ, جۇرتتىڭ قىزىعۋشىلىعىن تۋدىرۋ مەن قارجى تابۋ سەكىلدى بىرنەشە ماسەلەنى قوزعاپ, پىكىرلەرىمەن ءبولىستى.
حالىقارالىق سپيكەرلەردىڭ قاتارىندا Star Media كينوكومپانياسىنىڭ ۆيتسە-پرەزيدەنتى نيكيتا ترينكين, قىتايلىق بەلگىلى پروديۋسەر ۋ تسزيان, پولياك رەجيسسەرى جانە پروديۋسەر داريۋش يابلونسكي جانە ۇندىستاندىق NFDC حالىقارالىق تاراتۋ جانە ماركەتينگ ءبولىمىنىڭ باستىعى ديپلي چاۋلا سەكىلدى قوناقتار بولعانىن ايتا كەتكەن ءجون. ولار باسقوسۋدا ءوز تاجىريبەلەرىمەن ءبولىسىپ, جۋرناليستەردىڭ سۇراقتارىنا جاۋاپ بەردى. وتاندىق مەديا ماماندارى ءۇشىن ولاردىڭ سەريال تۇسىرۋدەگى وزىق تاسىلدەرى قىزىعىراق بولدى. جيىن بارىسىندا قازاقستاندىق سەريالدار مەن كينو تۋىندىلاردىڭ كەمشىلىكتەرى مەن ارتىقشىلىقتارى دا ءسوز بولدى.
اپتالىق بارىسىندا بەلگىلى بولعانداي, قازاقستاندا اۋديتورياسى كوبەيىپ كەلە جاتقان تەلەارنالاردىڭ قاتارى ارتا تۇسكەن. وعان تاعى ءبىر سەبەپ ءتول تەلەحيكايالارىمىزدىڭ كوبەيىپ كەلە جاتقاندىعى كورىنەدى. مۇنى كۇندەلىكتى ومىردە كوگىلدىر ەكراندى قالت جىبەرمەيتىن كورەرمەن بىزدەن جاقسى بىلمەسە, كەم بىلمەيتىنى انىق. وسى رەتتە مينيستر قازاقستاندىق جانە شەتەلدىك تەلەارنالاردى بىرلەسە وتىرىپ جۇمىس ىستەۋگە شاقىردى. بۇل ءۇشىن بارىنشا جاعداي جاساۋعا بولاتىنىن جەتكىزدى.
AMW اياسىندا قازاقستانداعى العاشقى – «ADTribune – ازيانىڭ جارنامالىق داۋىسى» اتتى كونفەرەنتسياسى وتەدى. وندا سالاداعى ماسەلەلەر, قيىندىقتار مەن ترەندتەر تۋرالى اشىق ايتىلادى. مەديا اپتانىڭ سوڭعى كۇنى مەديا مازمۇنداعى ترەندتەرگە – ينتەراكتيۆتى ۇدەۋ, ۆيدەو-مازمۇن ەۆوليۋتسياسى, بەيىمدەلۋى, مونەتيزاتسيا تاقىرىپتارىنا ارنالادى. ولار مەديانى تۇتىنۋدىڭ جاڭا ۇلگىلەرى ءونىمنىڭ مازمۇنىن قالاي وزگەرتەتىنى تۋرالى, ساندىق مەديا مونيتورينگى مەن ساراپتاماسى جايىندا جانە «قازاقشا سويلەيتىن Youtube» تۋرالى بولماق. سونداي-اق ءىس-شارالار بارىسىندا بىرنەشە تەلەارنانىڭ تەلەۆيزيالىق جاڭا ماۋسىمى اشىلادى.