جامبىل وبلىسىندا قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ «ن.نازارباەۆ: ءداۋىر, تۇلعا, قوعام» اتتى كوشپەلى كورمە جوباسى ىسكە قوسىلدى. كورمە اياسىندا اۋەلى قورداي اۋدانى, ءالجان انا اۋىلىنىڭ مادەنيەت ۇيىندە ەلباسى كىتاپحاناسىنىڭ كوشپەلى ەكسكۋرسياسى ءوتتى. سالتاناتتى شارانى ەلباسى كىتاپحاناسىنىڭ ديرەكتورى, ساياسي عىلىمداردىڭ دوكتورى, پروفەسسور ءامىرحان راحىمجانوۆ ءسوز سويلەپ اشىپ, جەرگىلىكتى تۇرعىنداردى «ن.نازارباەۆ: ءداۋىر, تۇلعا, قوعام» كورمە جوباسىمەن تانىستىردى.
– ەلباسى كىتاپحاناسىنىڭ قىزمەتكەرلەرى «تۇڭعىش» ەكسكۋرسيالىق كونتسەپتسياسىنىڭ اياسىندا سىزدەرگە ارناپ «تاريحي تاڭداۋ» عىلىمي-ەكسپوزيتسيالىق جوباسىنا تاقىرىپتىق ەكسكۋرسيالار دايىندادى. سىزدەرگە ارنايى ەلباسى نۇرسۇلتان ءابىش ۇلى مەن تاۋەلسىز قازاقستاننىڭ دامۋ تاريحىنان سىر شەرتەتىن دەرەكتى فيلمدەردىڭ كورسەتىلىمى وتەدى. اۋدان تۇرعىندارىنىڭ نازارىنا ەلباسى كىتاپحاناسىنىڭ مۋزەي قورى مەن ەلباسىنىڭ جەكە ارحيۆىنەن جاساقتالعان «ەلباسى جانە جاڭارعان جامبىل ولكەسى» فوتوسۋرەتتەر كورمەسى دە ۇسىنىلىپ وتىر, – دەدى ءامىرحان راحىمجانوۆ.
ءوز سوزىندە جامبىل وبلىسى اكىمىنىڭ ورىنباسارى سۇلۋشاش قۇرمانبەكوۆا بۇل باستامانىڭ جەرگىلىكتى حالىققا دەگەن قۇرمەت ەكەنىن, سوندىقتان ءاربىر ازامات ماڭگىلىك ەلدىڭ دامۋىنا ۇلەس قوسۋدى وزىنە پارىز ساناۋ كەرەكتىگىن ايتا كەلىپ, ەلباسى كىتاپحاناسىنىڭ ۇجىمىنا العىس ءبىلدىردى. بۇدان كەيىن ەلباسى كىتاپحاناسىنىڭ ديرەكتورى ءامىرحان راحىمجانوۆ قورداي اۋدانى اكىمىنىڭ ورىنباسارى بەيقۇت جامانگوزوۆكە العىس حات پەن «ن.نازارباەۆ. ءومىربايان», «نازارباەۆ مودەلى» كىتاپتارىن تابىستاپ, مادەنيەت ءۇيىنىڭ كىتاپحاناسىنا قۇندى باسىلىمداردىڭ جيناعىن تارتۋ ەتتى.
ءالجان انا اۋىلىندا «تاريحي تاڭداۋ. باستاۋ», «تاريحي تاڭداۋ. ورلەۋ», «قازاقستاننىڭ سپورتتىق داڭقى» تاقىرىپتىق ەكسكۋرسيالارى ۇيىمداستىرىلدى. ەكسكۋرسيا بارىسىندا قورداي اۋدانىنىڭ تۇرعىندارى ەلباسى ومىرىنە قاتىستى سيرەك كەزدەسەتىن بەينەماتەريالداردىڭ, فوتوسۋرەتتەر مەن ارحيۆ قۇجاتتارىنىڭ جانە جادىگەرلەردىڭ بىرەگەي كەشەنىن تاماشالادى. سونىمەن قاتار, كورمەگە كەلۋشىلەر وتاندىق جانە شەتەلدىك ايگىلى سپورتشىلاردىڭ نۇرسۇلتان نازارباەۆقا تارتۋ ەتكەن سىيلىقتارى جانە ماراپاتتارىمەن تانىستى. ەكسكۋرسيانى تاماشالاعان مەكتەپ مۇعالىمى ارايلىم قاسىموۆا ەل تاۋەلسىزدىگىنىڭ نەگىزىن قالاعان تۇلعانىڭ دارا جولى بارلىق قىرىنان ماڭىزدى وقيعالار مەن پاراساتتى شەشىمدەرگە تولى ەكەنىن, سونىمەن قاتار بۇگىنگى كورمە تاريحي قۇندى دەرەكتەردى كوپشىلىككە ۇسىنۋىمەن دە باعالى ەكەنىن جەتكىزدى.
«ن.نازارباەۆ: ءداۋىر, تۇلعا, قوعام» اتتى كوشپەلى كورمە جوباسى شۋ اۋدانىندا جالعاسىن تاپتى. شۋ قالاسىنداعى ساكەن سەيفۋللين اتىنداعى ورتا مەكتەپتە كوشپەلى كورمە جوباسىنىڭ اياسىندا ايتۋلى شارا ۇيىمداستىرىلدى. اتالعان كورمە شەڭبەرىندە قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى «تۇڭعىش» ەكسكۋرسيالىق كونتسەپتسياسىنىڭ نەگىزىندە كەلۋشىلەر «تاريحي تاڭداۋ باستاماسى» جانە «تاريحي تاڭداۋ. ۇمتىلىس», «قازاقستاننىڭ سپورتتىق داڭقى» تاقىرىپتىق ەكسكۋرسيالارىن تاماشالادى.
شارا بارىسىندا ەلباسى كىتاپحاناسىنىڭ ديرەكتورى ء امىرحان راحىمجانوۆ, ورىنباسارى كۇلايشا اقتاەۆا, جامبىل وبلىسى اكىمىنىڭ ورىنباسارى سۇلۋشاش قۇرمانبەكوۆا, اۋدان اكىمى جارىلقاسىن ايتاقوۆ جينالعاندار الدىندا ءسوز سويلەپ, ەلباسىنىڭ تاۋەلسىز ەل تاريحىنداعى قايراتكەرلىك قابىلەتىنە توقتالدى. ءوز كەزەگىندە ءامىرحان راحىمجانوۆ جوبا اۆتورى, ساياساتتانۋشى عالىم, قازاقستان رەسپۋبليكاسى تۇڭعىش پرەزيدەنتى كەڭسەسىنىڭ باسشىسى ماحمۇد قاسىمبەكوۆتىڭ سالەمىن جەتكىزىپ, اۋدان اكىمى جارىلقاسىن ايتاقوۆ پەن اتالعان مەكتەپ ديرەكتورى جازيرا شالباەۆاعا العىس حات تاپسىرىپ, ەلباسى تۋرالى قۇندى ەڭبەكتەردى سىيعا تارتتى. بۇدان كەيىن اۋدان اكىمى جارىلقاسىن ايتاقوۆ تا وڭىرگە كەلگەن مەيماندارعا ريزاشىلىعىن ءبىلدىرىپ, ەلباسى كىتاپحاناسىنا ەستەلىك سىيلىق تابىستادى. سونىمەن قاتار, كورمەگە كەلۋشىلەر ەلباسى ومىرىنەن سىر شەرتەتىن تىڭ دەرەكتەرمەن تانىسىپ, تاجىريبەلى نۇسقاۋشىلاردىڭ بايانداماسىن تىڭدادى. اۋدان تۇرعىندارىنا سيرەك كەزدەسەتىن بەينەماتەريالداردىڭ, فوتوسۋرەتتەر مەن ارحيۆتىك قۇجاتتاردىڭ جانە جادىگەرلەردىڭ بىرەگەي كەشەنى ۇسىنىلدى.
قورداي اۋدانىنىڭ ءالجان انا اۋىلىنان باستاۋ العان كوشپەلى كورمە تاراز قالاسىندا جالعاسىن تاپتى. جامبىل وبلىسى قازاقستان حالقى اسسامبلەياسىنىڭ «دوستىق» ۇيىندە كىتاپحانا, ارحيۆ, مۋزەي سالالارىنىڭ ماماندارى مەن مەملەكەتتىك قىزمەتشىلەرگە ارنالعان «ەلباسى كىتاپحاناسىنىڭ اقپاراتتىق رەسۋرستارى» اتتى ايماقتىق كاسىبي سەسسيا ءوتتى. ءىس-شارانىڭ ماقساتى – قوعامدىق سانانى جاڭعىرتۋ تۇرعىسىنان مادەني مۇرانى زەرتتەۋ, ناسيحاتتاۋ تاجىريبەلەرىن ورتاعا سالۋ, سونداي-اق, كىتاپحانا, ارحيۆ, مۋزەي سالالارىنداعى اقپاراتتىق تەحنولوگيالاردى دامىتۋعا قاتىستى وزەكتى ماسەلەلەردى تالقىلاۋ بولىپ تابىلادى.
سەسسيا قاتىسۋشىلارىنىڭ نازارىنا ء«بىر جادىگەردىڭ تاريحى», «مۋزەي كوللەكتسيالارى» جوباسىن قامتيتىن «مۋزەي جيناقتارى» عىلىمي-قور مۋزەيتانۋ باعدارلاماسى بويىنشا ەلباسى كىتاپحاناسى قىزمەتكەرلەرىنىڭ زەرتتەۋ جۇمىستارى ۇسىنىلدى.
سونىمەن قاتار, تاراز قالاسىنداعى «دوستىق» الاڭىندا قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ «ن.نازارباەۆ: ءداۋىر, تۇلعا, قوعام» اتتى كوشپەلى كورمەسىنىڭ اشىلۋ سالتاناتى ءوتتى. اۋەلى جينالعان جۇرتشىلىق كەنەن ازىرباەۆ اتىنداعى جامبىل وبلىستىق فيلارمونياسى ونەرپازدارىنىڭ ونەرىن تاماشالادى. سالتاناتتى شاراعا جامبىل وبلىسىنىڭ اكىمى اسقار مىرزاحمەتوۆ قاتىسىپ, ءوز سوزىندە ەلباسى نۇرسۇلتان نازارباەۆتىڭ تاۋەلسىز مەملەكەت تاريحىنداعى ەرەن ەڭبەگىنە توقتالدى. بۇدان كەيىن ەلباسى كىتاپحاناسىنىڭ ديرەكتورى ءامىرحان راحىمجانوۆ كونە اۋليەاتا وڭىرىندە كوشپەلى كورمەنىڭ ءوتۋىنىڭ ءوزى ەل تۇرعىندارىنا كورسەتىلگەن ەرەكشە قۇرمەت ەكەنىن اتاپ ءوتتى. ەلباسىنىڭ دا جامبىل وڭىرىنە قۇرمەتپەن قارايتىنىن جەتكىزدى. بۇدان كەيىن اسقار مىرزاحمەتوۆ پەن ءامىرحان راحىمجانوۆ سالتاناتتى جاعدايدا «ن.نازارباەۆ: ءداۋىر, تۇلعا, قوعام» اتتى كوشپەلى كورمەنىڭ لەنتاسىن قيدى. جامبىل وبلىستىق تاريحي-ولكەتانۋ مۋزەيىنە كىرىپ, ەلباسىنىڭ ءومىرى مەن قىزمەت جولىنان سىر شەرتەتىن دەرەكتەرمەن تانىستى.
ايتا كەتەيىك, 2017 جىلعى قاراشا ايىنان باستاۋ العان «نۇرسۇلتان نازارباەۆ: ءداۋىر, تۇلعا, قوعام» كوشپەلى كورمەسىنىڭ جوباسىمەن الماتى, شىمكەنت قالالارى مەن الماتى, تۇركىستان, اتىراۋ, اقتوبە جانە قىزىلوردا وبلىستارىنىڭ 900 مىڭعا جۋىق تۇرعىنى تانىسىپ ۇلگەرگەن بولاتىن. ال, جامبىل وبلىسىندا جالعاسىن تاپقان جوبا اعىمداعى جىلعى قازان ايىنىڭ سوڭىنا دەيىن جالعاسادى.
جامبىل وبلىسى