بەيسەنبى, 14 اقپان 2013 7:35
ەرتەڭگى كۇندى ەلەستەتپەي ەشكىم دە ءومىر سۇرە المايدى. بۇل ادامنىڭ تابيعي بولمىسى. ال ادامنىڭ قامىن ويلاپ, كۇنىن كۇيتتەيتىن قوعامنىڭ دامۋى وعان تىكەلەي بايلانىستى. ومىرىمىزدە بولىپ جاتقان جۇمىلىسقا, جاھاني ۇردىسكە سىناي قاراپ ساراپتاپ, كوكجيەگىن كوسەمدەپ كورە ءبىلۋ دە قوعامنىڭ باستى ماقسات-مۇراتى. «قازاقستان-2050» ستراتەگياسىنىڭ دىتتەگەنى دە كوزگە ۇرار كەمەلدىكتىڭ كوڭىل تولار كورىنىسى. ونىڭ تاڭداندىرۋى مەن تولعاندىرۋى ۇندەس. ەڭ باستىسى – بەكەمدىلىگى, الدىمەن, بەتالىستى بايىپتاپ سىندارلى ساياسي باعىتتى تۇزەپ الۋى. البەتتە, ىزگىلىكتى مىندەتتەر يگى ىستەرگە باستايدى. وسىنى سەزىنگەندە بۇل باعىتقا بويلاي ءبىلۋىمىز دە وڭاي بولماسى انىق.
بەيسەنبى, 14 اقپان 2013 7:35
ەرتەڭگى كۇندى ەلەستەتپەي ەشكىم دە ءومىر سۇرە المايدى. بۇل ادامنىڭ تابيعي بولمىسى. ال ادامنىڭ قامىن ويلاپ, كۇنىن كۇيتتەيتىن قوعامنىڭ دامۋى وعان تىكەلەي بايلانىستى. ومىرىمىزدە بولىپ جاتقان جۇمىلىسقا, جاھاني ۇردىسكە سىناي قاراپ ساراپتاپ, كوكجيەگىن كوسەمدەپ كورە ءبىلۋ دە قوعامنىڭ باستى ماقسات-مۇراتى. «قازاقستان-2050» ستراتەگياسىنىڭ دىتتەگەنى دە كوزگە ۇرار كەمەلدىكتىڭ كوڭىل تولار كورىنىسى. ونىڭ تاڭداندىرۋى مەن تولعاندىرۋى ۇندەس. ەڭ باستىسى – بەكەمدىلىگى, الدىمەن, بەتالىستى بايىپتاپ سىندارلى ساياسي باعىتتى تۇزەپ الۋى. البەتتە, ىزگىلىكتى مىندەتتەر يگى ىستەرگە باستايدى. وسىنى سەزىنگەندە بۇل باعىتقا بويلاي ءبىلۋىمىز دە وڭاي بولماسى انىق.
جانە بەيمازا كوڭىلدىڭ تۇيتكىلى تەگىننەن-تەگىن ءتىل ۇشىنا ۇيىرىلە كەتپەيدى. سونداعىسى: «بۇعان ءبىز دايىنبىز با؟
مۇنداي الىستى مەڭزەگەن ۇلكەن اسۋلارعا جۇرەگىمىز داۋالاي الا ما؟ قياسى مەن قيىندىعى قانشالىقتى؟ تابانىمىزداعى تاعامىز بەرىك پە؟ تالانىمىزعا تالابىمىز سەرىك پە؟» – دەگەن وي.
ورە تۇرەگەلگەن سان ساۋالدىڭ جاۋابى تاپتىرماي-اق باعادى. بىراق, ءبىر نازىك ساۋلە – ءومىر جالعاستىعىنىڭ ۇلىلىعى ءۇمىت وتىن ۇرلەي تۇسەدى. ۇرپاقتان ۇرپاقتىڭ وزىپ تۋاتىنى كامىل سەندىرە بەرەدى. ءبىر ءسات وسىلاي سابىرعا سالۋىمىزبەن ويىمىز ورنىن تابادى. «باسە, – دەيسىڭ بايىبىنا بارا ءتۇسىپ, – باعىتىڭدى تۇزەۋ – بارىڭا سەنۋ ەمەس پە؟!». بايىبىنا بارا بىلسەك كوڭىل شىنى – ءومىر سىنى ەكەن. ال اقيقاتى, بۇل ستراتەگيا – نىعايا باستاعان ەلدىڭ نىعىمەتى, باتىر بايلام, باتىل باعىتى. ەلدىڭ اياڭداۋى ەمەس, العا ۇمتىلۋدى تاڭداۋى. ۇلت رەتىندە الەم الدىندا قالاي كورىنۋىمىز كەرەك دەگەن ۇلى ماقساتتى ۇلىقتاعان ۇلى بەتالىس.
بۇل – ارينە, مۇنىڭ ءبارى وڭاي شارۋا ەمەس. سوندىقتان, وڭايلىقپەن جۇزەگە اسپايتىنىن اڭعارتار پاراساتتى پارىز جۇگى كىمگە تيەسىلى ەكەندىگى دە العا تارتىلادى. ءاربىر ازاماتتىڭ – ۇلت وكىلىنىڭ الدىنداعى تۇرعان ورتاق مىندەت. ودان ەشكىم دە قالىس قالا المايدى دەگەن ءۋاج دە تۇگەلىمەن تۇسىنىكتى. ولاي بولسا, حالىقتىق ءىستىڭ ءدال ورتاسىنان كورىنۋ كەرەكتىگىن دە جاقسى بىلەدى. «ءبىزدىڭ قوعامىمىزدىڭ قازىرگى كوزقاراستارىنىڭ نەگىزىن ءدال وسى ينتەلليگەنتسيا بەرۋى كەرەك», – دەگەن ستراتەگياداعى سارالى ءسوزدىڭ دە سالماعىن تەرەڭ تۇسىنەدى. ينتەلليگەنتسيادان ىزگىلىكتى ءىس كۇتكەن, ونىڭ بەلسەنە قاتىسۋىنا تىلەك ارتقان جانە وعان سەنىممەن قارايتىنىن بىلدىرگەن بۇل ءسوزدىڭ استارىندا ۇلتتىق كوزقاراستى قالىپتاستىرۋدا ولاردىڭ قولىنان كوپ شارۋا كەلەتىنىن مەڭزەۋى ورىندى دا تۇسىنىكتى. ويتكەنى, ينتەلليگەنتسيا قاي زاماندا دا يدەيالاردىڭ, كوزقاراستاردىڭ, جاڭاشىلدىقتىڭ, جاسامپازدىقتىڭ العى شەبىندە بولعان. ولار جاساعان قۇندىلىقتاردىڭ قوزعاۋشى دا قورعاۋشى كۇشىنىڭ وراساندىعى تاريحتا دالەلدەنگەن. ولاردىڭ زامان مەن ادامدى رۋحاني بايىتۋ ارقىلى قانداي بيىككە كوتەرىلگەنى دە ايان. ەكونوميكالىق, ماتەريالدىق دەڭگەي – دارەجەنىڭ ولارسىز ومىرگە ورنىعا المايتىنى, تامىرىن جايا المايتىنى دا كوپكە ءمالىم جاي. ولاي بولسا, ولاردىڭ الدىڭعى قاتارلى كۇش بولىپ تانىلۋى, باعالانۋى – ءالى دە الەۋەتىنەن ايىرىلماعانىن كورسەتەدى. ەندەشە, ينتەلليگەنتسيانىڭ ءبىر تولقىن تارماعى – قالامگەرلەردىڭ ءرولى وسى جولى ايقىن كورسەتىلىپ وتىر دەۋىمىز ورىندى بولماق. شىندىعىندا, زاماننىڭ قاھارماندارىن جاساۋ دەگەن رۋحاني جەتىلۋدىڭ, ۇلتتىق ۇلگى ۇسىنۋدىڭ, سانالىق سىلكىنىستىڭ, جاڭانى جالىنان ۇستاي ءبىلۋدىڭ ءبىر ۇلگىسى بولماق. بۇل – رۋحى بيىك قاھارماندى سومداۋ, ونى ءسۇيسىنىپ ەلىكتەۋگە لايىقتى ەتىپ جازۋ.مۇنىڭ ءوزى ءار قالامگەردىڭ ۇلت بولاشاعى ءۇشىن قوسار ۇلاعاتتى ۇلەسى بولماق.
قالامگەر ءوزىنىڭ قادىرىن ءبىلۋ ارقىلى – قالامىن قاپىسىز جۇمساي ءبىلۋى تيىستىگىن ۇنەمى جادىندا ۇستاسا ءلازىم. ويتكەنى, تاريحقا قاراپ تۇرساڭ قاي كەزەڭدە دە قالامگەرلەر, ينتەلليگەنتسيا يدەيالار كورىگى بولعان, قاي قوعامدا دا ينتەلليگەنتسيانى وزىنە تارتۋدى ءبىرىنشى مىندەت ساناعان. قوعام – حالىققا سۇيەنگەن, قالامعا ءۇمىت ارتقان.
الىسقا بارمايىق, كەشەگى رەۆوليۋتسيا داۋىرىندەگى مىنا ءبىر جايعا كوز جۇگىرتەلىك.سونى اتاقتى قالامگەر ماكسيم گوركي بىلاي دەپ جازادى: «…وسى ءبىر… مىعىم ادام, ءبىر قولىمەن سوكراتتىكىندەي كەڭ ماڭدايىن سيپاپ قويىپ, ەكىنشى قولىمەن مەنىڭ قولىمدى قىسا ءتۇسىپ, جانارىن جالت ەتكىزە قاراپ الدى دا, سول زاماتتا «انا» اتتى كىتابىمنىڭ كەمشىلىكتەرى جونىندە ايتا جونەلدى… مەن كىتابىمدى جازۋعا اسىققانىمدى ايتپاق ەدىم, بىراق نەگە اسىققانىمدى ايتىپ ۇلگەرمەدىم, لەنين باسىن يزەپ قوشتاي ءتۇسىپ, ونى ءوزى تۇسىندىرە سويلەدى: «بۇل وتە كەرەك كىتاپ… بۇرىن جۇمىسشىلاردىڭ كوبى رەۆوليۋتسيالىق قوزعالىسقا سانالى تۇردە ەمەس, بىتىراڭكى كۇيدە قاتىسسا, «انانى» وقىپ, ونى ءوز پايداسىنا جاراتادى», دەپ الدى دا: «دەر كەزىندە شىققان وتە قاجەت كىتاپ», – دەدى. بۇل مەنىڭ ودان ەستىگەن ەڭ قىمبات ءارى تۇمارداي جالعىز كومپليمەنتىم بولدى…». بىرگە بولىپ اڭگىمە قۇرعان كوسەم كەلەسى ءبىر كەزدەسكەنىندە جازۋشىعا: «…ينتەلليگەنتسياعا ايتىڭىز, ولار بىزگە كەلسىن!..» – دەيدى.
مىنە, قالامنىڭ كۇشىن قالاي باعالاعانىن جانە ونى ءوزىنىڭ باعىت-باعدارى ءۇشىن قالاي پايدالانعانىن كورسەتەتىن وتكەن ءداۋىردىڭ شىنايى ءبىر دەرەگى. بۇل – ينتەلليگەنتسيا قاي جاقتا بولسا سول جاقتىڭ كۇشى مول دەگەندىكتىڭ دايەگى ەمەس پە؟!
تاريحتىڭ مۇنداي ەپيزودتارىنا ءبۇگىنگى كۇننىڭ بيىگىنەن قاراعاندا اركىمنىڭ ارقيلى ويعا كەلۋى ابدەن مۇمكىن. مەيلى, بىراق وتكەننىڭ ساباعى دەيتىندى ەستە ساقتاپ ساراپتاي ءبىلۋ كەرەكتىگىن دە ۇمىتپايىق. قاي كەزەڭنىڭ دە كەلبەتى ينتەلليگەنتسيانىڭ ۇلەسىنسىز بولماعانىن مويىنداۋ ارتىق ەتپەيدى. دەمەك, قالامگەرلەرىمىز ءوز ميسسياسىن سەرگەك سەزىنە وتىرىپ, جاۋاپكەرشىلىكپەن اتقارا بىلۋلەرى كەرەك-اق. مۇنىڭ ءبارىن قالامگەرلەرىمىز تەرەڭ تۇسىنەدى. ومىرگە وياۋ كوزبەن قاراۋعا ۇمتىلادى. ارعى-بەرگىدەن ويلايتىن ولاردىڭ قالامىنا ىلىنەر تاقىرىپ تا كوپ, تۇلعا دا جەتەرلىك. بايقاپ بارلاۋ كەرەك, تاڭداپ تالعاۋ كەرەك. مۇنىڭ ءبارى قالامدى سۋىتپاۋ, قادالىپ وتىرۋ, قالعىپ قاجىماۋ دەگەندەيىن دامىلسىز ويساۋعان ەڭبەك. قاھارماننىڭ كىلتى – قالامنىڭ ۇشىندا دەۋدىڭ سىرى وسىندا. ءبىز بىلگەندە, قالامگەردى كورىگى قىزعان ىلكى يدەيا – كورىكتى ويدىڭ قازىرگىدەي قىزۋلى كەزەڭى كۇتىپ تۇر. ارينە, زامان وزگەردى, ونىسىنا وراي ونىڭ مورالدىق-ماتەريالدىق نەگىزى دە, سيپاتى دا جاڭا تۇرگە ەندى. قالامگەردىڭ قاقىلى ءسوزى – اقىلى سوزگە اينالۋى كەرەك-اق ەكەنى كۇن تارتىبىنە شىقتى. وسى ورايدا, ورتاق ءتۇيىننىڭ شيەسىن بىرلەسىپ شەشۋ – ساياسي باعىتىمىزدىڭ ينتەلليگەنتسياعا ارتقان مىندەتتىڭ ويداعىداي ورىندالۋىنا, اتسالىسۋىنا مۇمكىندىك بەرەر بىردەن-ءبىر سەپ. سەپ ەمەس, سەرپىن دەسەك تە بولار.
نازار اۋدارساڭىز, «قازاقستان-2050» ستراتەگياسىنداعى ۇلتتىق جۇمىلىسقا, ءاربىر الەۋەتتى ىسكە اتسالىسۋعا شاقىرعان ماڭىزدى مىندەتتەردىڭ مەڭزەۋى ماقساتتى دا مۇراتتى. ول ۇلتتىق ۇلى ىستەردى يگەرۋ كەرەكتىگىن, الەم الدىندا قالاي كورىنەمىز دەگەن وتە جاۋاپتى سىننىڭ تۇرعانىن العا تارتادى. مۇنداعى: «ينتەلليگەنتسيا قالىپتاسقان مەملەكەت كەزەڭىندە جاڭا جالپى ۇلتتىق قۇندىلىقتار جاساۋدا الدىڭعى قاتارلى كۇش بولۋى كەرەك. ولار زامانعا ساي جانە بولاشاققا قۇلشىنىستى بولۋى ءتيىس», – دەگەن سوزدەر تەگىن ايتىلىپ وتىرعان جوق. بۇل ينتەلليگەنتسياعا بەرىلگەن سەنىم مەن باعا ءارى ۇلكەن ءۇمىت پەن ۇلان-اسىر جاۋاپكەرشىلىك. بۇعان لايىقتى ىسپەن جاۋاپ بەرۋ – ينتەلليگەنتسيا وكىلدەرى ءۇشىن سىن. ونىڭ ىشىندە ءبىزدىڭ قالامگەرلەردىڭ دە ورنى ەرەكشە, الەۋەتى ايرىقشا دەر ەدىم.
بۇل رەتتە جالاڭ شەشەندىككە, جاداعاي جالپىلامالىققا بارا بەرمەي, قانداي ءبىر ءىستىڭ وڭ شەشىم تابۋى ونىڭ پروبلەمالارىنا دا پراگماتيكالىق پايىممەن قاراۋ كەرەكتىگىن العا تارتادى. ويتكەنى, جاقسى ءىس جايداق جەردە تۋماي جۇيەگە قويىلعان جايلى ورتادا جاسالادى. ەندەشە, قالامگەرلەردىڭ ءوز ءرولىن اقتاي ءبىلۋى ءۇشىن جاعدايى مەن مۇمكىندىگىنە احۋال تۋعىزۋ شىعارماشىلىق شامىنىڭ ءسونبەۋىنە, قالامىنىڭ قاجىماۋىنا دەگەن قامقورلىق ەكەنىن ەسكەرمەي بولمايدى. مۇنىڭ ەكىنشى ءبىر استارى – قاجەتتى شىعارمانىڭ – زاماناعا لايىق تۋىندىنىڭ قالاماقىسىز جازىلمايتىنى وي سالادى.
ولاي بولسا, ەڭبەكتىڭ قانداي ءتۇرى بولسا دا ەلەنۋى كەرەك, باعالانۋى كەرەك دەيتىن كرەدونىڭ كۇن تارتىبىنەن تۇسپەۋىنە قاقىسى بار. «ءبىز ءوز زامانىمىزدىڭ جاڭا قاھارماندارىن جاساۋىمىز كەرەك!» دەگەندى ءتۇن جامىلىپ تەبىرەنىپ, كۇن وتكەرىپ تولعاتىپ, قالامىمەن بىرگە قالعىپ, بىرگە ويانار اقىن مەن جازۋشىنىڭ قالاي تالعاپ تۇسىنەتىنى, بويلاي تۇيسىنەتىنى بەلگىلى جاي. قاي كەزەڭدە دە جاقسى شىعارمانىڭ قاندايلىق ازاپپەن, جانكەشتىلىكپەن تۋعانى كەيىنگىگە كەڭىنەن ءمالىم. ولاردى وقىپ وتىرىپ سول داۋىرمەن تىلدەسەمىز, سىرلاسۋىمىز, رۋحاني ۇندەسۋىمىز سول ەڭبەكتىڭ ارقاسى. سوندىقتان, قالامگەرگە اقىل ايتۋ كۇپىرلىك بولادى, كەرىسىنشە, ونى تىڭداۋ, ويىنا وي قوسۋ شۇكىرلىك بولادى.وعان مىنانى جاز دەگەننەن گورى سونى جازۋعا ىقىلاسىن وياتۋ – ىرىستى بولماق.
كەيدە قالامگەر بوي جاسىرعان بايگە اتى بولىپ ەلەستەيدى. ءدۇبىرلى دودادا شاڭ جۇتىپ شاڭىراق اينالىپ, جۇزدەن ءبولىنىپ شىعىپ سۋىرىلا كورىنەر سايگ ۇلىكتىڭ سودان كەيىنگى تەرى ساۋلاپ سولىقتاپ تۇرعان سۇلبا ءتۇرىن كورگەندە ونىڭ وسىعان قالاي, قانشا كۇن, قانشا ءتۇن تاڭاسىرىلىپ قاقتالعانى, قالاي باپتالعانى ايتىلمايدى دا. بىراق, بايەكتى جان بايگەدەن باپتىڭ ارقاسىندا كەلەتىنىن بىلەدى. مۇنداعى ايتپاعىم, قالامگەرگە دە باپ كەرەك, جاعداي كەرەك, كۇي كەرەك. ول داۋىرىنە قاجەتتى دۇنيە جازۋى ءۇشىن كۇنى مەن ءتۇنىن سايگ ۇلىكتەي باستان كەشۋى كەرەك.
بۇل رەتتە, ارينە, جالىندى سوزدەردەن گورى جىگەرلى ىستەر كەرەكتىگى كورىنىپ-اق تۇر. الدىمەن «زامانىمىزدىڭ جاڭا قاھارماندارى سومدالعان شىعارمالاردىڭ تۋىنا ىقپال ەتۋى ءۇشىن نە ىستەۋ كەرەك, قانداي جولداردى تاڭداعان دۇرىس, نەندەي قامقور ءىس وڭتايلى» دەگەندى دىتتەگەن ادەبي-مادەني ىسكەرلىك باعدارلامالار جاساپ, ناقتى شارالارمەن بەكىتە تۇسسە وڭ بولار ەدى. ادەبي ەڭبەكتىڭ اۋىرلىعىن ءبارى دە بىلەدى, ءبارى دە تۇسىنەدى… بىراق ۋاقىتتىڭ, زاماننىڭ زىر قاققان دوڭعالاعىنىڭ ءدۇبىرىن ەستىمەۋ ەشقانداي قيسىنعا كەلمەيدى. وسىنداي ءساتتىڭ ورايىندا ويىم ايتادى: «كورىكتى قىزعان كەزىندە سوق», دەۋ ءلازىم. بىرىنشىدەن, قالامگەرلەردىڭ پسيحولوگياسى مەن پايىمىنا قامشىلاۋ دا كەرەك-اق. ول ءۇشىن ناقتى تاپسىرىس بەرۋ تۇيىقتان شىعۋدىڭ قازىرگى تاڭداعى بىردەن-ءبىر جولى دەپ بىلەم. مۇنداي ءتاسىل قاي قوعامدا دا بولعان. ءتىپتى, سوناۋ ساراي اقىندارىنان باستاپ سوتسياليزم ءسوز ساردارلارىنا دەيىنگى كەزەڭدەردى, سونىڭ بىزگە جەتكەن شىعارمالارىنا كوز جۇگىرتسەڭىز كوپ جايعا كوڭىل جەتكىزۋگە بولادى. ەكىنشىدەن, تاپسىرىس دەگەننەن ۇركۋدىڭ ەش رەتى جوق. سوندىقتان, مىقتى ون بەس جازۋشىعا قازىرگى زامان جايلى روماندارعا ناقپا-ناق تاپسىرىس بەرىلۋى كەرەك. جازۋشى جازعانىنىڭ شىعاتىنىنا, وعان لايىقتى قالاماقى الاتىنىنا كامىل سەنىمدى بولۋى شارت. بۇعان دەيىنگى ۇلكەندى-كىشىلى بىرقاتار بايگەلەردەن تۋعان دۇنيەلەردىڭ ءۇمىتتى اقتاماعانى بارشاعا بەلگىلى. ال مىناداي اشىق تاپسىرىس – بەلگىلى جازۋشىدان ناقتى شىعارما كۇتەدى. ەگەر وسىنداي تاپسىرىسپەن ەكى-ءۇش جىل جۇمىس جۇرگىزىلەتىن بولسا, ەڭ كەمىندە ءۇش-ءتورت سوقتالى ۇلكەن دۇنيەلەردىڭ تۋاتىنىنا كامىل سەنۋگە بولادى. ويتكەنى, قاي جازۋشىنىڭ قانداي شىعارماعا قارىمى جەتەتىنى جانە ونى ورىنداي الاتىنى, يدەياسىنىڭ جەتكىلىكتىلىگى بەلگىلى بولعاندىقتان پوتەنتسيالى بار جازۋشىلاردى تارتا ءبىلۋ قيىنعا سوقپايدى. ءبىز ۇلتتىق قۇندىلىقتاردى جاساۋ ءۇشىن وسىنداي تاۋەكەلگە دە جاسقانباي بارۋىمىز كەرەك. وسى جەردە پرەزيدەنتىمىزدىڭ: «…ارينە, ينتەگراتسيادا تەك پايدا عانا ەمەس, سونىمەن بىرگە وندا تاۋەكەل دە بار», – دەۋى ءبىزدىڭ وسى ءبىر ويىمىزدى نىقتاي تۇسەدى. ەڭ باستىسى – قاھارماندار قاسىمىزدا ءجۇر. ونى كورە بىلسەك كوركەم تۋىندى دا تۋارى حاق. وسىنىڭ ءبارى اينالامىزداعى قۇبىلىستاردى ساناعا ءسىڭىرۋدى, سارالاپ سەنىمگە اينالدىرۋدى قاجەت ەتەدى. دامۋىمىزدىڭ كوكجيەگىن كورە ءبىلۋدى تالاپ ەتەدى. قازاق مەملەكەتىنىڭ ءبىر مۇشەسى ەكەنىڭدى سەزىنە وتىرىپ, ماقتانا ءبىلۋدى ماقسات ەتەدى. مۇنىڭ ءسوز بوپ قالماۋى ءلازىم. ماڭىزدىسى – قالام مەن قاھارماننىڭ تابىسۋى, سونىڭ ومىرگە رۋحاني قۇندىلىق بولىپ كەلۋى. بۇل رەتتە قالامگەرگە كەرەگى – سۋاتى سارقىلمايتىن شالقار وي, شامى سونبەيتىن شابىتتى ەڭبەك.
ءومىر قالعۋدى, قامسىز كۇي كەشۋدى قالامايدى. ويى وياۋ, سەزىمى سەرگەكتەر زامانى تۋعانى امبەگە ايان. سوندىقتان, العا قويىلعان مىندەتتەرگە تاباندىلىق تانىتىپ, جارقىن دا جوتالى ىستەردىڭ جالىنان جاسقانباي ۇستارداي جىگەرمەن جۇمىلۋ – جولداۋدى قولداۋدىڭ ەڭ ۇتىمدى جولى بولماق. بيىك ماقساتتارعا وسىنداي باتىل دا بىرەگەي ماقساتكەرلىكپەن, تىڭ يدەيالارمەن, تىنىمسىز ەڭبەكقورلىقپەن جەتۋگە بولاتىنىن ۇلتتىق قۇندىلىقتاردىڭ ۇيىتقىسى بولىپ كەلە جاتقان قالامگەرلەر قاۋىمى جاقسى بىلەدى. بىلەدى دەۋ بەر جاعى, ءسوزدىڭ داتى – باستى پارىز سانايدى.
جاقاۋ داۋرەنبەكوۆ,
جازۋشى, «انا ءتىلى» باسپاسىنىڭ ديرەكتورى,
حالىقارالىق «الاش» سىيلىعىنىڭ لاۋرەاتى.
الماتى.