ەلورداداعى جاڭا مەكتەپكە اباي ەسىمى بەرىلدى

جيىندا ءسوز العان ا.مامين الدىمەن بارشا قازاقستاندىقتى جارقىن دا ايتۋلى مەرەكە – ءبىلىم كۇنىمەن قۇتتىقتادى. «الدىمىزداعى وقۋشىلار قادام باسقان جاڭا مەكتەپكە اباي قۇنانباي ۇلىنىڭ ەسىمى بەرىلىپ وتىر. وزدەرىڭىز بىلەتىندەي, كەلەسى جىلى ۇلى اقىنىمىزدىڭ تۋعانىنا 175 جىل تولادى. ەلباسى ن.نازارباەۆ سىزدەردىڭ وزىق ءبىلىم الىپ, زاماناۋي تەحنولوگيا­لاردى جاپپاي يگەرىپ, الەمدىك دەڭگەيدەگى باسەكەگە قابىلەتتى, بىلىكتى مامان بولىپ قالىپتاسۋلارىڭىزعا ەرەكشە ءمان بەرەدى. مەملەكەت باسشىسى قاسىم-جومارت توقاەۆ تامىز كەڭەسىندە جاڭالىق پەن پروگرەسكە قۇشتار ۇرپاقتى تاربيەلەۋگە ءازىر مۇعالىمدەرگە سۇرانىس جوعارى ەكەنىن اتاپ وتكەن ەدى. وسى رەتتە تۇڭعىش پرەزيدەنتىمىزدىڭ تاپسىرماسىمەن «پەداگوگ مارتەبەسى» تۋرالى زاڭ ازىرلەندى», دەدى پرەمەر-مينيستر. ۇكىمەت باسشىسىنىڭ ايتۋىنشا, اتالعان زاڭدا ۇستازداردىڭ جالاقىسىن وسىرۋگە, الەۋمەتتىك جاعدايىن جاقسارتۋعا با­عىتتالعان ناقتى شارالار كوزدەلدى. ۇكىمەت مۇعالىمدەردىڭ ءومىر ساپاسىن ارت­تىرۋعا, كۇندەلىكتى قىزمەتىن سا­پا­لى اتقارۋىنا قاجەتتى جۇمىستار جۇر­گىزۋدە. «قۇرمەتتى وقۋشىلار, مەك­تەپتىڭ اشىلۋىنا وراي قوعامدىق ماڭىزدى باستامالاردى دامىتۋ قورى 3D مودەلدەردى زەرتتەۋگە ارنالعان ۆير­تۋالدى عىلىمي سەكتسياسى بار «جاسىل تەحنولوگيالار» زەرتحاناسىن تابىس ەتتى. ال «سارىارقااۆتوپروم» ءىرى وتاندىق زاۋىتى الەمدىك ستاندارتتارعا ساي جاسالعان اۆتوبۋستى سىيلاپ وتىر», دەگەن ا.مامين دەمەۋشىلەرگە العىس ايتىپ, وقۋشىلار مەن پەداگوگتارعا سات­تىلىك تىلەدى.

سالتاناتتى شارادا پرەزيدەنت ق.توقاەۆقا اباي ولەڭدەرىن وقۋ ەستافەتاسىن جولداعان ءلايلىم رىسقالي ارنايى باس اقىننىڭ ولەڭىن وقىدى. مانەرىنەن ادەپ پەن بىلىمگە دەگەن قۇشتارلىقتىڭ ءيىسى اڭقيتىن وقۋشى ءلايلىم ەستافەتانى ەلورداداعى №87 اباي اتىنداعى جاڭا مەكتەپتەن الماتىداعى باس اقىننىڭ ەسىمى بەرىلگەن ءبىلىم وشاعىنا جولدادى. 

مەرەكەلىك جيىنعا وقۋشىلارمەن بىرگە اتا-انالار دا كوپتەپ كەلگەن. كوپ­شىلىكتىڭ اتىنان قۇتتىقتاۋ ءسوز ال­عان انا ايگۇل ايىمجانقىزى جاڭا مەكتەپ ءۇشىن ريزاشىلىعىن ءبىلدىردى. «قۇر­مەتتى وقۋشىلار, زاماناۋي ءبىلىم الۋ جولىنداعى قادامدارىڭىزعا ساتتىلىك تىلەيمىز. ال ءبىز, اتا-انالار ءوز تاراپىمىزدان بالالارىمىزعا تاربيە مەن ءبىلىم بەرۋدە ۇستازدار مەن مەكتەبىمىزگە قولداۋ كورسەتەمىز», دەدى ول.

وسىدان سوڭ العاشقى قوڭىراۋ سو­عىلىپ, پرەمەر-مينيستر جاڭا مەكتەپتى ارالاپ كوردى. قوناقتاردى قارسى العان وقۋشىلار ءبىلىم وشاعىنان اشىلعان اباي مۇراجايى, «ابايتانۋ», «جاسىل تەحنولوگيالار» جانە «ۆير­تۋالدى عىلىمي زەرتحانالار» كا­بي­نەتتەرىن تانىستىردى. مۇراجاي ۇلى اقىننىڭ تۋعان جەرى, وسكەن ورتاسى­نان تانىمدىق اقپارات بەرەتىن «بالا اباي», ولەڭدەرىنە نەگىزدەلىپ سالىنعان كارتي­نالار, قۇنانباي زامانىنان ساق­تالىپ كەلە جاتقان تاس ديىرمەن سەكىلدى جادىگەرلەرى بار «اقىن اباي» جانە ەڭ­بەكتەرىن ناسيحاتتاۋمەن, ونەرىن جال­عاستىرۋمەن اينالىسقاندارعا ارنال­عان «ابايدىڭ اقىن شاكىرتتەرى» اتتى ءۇش بولىمنەن تۇرادى. بۇدان بولەك, قو­ناق­تار قور جابدىقتاعان ۆيرتۋالدى عىلىمي زەرتحانادا بولىپ, زاماناۋي تەحنولوگيا­لارمەن جۇمىس ىستەپ كوردى. سونىمەن قاتار ۇكىمەت مۇشەلەرىنە مەك­تەپتىڭ كەڭ اسحاناسى تانىستىرىلدى.

900 ورىنعا لايىقتالعان مەكتەپ گۋمانيتارلىق باعىتتا جۇمىس ىستەيدى, سونداي-اق بالالارعا مەملەكەتتىك تىلدە ءبىلىم بەرەدى. ونداعى وقۋ كابينەتتەرىنىڭ سانى – 36. ءبىلىم وشاعىنا 1026 بالا قابىلدانعان, ونىڭ ىشىندە 153 وقۋشى العاش رەت مەكتەپ پارتاسىنا وتىردى. ءبىلىم جانە عىلىم ءمينيسترى اسحات ايماعامبەتوۆ جاڭا مەكتەپتىڭ بىرنەشە پروبلەمانى شەشىپ وتىرعانىن جەتكىزدى. «وسى مەكتەپتىڭ بالالارى بۇعان دەيىن ءۇش اۋىسىممەن وقيتىن. سوندىقتان بۇل ءبىلىم وشاعى باس قالاداعى ءۇش اۋىسىممەن جۇمىس ىستەگەن ەكى مەكتەپتىڭ ماسەلەسىن شەشىپ وتىر. ءارى قازاقتىڭ ۇلى تۇلعاسى اباي ەسىمىنىڭ بەرىلۋى ۇستازدار مەن وقۋ­شىلارعا جاۋاپكەرشىلىك جۇكتەيدى. ەلى­مىزدەگى ءاربىر وبلىس ورتالىعىندا باس اقىن اتىنداعى مەكتەپتىڭ بولۋىن قولعا الىپ وتىرمىز», دەدى مينيستر.