قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ ەلىمىزدىڭ شاحتەرلارىن كاسىبي مەرەكەلەرىمەن قۇتتىقتادى دەپ حابارلايدى elbasy.kz.
«قۇرمەتتى كومىر ءوندىرۋ سالاسىنىڭ ەڭبەككەرلەرى مەن ارداگەرلەرى! سىزدەردى شاحتەر كۇنىمەن قۇتتىقتايمىن!
مەن كەنشىلەرگە ءاردايىم زور قۇرمەتپەن قارايمىن, ويتكەنى شاحتەر ەڭبەگىنىڭ بەينەتى ماعان جاقسى تانىس.
بۇل ماماندىق قاشاندا تەمىردەي ءتوزىم مەن جاۋاپكەرشىلىكتى, جانقيارلىق پەن قايسارلىقتى تالاپ ەتەدى. سوندىقتان دا سىزدەر قاجىرلى ەڭبەكتەرىڭىز ارقىلى قوعامدا شىنايى قۇرمەتكە بولەنىپ كەلەسىزدەر.
كومىر ءوندىرىسى ءبىزدىڭ يندۋستريامىزدىڭ بەرىك نەگىزى ەكەنىن نىق سەنىممەن ايتۋعا بولادى. بۇل سالانىڭ ەڭبەككەرلەرى ونى دامىتۋعا قوسقان قوماقتى ۇلەستەرىن, ءوز جۇمىستارىنىڭ ناتيجەسىن ورىندى ماقتانىش ەتە الادى.
الداعى ۋاقىتتا دا وتاندىق ەكونوميكانىڭ ءتيىمدى وركەندەۋىنە جانە ەلدىڭ ەنەرگەتيكالىق الەۋەتىنىڭ نىعايۋىنا اتسالىسا بەرەسىزدەر دەپ كامىل سەنەمىن.
سىزدەرگە مىقتى دەنساۋلىق, تابىس پەن يگىلىك, وتباسىلارىڭىزعا باق-بەرەكە تىلەيمىن!» - دەلىنگەن ەلباسىنىڭ قۇتتىقتاۋىندا.