لەنينسكوە اۋىلىنىڭ تۇرعىندارى ءتورت جىل بويى جابايى ارپامەن الىسىپ الەك. بيىل تاعى دا ۇلكەن ابىگەرگە ءتۇسىردى. جىل وتكەن سايىن اۋقىمى ۇلكەيىپ, قىردى ايتپاعاندا تۇتاس ەلدى مەكەنگە جايىلىپ ۇلگەرگەن. ءتۇپ-تامىرىمەن قىرقىپ, جويىپ تاستاۋعا جەكە ادامدار تۇگىلى شارۋا قوجالىقتارى دا قاۋقارسىز.
جۇرت اۋزىندا جابايى, جالدى, كانادالىق دەپ اتالىپ كەتكەن ارپا سىرت كوزگە ادەمى, زيانسىز كورىنگەنىمەن, اۋىلشارۋاشىلىق داقىلدارى مەن ءتورت ت ۇلىك مالدىڭ قاس جاۋى كورىنەدى. وسىمتالدىعى سونشالىق, تەز تارالىپ, اتشاپتىرىم اۋماققا تامىر سالىپ ۇلگەرىپتى. زەينەتكەر ارعىن ۇسەيىنوۆتىڭ يىققا تريممەردى ءىلىپ الىپ, اۋلاسىن تازالاعانىنا بىرنەشە كۇن بولىپتى. بىراق جاۋىننان كەيىنگى ساڭىراۋقۇلاق قۇساپ قايتادان قاپتاپ كەتەدى ەكەن. الىستان قاراسا, اۋىل ءدانى ءپىسىپ, ماساعى تولىسقان ساپ-سارى ەلتىنجالدىڭ ورتاسىندا تۇرعانداي اسەر بەرەدى. بۇل – شىن مانىندە قاۋلاي وسكەن ءارامشوپ.
«بىلتىر مىنا جەردى تاپ-تازا ەتىپ ورىپ تاستاعانبىز. شاپقان سايىن بالالاي بەرە مە دەيمىن. ءتىپتى كوبەيىپ كەتتى. جولداردى, جايىلىمداردى باسىپ, ەگىستىك القاپتارعا جاقىنداپ قالدى. دەرەۋ الدىن الۋ شارالارى شۇعىل جۇرگىزىلمەسە, جاعدايدىڭ كۇردەلەنىپ كەتەتىن ءتۇرى بار», دەيدى لەنيندىكتەر.
وسى سەبەپتى باقتاشىلار مال جايىلىمىن اۋىستىرىپ, باسقا جاققا باعۋعا ءماجبۇر. جۋىردا جابايى ارپانى جەگەن ءبىر قوي اياقاستى سەرەيىپ, سويسا, ىشەك-قارنىنا ءشوپتىڭ تىكەنەكتەرى قادالىپ قالىپتى. ءبىر اۋىلدى ابدەن مەزى قىلعان جابايى ارپا بالا-شاعا ناپاقاسىن ايىرىپ وتىرعان مال يەلەرىن دە جايسىزدىققا ۇرىندىرۋى مۇمكىن. ءوڭىردىڭ فيتوسانيتارلارى ءارامشوپتىڭ ءتورت ت ۇلىك مالعا دا, ەگىستىككە دە اسا قاۋىپتى ەكەنىن جاسىرمايدى. ودان قۇتىلۋدىڭ ءبىر عانا جولى – حيميالىق وڭدەۋ. الايدا جاپپاي اسەر ەتەتىن شەتەلدىك گەربيتسيد وتە قىمبات تۇرادى. ونىڭ ۇستىنە وعان مەملەكەت تاراپىنان قاراجات ءبولۋ جاعى قاراستىرىلماعان.
جەرگىلىكتى بيلىكتەن دە كۇدەرلەرىن ۇزگەن لەنينسكوە اۋىلىنىڭ تۇرعىندارى تريممەر مەن قول شالعى ساتىپ الۋعا جاپپاي كىرىسىپ كەتكەن سىڭايلى. ويتكەنى ءوز كۇشتەرىنە سەنۋدەن باسقا امال جوق. سولتۇستىك قازاقستان وبلىسى,اققايىڭ اۋدانى