«شاعىن جانە ورتا بيزنەستى دامىتۋ - ەلىمىزدىڭ بەرىك نەگىزى. شاعىن, اسىرەسە ميكروبيزنەس ەلىمىزدىڭ الەۋمەتتىك, ەكونوميكالىق جانە ساياسي ماڭىزدى ءرول اتقارادى. اتاپ ايتقاندا, ەڭ الدىمەن اۋىل تۇرعىندارىنا تۇراقتى جۇمىس بەرەدى, جۇمىسسىزدىقتى ازايتادى. سونىمەن قاتار سالىق بازاسىن قۇراپ, جەرگىلىكتى بيۋدجەتتى نىعايتادى. سونداي-اق جاپپاي كاسىپكەرلىكتى دامىتۋ ساناعا سىڭگەن پاتەرناليستىك پيعىل مەن ماسىلدىقتان ارىلۋعا مۇمكىندىك بەرەدى. سوندىقتان مەملەكەت الداعى ۋاقىتتا دا بيزنەسكە قولداۋ كورسەتە بەرەدى. بۇل ماقساتتا ۇلتتىق قوردان 100 ملرد تەڭگەگە جۋىق قارجى ءبولىندى. بىراق ساراپشىلاردىڭ پىكىرىنشە, قارجىلاي قولداۋدىڭ يگىلىگىن جەرگىلىكتى بيلىكپەن بايلانىسى بار شارۋاشىلىقتار عانا كورىپ وتىر. شىن مانىندە جاڭا جوبالار بويىنشا كومپانيالار قۇرىلىپ, جۇمىس ورىندارى اشىلۋى كەرەك ەدى. بۇل قاراپايىم زاتتار ەكونوميكاسىنا تىكەلەي بايلانىستى. بىراق جەرگىلىكتى اكىمدەر ۇيىمداستىرۋ جۇمىستارىن تالاپقا ساي ورىنداماعان. سونىڭ سالدارىنان سالىق جانە زەينەتاقى تولەمدەرىن ارتتىرىپ, جەرگىلىكتى بيۋدجەتتى نىعايتۋعا جاعداي جاسالىپ وتىرعان جوق. وسىعان وراي ەسەپ كوميتەتىنە جانە قارجى مينيسترلىگىنە قاراجاتتىڭ جۇمسالۋىن قاتاڭ باقىلاۋعا الۋدى تاپسىرامىن», دەدى پرەزيدەنت قازاقستان حالقىنا جولداۋىندا.