ءبىلىم جانە عىلىم ءمينيسترىنىڭ بۇيرىعىمەن قر بعم ءبىلىم جانە عىلىم سالاسىنداعى باقىلاۋ كوميتەتىنىڭ ءتورايىمى لاۋازىمىنا وقۋ دەمالىسى كەزەڭىنە گۇلزات ىسباسارقىزى كوبەنوۆا تاعايىندالدى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.
گۇلزات كوبەنوۆا 1968 جىلى اقتوبە وبلىسىندا دۇنيەگە كەلگەن.
1998 جىلى تاريحشى, تاريح جانە قوعامتانۋ وقىتۋشىسى ماماندىعى بويىنشا ق. جۇبانوۆ اتىنداعى اقتوبە مەملەكەتتىك ۋنيۆەرسيتەتىن تامامداعان.
ەڭبەك جولىن 1998 جىلى ق. جۇبانوۆ اتىنداعى اقتوبە مەملەكەتتىك ۋنيۆەرسيتەتىنىڭ قازاقستان تاريحى كافەدراسىنىڭ وقىتۋشىسى بولىپ باستاعان, ۋنيۆەرسيتەت دەكانىنىڭ ورىنباسارى قىزمەتىن اتقارعان.
2004-2009 جىلدارى اقتوبە مەملەكەتتىك پەداگوگيكالىق ينستيتۋتىنىڭ عىلىم جانە حالىقارالىق ىنتىماقتاستىق ءبولىمىنىڭ باسشىسى, عىلىمي حاتشى, دەكاننىڭ م.ا. قىزمەتتەرىن اتقاردى.
2009 جىلعى قازان ايىنان باستاپ مەملەكەتتىك قىزمەتتە جۇمىس ىستەيدى. مادەنيەت جانە اقپارات, ءبىلىم جانە عىلىم مينيسترلىكتەرىندە ءتۇرلى لاۋازىمداردى اتقارعان.
2017 جىلعى شىلدەدە قر بعم جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى بولىپ تاعايىندالعان.
2018 جىلعى ءساۋىر مەن 2019 جىلعى قاڭتار ارالىعىندا تۇڭعىش پرەزيدەنت – ەلباسى كىتاپحاناسى ديرەكتورىنىڭ ورىنباسارى بولىپ قىزمەت ەتتى.
2019 جىلعى قاڭتاردان باستاپ قازىرگى تاڭعا دەيىن قازاقستان رەسپۋبليكاسىنىڭ پرەزيدەنتى كەڭسەسىنىڭ سەكتور مەڭگەرۋشىسى قىزمەتىن اتقارعان.