وتكەن عاسىردا الەمدى «كوممۋنيزم ەلەسى كەزىپ جۇرسە», قۇدايعا شۇكىر, جاڭا عاسىردا قازاق ءانى الەمدى باۋراي باستادى. كەشەگى ء«ان سالاتىن قازاق دالاسىنىڭ» بۇگىنگى پەرزەنتى, ياعني قازاق بالاسى ءاندى دالادا ەمەس, الەم ساحناسىندا شىرقايتىن شىرقاۋ بيىككە كوتەرىلدى. وركەنيەتتە وزىندىك ورنى بار ەلدەردىڭ ونەردى باعالاي بىلەتىن جۇرتىنىڭ ءوزى الاش وعلانىنىڭ داۋسىنا تاڭداي قاعىپ, ەرەكشە قوشەمەت كورسەتىپ جاتقانى – وسىنىڭ دالەلى.
سونىمەن 10 جەلتوقساندا نيۋ-يوركتەگى «Barclays Center» ارەناسىندا ديماش قۇدايبەرگەن (DQ) «ارناۋ» باعدارلاماسىمەن امەريكالىقتارعا ءوزىنىڭ جەكە كونتسەرتىن ۇسىنادى. ادەتتە قازاقستاندى باسىنان قايعى بۇلتى ارىلماعان كوپ «ستان»-نىڭ ساناتىنا ءجيى قوساتىن امەريكالىقتاردىڭ ەندى دالا اۋەنىمەن جاقىنىراق تانىسۋىنا مۇمكىندىك تۋىپ وتىر. ۇلانىنا قاراپ ۇلى دالانىڭ تاريحىنا, مىڭجىلدىق مادەنيەتىنە ۇڭىلەتىن ءسات بۇل.
ديماشتىڭ الىپ ەلدەگى كونتسەرتىن ۇيىمداستىرۋعا مادەنيەت جانە سپورت مينيسترلىگىنىڭ ءوزى باستاماشى بولىپ وتىر. مادەني شارا اقش-تاعى قازاقستان رەسپۋبليكاسىنىڭ مادەني كۇندەرى اياسىندا وتپەكشى. قالاي دەسەك تە, مۇحيتتىڭ ارعى بەتىندەگىلەر اتالعان جوبادا قازاق مادەنيەتىنىڭ وركەنيەتكە قوساتىن جاۋھارلارىمەن جاقىنىراق تانىساتىن بولادى.
مادەنيەت جانە سپورت ءمينيسترى اقتوتى رايىمقۇلوۆانىڭ ءوزى اتالعان شاراعا وراي: «ديماشتىڭ كونتسەرتىن اقش-تا ۇيىمداستىرۋ ءبىز ءۇشىن ۇلكەن مارتەبە. ديماش ونەر كورسەتكەن بارلىق ەلدەگىدەي, امەريكانىڭ ەركە جۇرتىن ءتانتى ەتەتىنىنە سەنىمدىمىز», – دەيدى.
ازيا مەن قارت قۇرلىقتىڭ ونەرسۇيەر قاۋىمى الاش ءانشىسىنىڭ ەرەكشە داۋىس قۇدىرەتىنە تاڭداي قاعىپ جاتقاندا, ودان امەريكالىقتار بەيحابار دەي المايمىز. قازىرگىدەي «جىلدام حابار العىزاتىن» زاماندا ديماشتىڭ ونەر ارەناسىنداعى دۇبىرىنە قانىق ەكەندىگى ءسوزسىز. باسقاسى باسقا, امەريكالىقتارعا ەتەنە جاقىن تۇماندى البيونداعى وتكەن قازاق ءانشىسىنىڭ كونتسەرتىنە ونىڭ تابىنۋشىلارى الەمنىڭ تۇكپىر-تۇكپىرىنەن جينالدى, ال بيلەتتەر رەكوردتى قىسقا مەرزىمدە ساتىلىپ كەتتى. ەندەشە, لوندوننىڭ جاڭالىعىنان ۆاشينگتون دا حاباردار.
وسىدان دا بولسا كەرەك, ديماشتىڭ نيۋ-يوركتەگى كونتسەرتىن ۇيىمداستىرۋعا قازاقستاندىق رەجيسسەرلەرمەن جانە حورەوگراف-قويۋشىلارمەن بىرگە امەريكالىق تانىمال رەجيسسەرلەر دە بەلسەنە كىرىسىپتى. قالىڭ جۇرتتى قامتيتىن جوبانىڭ الەۋەتىن امەريكالىقتار جاقسى بىلەدى عوي. ولاي بولسا, اتالعان جوبانىڭ قازاق مادەنيەتىن الەمگە تانىستىرۋداعى ۇلەسى دە تابىستى بولادى دەگەن سەنىمدەمىز.