قازاقستان رەسپۋبليكاسى پرەزيدەنتىنىڭ حالىققا جىل سايىنعى جولداۋ جاساۋ تاجىريبەسى 1995 جىلدان, ياعني جاڭا كونستيتۋتسيا بويىنشا مەملەكەت باسشىسىنا جۇكتەگەن مىندەت رەتىندە ەنگىزىلگەن كەزدەن باستاۋ الادى. قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا.نازارباەۆتىڭ «ەلدىڭ جاعدايى تۋرالى جانە 1997 جىلعا ارنالعان ىشكى جانە سىرتقى ساياساتتىڭ نەگىزگى باعىتتارى تۋرالى» تاقىرىبىمەن جاسالعان العاشقى جولداۋى 1996 جىلدىڭ قازانىندا جارىق كوردى.
وسى كەزدەن باستاپ, قازاقستان رەسپۋبليكاسى پرەزيدەنتىنىڭ قازاقستان حالقىنا جولداۋى جانە ونى ناسيحاتتاۋ مەن جۇزەگە اسىرۋ جونىندەگى جۇمىستار پروتسەسى وزدەرىنىڭ داستۇرلەرى مەن بەلگىلى ءبىر راسىمدەرىن قالىپتاستىردى. «قازاقستان-2030» ستراتەگياسى رەتىندە تانىمال بولعان 1997 جىلعى جولداۋدان باستاپ, پرەزيدەنت جولداۋى قوعامدىق ساناداعى يدەيالىق-قۇندىلىقتىق كورىنىستى قالىپتاستىرۋعا باعىتتالعان باعدارلامالىق قۇجاتقا اينالىپ كەلەدى.
سوندىقتان قاسىم-جومارت توقاەۆتىڭ قازاقستان رەسپۋبليكاسىنىڭ پرەزيدەنتى رەتىندەگى العاشقى جولداۋى قوعامدا ۇلكەن ۇمىتپەن كۇتىلدى.
مەملەكەت باسشىسىنىڭ ءباسپاسوز قىزمەتى بۇعان دەيىن بۇل جولداۋ پارلامەنتشىلەرگە, اتقارۋشى بيلىك ورگاندارىنا, جالپى قوعام ءۇشىن ەلىمىزدىڭ الداعى كەزەڭگە ارنالعان ماقساتتارى مەن مىندەتتەرىن ايقىندايتىن نۇسقاۋلىق بولاتىنىن مالىمدەگەن بولاتىن.
سىندارلى قوعامدىق سۇحبات – بۇل مەملەكەت تۇراقتىلىعىنىڭ نەگىزى, ول ءوز ازاماتتارىنىڭ ءال-اۋقاتىمەن قامتاماسىز ەتىلۋى مۇمكىن. پرەزيدەنت ۇسىنعان «قۇلاق اساتىن مەملەكەت» تۇجىرىمداماسى ازاماتتاردىڭ بارلىق سىندارلى سۇرانىستارىنا جەدەل جانە ءتيىمدى جاۋاپ بەرۋگە, بيلىك پەن قوعام اراسىندا تۇراقتى ديالوگ قۇرۋعا نەگىز بولادى. بۇل ءۇشىن حالىقپەن ءتيىمدى كەرى بايلانىس ورناتۋ قاجەت, سونىڭ ىشىندە جەرگىلىكتى بيلىك ورگاندارىنىڭ تيىمدىلىگىن سارالايتىن ساۋالنامالار جۇرگىزۋ دە ماڭىزدى.
قوعامدىق پىكىر الماسۋ – ادامداردىڭ سۇرانىستارىنا بارىنشا اشىق جانە شۇعىل جاۋاپ بەرۋ. قازاقستان كونستيتۋتسياعا سايكەس الەۋمەتتىك مەملەكەت بولا وتىرىپ, حالىقتىڭ ءال-اۋقاتى, اسىرەسە ونىڭ الەۋمەتتىك ءالسىز بولىگى ءۇشىن جاۋاپكەرشىلىكتى ءوز موينىنا الادى. وسى تۇرعىدا, ەلباسىنىڭ اتاۋلى الەۋمەتتىك كومەك بەرۋ جۇيەسىن وڭايلاتۋ, الەۋمەتتىك تۇرعىن ۇيمەن قامتاماسىز ەتۋ, الەۋمەتتىك جاعدايى تومەن وتباسىلاردان شىققان بالالارعا كەپىلدەندىرىلگەن الەۋمەتتىك جيىنتىق ەنگىزۋ جونىندەگى تاپسىرمالارى بارلىق قازاقستاندىقتار ءۇشىن جۇيەلى قادامدار بولىپ تابىلادى.
الەۋمەتتىك كومەك كورسەتۋدىڭ ناقتى ولشەمدەرىن بەلگىلەۋ, ونى جۇزەگە اسىرۋدا مەملەكەت-جەكەمەنشىك ارىپتەستىگى تەتىكتەرىن تارتۋ وسى جۇيەنىڭ تۇراقتىلىعىنىڭ كەپىلى بولادى.
ەكىنشى جاعىنان, شاعىن جانە ورتا كاسىپتى قولداۋدىڭ دايەكتى شارالارى ازاماتتاردىڭ وسى ساناتتارىنا دا اسەر ەتەدى. ميكرو جانە شاعىن بيزنەس سۋبەكتىلەرىن تەكسەرۋگە ءۇش جىلدىق شەكتەۋ سالۋ, وعان كوپ بالالى انالاردى تارتۋ ارەكەتى ازاماتتاردىڭ وسى ساناتىن نارىقتىق جاعدايلارعا بەيىمدەۋگە كومەكتەسەدى.
تاۋەلدىلىكتىڭ تارالۋىن بولدىرماۋ تۇرعىسىنان ۆولونتەرلىك ماڭىزدى ءرول اتقارا الادى, پرەزيدەنتتىڭ 2020 جىلدى «ەرىكتىلەر جىلى» دەپ جاريالاۋى جانە كوبىنەسە شاعىن بيزنەس ساناتىندا ۇسىنىلاتىن الەۋمەتتىك كاسىپكەرلىكتى دامىتۋدى قولعا الۋى كەزدەيسوقتىق ەمەس.
سونىمەن بىرگە پرەزيدەنت ۇكىمەتكە بارلىق ءتيىمسىز شىعىنداردى جويۋ جانە كىرىستەردى ۇلعايتۋ ارقىلى قاجەتتى رەزەرۆتەر تابۋ جونىندە ناقتى مىندەت قويدى.
زارەما شاۋكەنوۆا,قازاقستان رەسپۋبليكاسى پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتىنىڭ ديرەكتورى