كەشتى ل.تولستوي اتىنداعى وبلىستىق امبەباپ كىتاپحانانىڭ ۇجىمى ۇلت ۇستازىنىڭ تۋعان كۇنىنە جانە قازاقستان رەسپۋبليكاسى حالقىنىڭ تىلدەرى كۇنىنە ارناپ ۇيىمداستىردى. كەش ادەتتەگىدەي كىتاپحانانىڭ اكت زالىندا نەمەسە وزگە عيماراتتا ەمەس, الاش ارىسىنىڭ اتىنداعى قوستاناي مەملەكەتتىك ۋنيۆەرسيتەتىنىڭ الدىندا تۇرعان احاڭنىڭ ەڭسەلى ەسكەرتكىشى جانىندا ءوتتى. وعان ۋنيۆەرسيتەت ستۋدەنتتەرى مەن احمەتتى زەرتتەپ جۇرگەن احمەتتانۋشىلار, جۋرناليستەر قاتىستى. الدىمەن ءسوزدى احمەت بايتۇرسىنوۆتىڭ ءومىربايانىنا قاتىستى كوپتەگەن مالىمەتتەر بەرگەن جانە ءوزىنىڭ رۋلاس تۋىسى بولىپ كەلەتىن يبراگيم اعىتاي الدى.
«احاڭنىڭ تۋعان كۇنى وسىلاي جىل سايىن وتكىزىلىپ, اتالىپ وتىرسا قۇبا-قۇپ. وبلىستىق كىتاپحانانىڭ باستاماسىن داستۇرگە اينالدىرسا دەپ ويلايمىن. مەن احمەت تۋعان توپىراقتان, جەردەن, سول رۋدان بولعاندىقتان, وسىنداي ۇلى ادامنىڭ ءومىرىن زەرتتەۋگە قاتىسىپ كەلەمىن. ونىڭ ۇرپاقتارىنىڭ, اۋىلدىڭ اقساقالدارىنىڭ كوزىن كوردىك, سولاردان ەستىگەنىمنىڭ ءوزى احاڭنىڭ ءومىربايان تاريحىنا قوسىلعان ۇلەس بولدى دەپ بىلەمىن. ال ونى زەرتتەگەن عالىمدار جەتكىلىكتى.الايدا احاڭنىڭ زەرتتەلمەگەن تۇسى, ەڭبەكتەرى ءالى دە بار, ولاردى جەتكىنشەكتەر ءالى زەرتتەي جاتار» دەدى يبراگيم اعاي.
مۇنان كەيىن اقىن ناعاشىباي مۇقاتوۆ احاڭا ارناعان ولەڭىن وقىپ بەردى. فيلوسوفيا عىلىمدارىنىڭ كانديداتى, ولكەتانۋشى قالقامان جاقىپ ۋنيۆەرسيتەتكە احمەت بايتۇرسىنوۆ ەسىمىنىڭ قالاي بەرىلگەندىگى تۋرالى تاريحي مالىمەتتى جاستاردىڭ ەسىنە سالدى. ستۋدەنت جاستار كەشتى انمەن جانە احمەت بايتۇرسىنوۆ ولەڭدەرىن مانەرلەپ وقۋمەن كوركەمدەي ءتۇستى. ءى.وماروۆ اتىنداعى وبلىستىق قازاق دراما تەاترىنىڭ اكتەرى قابدىلماجيت يمانوۆ احاڭ كەيپىندە كەلىپ, «مىرجاقىپ» سپەكتاكلىنەن احمەتتىڭ مونولوگىن ايتىپ بەردى.
كىتاپحانا ۇجىمى ۇلت ۇستازىنا ارنالعان كەشتى ەندى جىل سايىن احاڭنىڭ تۋعان كۇنىندە وسى ەسكەرتكىش الدىندا وتكىزەتىندىكتەرىن ايتتى.
قوستاناي