ءداستۇرلى «مەكتەپكە جول» رەسپۋبليكالىق اكتسياسىنا قاراعاندى وبلىسى بەلسەندى تۇردە ات سالىستى. اسىرەسە جەزقازعانداعى Utaria LTD كومپانياسىنىڭ وسى باعىتتاعى قايىرىمدىلىق ىستەرىن ەرەكشە اتاپ وتۋگە بولادى.
قاراعاندى وبلىستىق قازاقستان حالقى اسسامبلەياسىنىڭ «قايىرىمگەرلەر مەن تالىمگەرلەر كلۋبىنىڭ» وكىلى جانە «جومارت جۇرەك» توسبەلگىسىنىڭ يەگەرى ساۋلە شاۋەنوۆا جەتەكشىلىك ەتەتىن بۇل كومپانيا 67 كوپبالالى وتباسىنا بالالارىن مەكتەپكە دايارلاۋ ءۇشىن 6 ملن تەڭگەگە جۋىق قارجىلاي كومەك كورسەتتى. ءار بالاعا 25 مىڭ تەڭگەدەن ءبولىپ, ولارعا ايتىپ جەتكىزگىسىز قۋانىش سىيلادى.
– ەگەر قازاقستاننىڭ ءاربىر تۇرعىنى از قامتىلعان وتباسىلاردىڭ بالالارىنا جەتكىلىكتى تۇردە كوڭىل بولەتىن بولسا, وندا مەكتەپكە باراتىن بالالار سانى ارتىپ, ءبىلىم بەرۋ دەڭگەيى دە وسە تۇسەر ەدى. ال مۇنىڭ ءوزى بولاشاق ۇرپاقتى دامىتۋعا يگى ىقپالىن تيگىزەدى, – دەيدى ساۋلە شاۋەنوۆا.
Utaria LTD كومپانياسى مەن ونىڭ باسشىسى جەزقازعاندا عانا ەمەس, رەسپۋبليكا بويىنشا تانىمال. كومپانيا مەتاللۋرگيا, تاۋ-كەن ءوندىرىسى, مۇناي-گاز جانە حيميا سالالارىنىڭ جۇمىسشىلارىنا ارناپ 500-گە جۋىق كيىم تۇرلەرىن شىعارادى. سونىمەن قاتار كاسىپورىن بالالارعا, ەرلەر مەن ايەلدەرگە ارنالعان كيىم دە تىگەدى. كاسىپورىن ونىمىنە دەگەن سۇرانىس وتە جوعارى.
كومپانيانىڭ قولداۋىمەن جەزقازعان قالاسىندا «رۋحاني جاعىرۋ» باعدارلاماسى اياسىندا «تۋعان جەر» جوباسى بويىنشا ء«بىلىم جانە دامۋ ورتالىعى» اشىلعان, وندا IT-سىنىبى جۇمىس ىستەيدى. ءبىلىم مەكەمەسىنىڭ Nur Otan پارتياسىنىڭ «بالالارعا ارنالعان تەگىن IT-سىنىپتار» باعدارلاماسى اياسىندا قۇرىلعانىن دا ايتا كەتكەن ءلازىم.
بۇدان بولەك, كومپانيا مۇمكىندىگى شەكتەۋلى جاندارعا, الەۋمەتتىك ءالجۋاز توپ ساناتىنا جاتاتىن تۇرعىندارعا دا ۇدايى قامقورلىق جاساپ كەلەدى. مىسالى كاسىپورىن ولارعا جانە «Utaria LTD وندىرىستىك كومپانياسى» جشس-ءنىڭ جاس ماماندارى مەن زەينەتكەرلەرگە ارناپ بارلىق تۇرمىستىق جاعدايى جاسالعان زاماناۋي جاتاقحانا سالىپ بەردى.
اتالعان اكتسيادان ساتباەۆ قالاسىندا تىگىن جانە توقىما شەبەرحاناسىن قۇرعان كاسىپكەر, كوپبالالى انا الەنا ەبەرمان دا تىس قالمادى. كاسىپكەر ايەل 30 بالاعا 300 مىڭ تەڭگەنىڭ مەكتەپ كيىمىن تەگىن ۇسىندى.
جالپى «قايىرىمدىلىق كەرۋەنى» قايىرىمدىلىق اكتسيالارىنىڭ كۇنتىزبەسى اياسىندا وسى جىلدىڭ ءبىرىنشى جارتىجىلدىعىندا اسسامبلەيا 1,7 مىڭنان استام ءىس-شارا وتكىزىپ, 45 مىڭ ادامعا جاردەم بەردى. ونىڭ ىشىندە 10 مىڭنان استام وتباسىنا 187 ملن تەڭگە كولەمىندە كومەك كورسەتىلگەن. تەك ماۋسىم ايىندا جاستار مەن بالالاردى قولداۋعا جانە ولارعا كومەك كورسەتۋگە باعىتتالعان «جىلۋ» ايلىعى اياسىندا 18 ملن تەڭگەنىڭ ماتەريالدىق كومەگى ءبولىندى.
قاراعاندى وبلىستىق قازاقستان حالقى اسسامبلەياسى ارىس قالاسىندا جارىلىستان زارداپ شەككەن جەرلەستەرىمىزگە العاشقىلاردىڭ ءبىرى بولىپ كومەك قولىن سوزدى. ەتنومادەني بىرلەستىكتەر, وبلىستىڭ قحا قۇرىلىمدارى تۇرعىندارعا قايىرىمدىلىق كومەك كورسەتۋ بويىنشا بىرلەسكەن جۇمىستار ۇيىمداستىردى. سونىڭ ناتيجەسىندە جالپى سوماسى 5,7 ملن تەڭگە بولاتىن دەمەۋشىلىك كومەك كورسەتىلدى.
قاراعاندى وبلىسى