بۇگىن الماتى قالاسىندا قىرعىز مەملەكەتىندەگى جەڭىس شىڭىندا جوعالعان قازاقستاندىق الپينيستەردى ىزدەۋ وپەراتسياسىنىڭ قورىتىندىسى بويىنشا قورعانىس ءمينيسترىنىڭ ءباسپاسوز-كونفەرەنتسياسى ءوتتى. شاراعا ىزدەۋ-قۇتقارۋ وپەراتسياسىنىڭ مۇشەلەرى قورعانىس مينيسترلىگىنىڭ اسكەري الپەنيستەرى كاپيتان ماقسۇت جۇماەۆ, اعا لەيتەنانت ۆاسيلي پيۆتسوۆ, سونداي-اق الپەنيزم جانە سپورتتىق قۇزعا شىعۋ فەدەراتسياسىنىڭ باس حاتشىسى قازبەك ۆاليەۆ قاتىستى. بۇل تۋرالى مينيسترلىكتىڭ ءباسپاسوز قىزمەتى حابارلادى.
اسكەريلەر جەڭىس شىڭىن 14 رەت اينالىپ ۇشىپ ءوتتى. 22 تامىز كۇنى ىزدەۋ-قۇتقارۋ وپەراتسياسىنىڭ جەتەكشىسى ۆاسيلي پيۆتسوۆتىڭ ايتۋى بويىنشا اۋەدەن شولۋ مەن ارنايى قۇرىلعىدان باقىلاۋ ەش ناتيجە بەرمەگەن. ءتىرى ادامداردىڭ ەشقانداي بەلگىسى مەن دەنەسى تابىلماعان.
جوعالعان قازاقستاندىق ءالپينيستىڭ جۇبايى شاحاريزادا شاحبۋتوۆا قۇتقارۋشىلارعا العىس ايتتى.
«قاتال اۋا-رايىنا قاراماستان قۇتقارۋشىلار قولدارىنان كەلگەنىن ايامادى. كومەكتەرى ءۇشىن العىس ايتامىن. قىرعىز مەملەكەتىندەگى قازاقستان ەلشىلىگىنە, قورعانىس ءمينيسترىنىڭ ءباسپاسوز حاتشىسىنا, الپينيستەرگە راحمەت. ولار ءوز ءىسىنىڭ شەبەرلەرى. شىندىعىندا ىزدەۋگە ۇزاق ۋاقىتتى ارناپ, حابارلاسىپ وتىردى. ءالى دە جىگىتتەردىڭ قايتىپ كەلەتىنىنە ءۇمىتىمىزدى ۇزبەي, تەك جاقسىلىققا عانا سەنەمىز. تاعى دا بارلىعى ءۇشىن راحمەت! ولار ەلىمىزدىڭ لايىقتى ازاماتتارى, جاقىن دوستارى, ناعىز جىگىتتەر» - دەدى ءوز سوزىندە قىرعىز مەملەكەتىندەگى جەڭىس شىڭىندا جوعالعان قازاقستاندىق الپەنيستىڭ جۇبايى.