جۇما, 15 ناۋرىز 2013 1:31
ميلاندا قر قورشاعان ورتانى قورعاۋ ءمينيسترى نۇرلان قاپپاروۆ باستاعان قازاقستان دەلەگاتسياسىنىڭ «ەكسپو-2015 ميلان» كومپانياسىنىڭ اتقارۋشى ديرەكتورى دجۋزەپپە سالا جانە ميلان قالاسى اكىمدىگىنىڭ باسشىلىعىمەن كەزدەسۋلەرى ءوتتى. دەلەگاتسيا قۇرامىندا قر ءسىم جاۋاپتى حاتشىسى, حالىقارالىق مامانداندىرىلعان ەكسپو-2017 كورمەسىنىڭ كوميسسارى ر.جوشىباەۆ, «ەكسپو-2017 استانا» ۇلتتىق كومپانياسى» اق پرەزيدەنتى ت.ەرمەگياەۆ جانە قازاقستاننىڭ يتالياداعى ەلشىسى ا.ەلەمەسوۆ بولدى.
جۇما, 15 ناۋرىز 2013 1:31
ميلاندا قر قورشاعان ورتانى قورعاۋ ءمينيسترى نۇرلان قاپپاروۆ باستاعان قازاقستان دەلەگاتسياسىنىڭ «ەكسپو-2015 ميلان» كومپانياسىنىڭ اتقارۋشى ديرەكتورى دجۋزەپپە سالا جانە ميلان قالاسى اكىمدىگىنىڭ باسشىلىعىمەن كەزدەسۋلەرى ءوتتى. دەلەگاتسيا قۇرامىندا قر ءسىم جاۋاپتى حاتشىسى, حالىقارالىق مامانداندىرىلعان ەكسپو-2017 كورمەسىنىڭ كوميسسارى ر.جوشىباەۆ, «ەكسپو-2017 استانا» ۇلتتىق كومپانياسى» اق پرەزيدەنتى ت.ەرمەگياەۆ جانە قازاقستاننىڭ يتالياداعى ەلشىسى ا.ەلەمەسوۆ بولدى. كەزدەسۋلەر بارىسىندا قازاقستاندىق تاراپ يتاليا ۇكىمەتىنە حالىقارالىق مامانداندىرىلعان ەكسپو-2017 كورمەسىن استانادا وتكىزۋدە قازاقستاننىڭ كانديداتۋراسىن قولداعانى ءۇشىن ريزاشىلىعىن ءبىلدىرىپ, يتاليالىق كومپانيالاردى ءىس-شارانى دايىنداۋعا بەلسەندى تۇردە قاتىسۋعا شاقىردى. استانادا وتەتىن كورمە بالامالى ەنەرگەتيكانى قۇرۋ مەن قولدانۋعا ۇلكەن ۇلەس قوسادى, ەڭ ۇزدىك الەمدىك تەحنولوگيالاردى كەڭىنەن كورسەتۋگە مۇمكىندىك بەرەدى جانە ەنەرگەتيكالىق ءتيىمدى باعدارلامالار مەن جاڭا شەشىمدەردى ىلگەرىلەتۋگە كومەكتەسەدى, دەپ اتاپ ءوتىلدى. قازاقستاندا يتاليان كومپانيالارى بالامالى ەنەرگەتيكا, قۇرىلىس پەن تۋريزم سالالارىندا ەكسپو-2017 كورمەسىن دايىنداۋ مەن وتكىزۋگە بەلسەندى تۇردە قاتىسادى دەپ كۇتىلۋدە.
ءوز كەزەگىندە دجۋزەپپە سالا استانانىڭ ەكسپو-2017 كورمەسىن وتكىزۋ ورنى بولىپ سايلانۋىن قۋانا قابىل الىپ, الداعى الەمدىك دەڭگەيدەگى ءىس-شارا تەك استانانىڭ عانا ەمەس, تۇتاس قازاقستاننىڭ دا دامۋىنا قوسىمشا سەرپىن بەرەدى, دەپ اتاپ ءوتتى. ول يتاليا تاراپى ەكسپو-2017 كورمەسىن دايىنداۋ مەن وتكىزۋدە قازاقستانعا قاجەتتى كومەك كورسەتەدى دەپ سەندىرىپ, ميلاندا وتەتىن ەكسپو-2015-ءتىڭ تاقىرىبى «پلانەتا ءۇشىن تاعام, ءومىر سۇرۋگە قۋات» بولعاندىعىن ايتىپ, مۇنىڭ قازاقستاندىق كورمەنىڭ تاقىرىبىمەن ۇندەس ەكەندىگىنە نازار اۋداردى.
كەلىسسوزدەر بارىسىندا تاراپتار ميلانداعى ەكسپو-2015 جانە استاناداعى ەكسپو-2017 كورمەلەرىن دايىنداۋداعى قىزمەتتى ۇيلەستىرۋ جونىندە بىرلەسىپ جۇمىس جاساۋ قاجەتتىلىگى اتاپ ءوتىلدى. ۇيىمداستىرۋشىلىق ماسەلەلەر جونىندە اقپاراتتى جەدەل تۇردە الماسۋ ماقساتىندا, ەكى ەلدىڭ كورمەلەردى دايىنداۋمەن اينالىساتىن مەملەكەتتىك ورگاندارى مەن ۇلتتىق كومپانيالارى اراسىندا تۇراقتى بايلانىستاردى جۇرگىزۋ تۋرالى كەلىسىمگە قول جەتكىزىلدى.
ساپار بارىسىندا قازاقستاندىق دەلەگاتسيا ەكسپو-2015-ءتىڭ قۇرىلىس الاڭىمەن تانىستى. يتاليا ۇكىمەتى ميلانداعى ەكسپو-نى دايىنداۋعا 13,2 ملرد. ەۋرو ءبولدى. مۇنىڭ سىرتىندا 14 ملرد. ەۋروداي تىكەلەي ينۆەستيتسيا جاسالادى دەپ كۇتىلۋدە. كورمە وتەتىن كۇندەرى ميلان قالاسى 20 ملن. ادامعا دەيىن قوناق قابىلداماق. كورمەنىڭ جالپى الاڭى 110 گەكتاردى قۇرايدى. كورمە وتكىزۋ ءۇشىن Expo Village جاڭا تۇرعىن قالاشىعى, بىرقاتار جاڭا قوناق ۇيلەر مەن ءىرى كەمپينگ سالىنادى. قاتىسۋشى ەلدەردىڭ پاۆيلوندارى 4 كاتەگورياعا (A, B, C جانە D) بولىنگەن. بىرقاتار ۇيلەر مەن عيماراتتار, سونىڭ ىشىندە رەسمي راسىمدەر مەن قابىلداۋلار وتەتىن يتاليا سارايى, مادەني ءىس-شارالاردى وتكىزۋگە ارنالعان 24 مىڭ كورەرمەن سياتىن ارەنا, 8 مىڭ كورەرمەن سياتىن امفيتەاتر قۇرىلىسى جوسپارلانۋدا. كورمە ميلان مەن لومبارديا ءۇشىن عانا ەمەس, جالپى ەل ءۇشىن ەڭ ءىرى وقيعا بولادى جانە يتاليانىڭ ەكونوميكالىق دامۋىنا قوسىمشا سەرپىن بەرەدى دەپ كۇتىلۋدە.
«ەگەمەن-اقپارات».