24-26 تامىز ارالىعىندا رەسپۋبليكانىڭ سولتۇستىك جانە سولتۇستىك-باتىس ايماقتارىنىڭ كەي جەرلەرىندە نايزاعايمەن جاڭبىر, جەلدىڭ داۋىلدى كۇشەيۋى كۇتىلەدى. بۇل تۋرالى «قازگيدرومەت» رمك حابارلادى.
«قازاقستانعا رەسەيدىڭ ەۋروپالىق بولىگىنىڭ سولتۇستىك ايماعىنان اتموسفەرالىق فرونتتارمەن تسيكلون جىلجىپ, سونىڭ سالدارىنان باتىس وبلىستارىندا نايزاعايمەن جاڭبىر جانە كوپتەن كۇتكەن ىستىقتىڭ باسىلۋى كۇتىلەدى. كۇندىزگى اۋا تەمپەراتۋراسى پليۋس 35…40°س-تان كەيىن, 20…30°س-قا دەيىن تومەندەيدى. سونداي-اق رەسپۋبليكانىڭ سولتۇستىك جانە سولتۇستىك-باتىس ايماقتارىنىڭ كەي جەرلەرىندە نايزاعايمەن جاڭبىر, جەلدىڭ داۋىلدى كۇشەيۋى كۇتىلەدى. قازاقستاننىڭ وڭتۇستىك-شىعىسىنىڭ كەي جەرلەرىندە نايزاعايمەن وتكىنشى جاڭبىر كۇتىلۋى مۇمكىن. دەمالىس كۇندەرى قالعان ايماقتاردا جاۋىن-شاشىنسىز اۋا رايى كۇتىلەدى, ورتالىقتا جانە شىعىستا كۇندىز اۋا تەمپەراتۋراسىنىڭ پليۋس 25…35°س دەيىن جوعارىلاۋى بولجانادى», دەلىنگەن حابارلامادا.